1 MARARATU 2 - WUKE SUSI WATTI'U AL᷊AL᷊USASSA

Manga tanatan Daud panginsueanne si Salomo

¹ Napawe maranite papatene, i Daud namaggo si Salomo, parinsine, wuṛṛu nangonggollu manga tanatane apan panginsueanne. I Daud nabbisara,

² “Nia'omante tempone i ya'u nate. Ṛinone i'o mangngimanna wuṛṛu waṛṛani.

³ Pammanarate apa apan niparentan Mawu Ruatanu si'o. Paatuṛṛutte su anambon manga tita wuṛṛu manga parenta-Ne apan uawoṛṛetta sulal᷊ummu Wuke Musa, tadea'u watukkuapa i'o inai i'o sarun mahessi sulal᷊umu al᷊awo'u manaranu.

⁴ Amungkangngu i'o matuṛṛutta Mawu, i Tou sarun manipussu pa'aire-Ne manungku papapulungku sarun mamarenta Israel, sawal᷊iate i mangitou ringannu ahewallu naungnga wuṛṛu anambon pangangimanna sidutu tuttuṛṛutta manga parenta-Ne.

⁵ Pia lai hatto sambau! I'o asinungka ma'anaungnga apa apan buatte niola'i Yoab si ya'u ringannu namate darua tembonannu Israel, eteudde i Abner ana'i Ner wuṛṛu i Amasa ana'i Yeter. I tou namate sitarua sutempo paddarame tadea'u mabbal᷊issa pamamate apan niola'i mangitou sutempon pangalo. I tou namate taumata tawe sal᷊ane arawe orassa indi ete i ya'u apan ṛinone mamasanna inolaanne wuṛṛu ete i ya'u apan natataṛṛangnga.

⁶ Ne, ana'u i'o ṛinone ma'ola'a si tou tumuṛṛutu apa apan su ṛingirannu mapia; tumba'u imbaṛṛangnga mamalan tou mate ringannu suṛṛinone.

⁷ Arawe su saruannu al᷊aṛṛana'a esakki Barzilai wuassu Gilead ṛinone olaannu ringannu mapia. I'o ṛinone manuungngu hausanni mangitou miallo-miallo, ana waugu i mangitou buatte na'ola'a apapia si ya'u sutempo i ya'u tinumal᷊angnga wuassu iaangngu Absalom.

⁸ Su ola'i Simei ana'i Gera wuassu soa Bahurim su wageangngu leta'i Benyamin, pia lai tanata'u si'o. Sulal᷊ummu amatangku watukku Mahanaim, i Simei udde dorone namontogga si ya'u ringannu maṛṛagissa. Arawe wua'udde, sutempo i tou nirumanta nanal᷊oho si ya'u su Sal᷊ukku Yordan, i ya'u nassalu si tou ringannu arannu Mawu manungku i ya'u tawe mamate si tou.

⁹ Arawe eteindi tanata'u si'o: arie pabbala'a i tou mapallossa wuassu ṛuumanna. I ya'u masingkatta i'o pande; nariaddi, salaiwe i tou timmadete, paddea'e tadea'u i tou iṛṛuumanna pateanna.”

Apapaten Daud

¹⁰ Wua'udde i Daud nate wuṛṛu nilabbinga su Soan Daud.

¹¹ I tou naola'a ratun Israel al᷊annune appatu pul᷊o su tonnane; pitu tonna i tou uatana'u su Hebron, wuṛṛu tatallu ma pul᷊o tallu su tonnane su Yerusalem.

¹² Wua'udde i Salomo naola'e ratu nallol᷊ossa si Daud, iamangnge. Taṛṛinon Salomo naola'a sangkatou ratu lembon matohassa.

Apapaten Adonia

¹³ Su allo sambau, i Adonia inaite ringanni Batsyeba. I Batsyeba naiwal᷊ote si Adonia, “Apa patatembonu indi ringannu pandumma mapia?” “Ore,” sasimbakki Adonia.

¹⁴ Ana see i tou nabbisara apia, “Pia sambau apan ta'u doronganna wuassu inangnga.” “Apa?” Aiwal᷊on Batsyeba.

¹⁵ I Adonia sinumbakka, “Inangnga masingkatta manungku ete i ya'u apan ṛinone maola'a ratu; udde aaggasan ninatimannu ahewallu Israel. Arawe apan nariaddi udde wal᷊ine; tuari'u apan naola'a ratu, ana waugu Mawu mappandumma aroddi.

¹⁶ Orassa indi ya'u pia sambau darorongnga, antimanna Inangnga tawe manol᷊a'a.”

¹⁷ “Apa darorongngu?” aiwal᷊on Batsyeba. I Adonia sinumimbakka, “I ya'u sumal᷊ande tadea'u Inangnga maddorongnga si Ratu Salomo tadea'u mamala'u ma'awingngi Abisag, maṛṛuala wuassu Sunem udde. I ya'u mangimanna i Salomo tawe manol᷊a'u darorongngu inangnga.”

¹⁸ “Ore, aroddite,” sasimbakki Batsyeba. “ Ia'ute maggahatton olangnge udde su ratu su pandumannu udde.”

¹⁹ Ne i Batsyeba inaite ringannu ratu ringannu pandumanna maggahatton pandumani Adonia. Ratu dirumarisikka nanal᷊oho inangnge wuṛṛu niumal᷊intudda su saruanne, ana see niuma'ianna apia su adderan araratuanne. Wua'udde i tou nandolokku taumata niapaaddon addera su samba'an aikkatanne papaianannu inangnge.

²⁰ Napawe ua'iante, nabbisarate i Batsyeba, “Inangnga mapullu maddorongnga sambau apan addio'a wuassi'o. Inangnga mangantimma i'o sarun tawe manola'a.” “Apa udde, Inangnga?” Aiwal᷊on Salomo, “I ya'u sarun tawe manol᷊a'a.”

²¹ I Batsyeba sinumbakka, “Wala'ewe i Adonia, iaangngu udde maawingngi Abisag.”

²² “Anio Inangnga maddorongnga olangnge udde si ya'u?” aiwal᷊on Salomo. “Udde nassul᷊ungngu maddorongnga tadea'u i ya'u mangonggollu araratuanna indi si tou. Wal᷊inewe i tou iaangku? See lai Imam Abyatar wuṛṛu Yoab uasamba'a si tou!”

²³ Napawe wua nabbisaran aroddi nassalute i Salomo ringannu arannu Mawu, “Wala'ewe i ya'u aṛṛioannu wawontogu Mawu, amungkangngu i ya'u tawe makkuumanni Adonia ma'oman sara pateanna ana waugu darorongnge udde!

²⁴ Mawu buatte nanohassa aianangku su adderan araratuannu iamangku, Daud. Mawu buatte nanipussu paaire-Ne wuṛṛu buatte nanonggollu araratuanna indi si ya'u wuṛṛu papapulungku. I ya'u massalu ringannu arannu Mawu apan biakka manungku i Adonia sarun mate allo indi lai!”

²⁵ Ne i Ratu Salomo nangonggollu parenta si Benaya, ana see i Benaya inate namate si Adonia.

I Abyatar niado wuassu manarane wuṛṛu i Yoab nate

²⁶ Wua'udde nabbisarate i Ratu Salomo si Imam Abyatar, “Apul᷊ete su wanuanu su Anatot. I'o ṛinone iṛṛuumanna pateanna, arawe allo indi ya'u tawe mamate si'o, ana waugu sutempo i'o ta'e suaddi'o ringannu iamangku, i'o uapendamma lai al᷊awo'u asasusane. Wuṛṛu ete i'o lai apan uataṛṛapa Wantallu Pa'airen Mawu.”

²⁷ Ana see i Salomo napaaddo Abyatar wuassu imam. Ringannu inolaanni Salomo udde apa apan buatte niwal᷊o Mawu su Silo su ola'u papalunni Imam Eli naola'e niasingkatanna.

²⁸ I Yoab naaringikka sarangkanambone apan buatte nariaddi udde. I tou mangke nata'utta ana waugu i tou uasamba'a si Adonia. Arawe, dorone i tou tawe uasamba'a si Absalom. Ne i tou tinumal᷊angnga su Rasannu Mawu wuṛṛu nangaggassa manga pentakku mezbah.

²⁹ Watti'a udde niapasingkatta si Ratu Salomo. Ne ratu nandolokki Benaya niapapate si Yoab.

³⁰ I Benaya inaite watukku Rasannu Mawu wuṛṛu nabbisara si Yoab, “Ratu nandolokka tadea'u i'o sumabbangnga wua isudde!” “Tawe,” sasimbakki Yoab. “I ya'u mapullu mate isindi.” I Benaya nabbelengnga wuṛṛu namasingkattu olangnge udde su ratu.

³¹ Naaringikka udde ratu nabbisara, “Roote wuṛṛu amata'e apa apan niwisarane udde. Patete i tou wuṛṛu labbinga'a i tou, tadea'u i ya'u wuṛṛu anambon papalunnu iamangku waggan pamamate apan niola'i Yoab su taumata apan tawe sal᷊ane.

³² Mawu sarun makkuumanni tou ana waugu pamamate apan buatte niolangnge ringannu awaganannu iamangku. I Abner tembonannu tantaran Israel, wuṛṛu i Amasa tembonannu tantaran Yehuda, itarua tawe sal᷊ane. Itarua mappianne wuassi Yoab sassane, arawe i tou namate sitarua.

³³ Ṛuumanna ana waugu apapaten darua tembonannu tantara udde sarun pasannananni Yoab wuṛṛu papapulunne saran mal᷊annu-l᷊annu. Arawe anambon papapulunnu iamangku apan naola'a ratu, sidutu sarun aal᷊amatannu Mawu – i mangitou apan naauntungnga.”

³⁴ Ne i Benaya inaite watukku Rasannu Mawu wuṛṛu namate si Yoab isudde. Ana see i Yoab nilabbinga su wal᷊ene su liuddu soa.

³⁵ Wua'udde ratu namile si Benaya naola'a tembonannu tantara pinallol᷊ossa si Yoab, wuṛṛu i Zadok nitenega na'ola'a imam pinallol᷊ossa si Abyatar.

Apapaten Simei

³⁶ Wua'udde ratu namaggo si Simei see naiwal᷊o si tou, “Pa'ola'e wal᷊enu su Yerusalem indi. Atana'e isudde wuṛṛu imbaṛṛangnga sumabbangnga wuassu soa.

³⁷ Amungkangngu i'o waṛṛani sumabbangnga wuṛṛu inai sumabbi ana'u Sal᷊ukku Kidron, i'o sarun pateanna; wuṛṛu ete i'o sassane apan mamasanna pasasal᷊a udde.”

³⁸ “Ore, Tuangnga Apan Mawantuga,” sasimbakki Simei. “I ya'u sarun tumuṛṛutta parentan Tuangnga.” Ne i Simei natana'e su Yerusalem manga pira tempo al᷊annune.

³⁹ Napawe tallute tonna nariaddite olangnge ere manansunna indi: Ruang katou allangngi Simei tinumal᷊angnga watukku Gat, ringanni Ratu Akhis ana'i Maakha. Sutempo i Simei niwal᷊oannu olangnge udde, i tou

⁴⁰ nangampakku aiananna su keledaine ana see inaite ringani Ratu Akhis su Gat maddea'a allangnge darua udde. I tou nasangkalla sitarua ana see nangapiddi tarua napul᷊e.

⁴¹ Sutempo i Salomo naaringikka apa apan buatte niola'i Simei,

⁴² i tou napawaggo su Simei ana see nabbisara, “I ya'u buatte na'ola'a si'o maddiandi ringannu arannu Mawu manungku amungkangngu i'o sumabbangnga wuassu Yerusalem. I'o sarun nate. Ne, i'o buatte naddiandi wuṛṛu niumire tumuṛṛutta parenta'u udde, are?

⁴³ Arawe orassa indi anio i'o namahia pa'airenu udde wuṛṛu i'o nilumawangnga parenta'u?

⁴⁴ I'o masingkatta atonna anambon al᷊al᷊eonu su saruanu iamangku. Ana waugu udde Mawu sarun makkumannu,

⁴⁵ arawe i ya'u sarun al᷊amatan-Ne wuṛṛu araratuannu iamangku sarun tohasan-Ne saran mal᷊annu-l᷊annu.”

⁴⁶ Napawe buatte nabbisara aroddi, ratu nangonggollu parenta si Benaya, ana see i Benaya inaite namate si Simei. Orassa indi i Salomo uataṛṛino ringannu nasuungnga sulal᷊ummu araratuanne.