1 MARARATU 19 - WUKE SUSI WATTI'U AL᷊AL᷊USASSA

I Elia su Wowon Sinai

¹ I Ratu Ahab nabbatti'a su awingnge i Izebel, sarangkanambone apan buatte niola'i Elia, wuṛṛu lai ereapa i Elia namate anambon nabin Baal.

² Ne i Izebel nangirimmu watti'a indi si Elia, “Antimanna manga monganna makkuumanna, ewe'e lai mamate si ya'u, amungkangngu tiṛṛabbi ere lai orassa indi ya'u tawe mapa'inolaanna si'o ere lai i'o na'inolaanna manga nabin Baal udde.”

³ I Elia nata'utta, ana see tinumal᷊angnga tadea'u tawe pateanna. I tou inaite ringannu mangangimbene watukku Bersyeba su Yehuda. Poiaroddi i tou nanantangngu mangangimbene udde,

⁴ ana see niumamatta watukku wadda'a lol᷊okka al᷊annune allo massallo wuṛṛu nangillol᷊o su sambau punnu alu apan masindumunna. Isudde i tou inuma'ianna wuṛṛu pendamanna i tou mappul᷊ute nate. “I ya'u tate maataṛṛangnga lai, Mawu,” wisarane su Mawu. “Alape niawa'u. I ya'u tawe mapianne wuassu al᷊amona'u!”

⁵ I tou nillumallowangnga su al᷊ungngu alu udde wuṛṛu niamatiil᷊anna. Inaṛṛombanganne sangkatou mala'ekatta nangeṛṛetta si tou wuṛṛu nabbisara, “Apu'ote Elia, ante!”

⁶ I Elia na'ellega su pal᷊iwunne, ana see niasiloanna maranin puane sampoto roti wua nitambunna wuṛṛu wensadda lal᷊oṛṛoannu ua'e. Ne i tou inumante wuṛṛu na'inumma, see nilumallowangnga apia.

⁷ Su aruane mala'ekattu Mawu nirumanta wuṛṛu nangeṛṛetta si tou wuṛṛu nabbisara, “Apu'ote, Elia, ante, tadea'u i'o wotongnge maataṛṛangnga umamatta marau.”

⁸ I Elia napu'o, ana see niumanna wuṛṛu na'inumma. Ne i tou nabbal᷊i matohassa wuṛṛu wotongnge umamatta appatu pul᷊o su allone al᷊annune watukku Wowon Sinai, tampan Duata maipasilon batangan-Ne.

⁹ Poiaroddi i Elia nanaṛṛabbi sulal᷊ummu loṛṛangnga. Ana see Mawu nabbisara si tou, “Elia, tantal᷊anna ma'ura i'o isindi?”

¹⁰ I Elia sinumimbakka, “Oh Mawu, Ruata Apan Lembontaṛṛino, i ya'u sidutu mammanara tumba'u ana waugu I'o sassane. Arawe umattu Israel nilumawangnga paairen mangitou Si'o. I mangitou nanggohakku manga mezbah-Nu wuṛṛu namate manga nabi-Nu. Ete i ya'u sassane nallambe, wuṛṛu orasa indi i mangitou maddea'a mamate si ya'u lai!”

¹¹ “Sabbangke wuassu loṛṛangnga udde,” unnu Mawu si tou, “wuṛṛu darisikke saruanna si Ya'u su puiddu wowone.” Ana see Mawu sinumabbi isudde, niṛṛoroannu anginna apan tinumiuppa ma'ikkatta atonna na'oman sara manga wuidda nawa'a wuṛṛu manga wowone watu napesangnga. Arawe Mawu tawe naipasilo sulal᷊ummu anginna udde. Napawe anginna udde nol᷊ote, nariaddite linukka, arawe sulal᷊ummu linukka udde lai Mawu tawe naipasilo.

¹² Wua'udde nirumantate putungnga, arawe Mawu lai tawe sulal᷊ummu putungnga udde. Wua'udde runia nabbal᷊i mal᷊annabba, ana see niaringikka sambau tingikka addio'a masi'ome.

¹³ Sutempo i Elia naaringikka tingikka udde, i tou nanaappa hatine ringannu jubane, see sinumabbangnga wuṛṛu dirumarisikka su moṛṛongngu loṛṛangnga udde. Ne niaringikke tingikka apan mabbisara, “Elia, tantal᷊anna ma'ura i'o isindi?”

¹⁴ I Elia sinumimbakka, “Oh Mawu, Ruata Apan Lembontaṛṛino, i ya'u sidutu mammanara ate su huna-Nu sassane. Arawe umattu Israel nilumawangnga pa'aire mangitou Si'o. I mangitou nanggohakku manga mezbah-Nu wuṛṛu namate manga nabi-Nu. Ete i ya'u sassane apan nallambe, wuṛṛu orassa indi i mangitou maddea'a mamate si ya'u!”

¹⁵ Mawu nabbisara, “Pabbelengke su wadda'a lol᷊okka maranin Damsyik! Ana see roote watukku soa wuṛṛu lal᷊ina'e lana su puan Hazael maola'a tatiala patatenege mabbal᷊i ratun Siria.

¹⁶ Pa'ola'e aroddi lai si Yehu ana'i Nimsi, tadea'u i tou maola'a ratun Israel, wuṛṛu si Elisa ana'i Safat wuassu Abel-Mehola, tadea'u i tou maola'a nabi mallolossa si'o.

¹⁷ Isai-sai apan tawe nipate Hazael, sarun pateanni Yehu, wuṛṛu i mangitou apan naatal᷊angnga wuassi Yehu sarun pateanni Elisa.

¹⁸ Arawe 7.000 su atoune su Israel sarun Ta'u iapasal᷊amatta, eteudde manga taumata apan sidutu matuṛṛutta si Ya'u wuṛṛu tawe saran paassa niumal᷊intudda massuba paal᷊uanni Baal ara'e nangari'a.”

I Elisa nipile Mawu

¹⁹ Ne i Elia inaite wuṛṛu naaratingnga si Elisa tantal᷊anna mammajeko. Pia mapul᷊o dua su parene sapi su saruanne wuṛṛu i Elisa sassane mamajeko ringannu sapi sampare apan panginguseanne. Sutempo i Elia sinumabbi maranin Elisa, i Elia nalluatta jubane wuṛṛu nisampe su wambangngi Elisa.

²⁰ Ne i Elisa nanantangngu manga sapine wuṛṛu tinumal᷊angnga nangenggenna si Elia, lapiddu nabbisara, “Wala'e i ya'u mabbal᷊o asuene hagurangku, wua'udde i ya'u tumantalongnga si Papa.” I Elia sinumimbakka, “Roote. I ya'u tawe maningaddu.”

²¹ I Elisa nabbelengnga su wawail᷊anne see naṛṛata manga sapine alun pajekone nipaanne niola'a alu putungnga ipallaha manga ṛemessu sapi udde. Wua'udde i tou nattahia manga ṛemessa udde su mallal᷊aṛṛenggene see i mangitou niumante. Wua'udde i Elisa inaite tinumantalongnga si Elia wuṛṛu naola'a masasumbalane.