1 MARARATU 18 - WUKE SUSI WATTI'U AL᷊AL᷊USASSA

I Elia wuṛṛu i Obaja

¹ Napawe manga pira tempo al᷊annune, su tonna atallune tempon mamara udde, Mawu nabbisara si Elia, “Roote saruanna si Ratu Ahab, tate mal᷊annu lai Ya'u manossokku uranna.”

² Ne i Elia inaite. Sutempo ṛutumma mangke massaddatta su Samaria.

³ Ana waugu udde i Ahab namaggo si Obaja rumanta iapasaruanna. (I Obaja uddewe uapua amonannu wal᷊en araratuanna. I tou sangkatou apan atonna-tonna mattaṛṛamawu su Mawu.

⁴ Sutempo Izebel namate manga nabin Mawu, i Obaja indi nantul᷊ungngu 100 suatoune nabi ringannu namunin mangitou sulal᷊ummu loṛṛangnga – 50 su atoune su loṛṛangnga sambau – see nangonggollu anna wuṛṛu ua'e.)

⁵ I Ahab nabbisara si Obaja, “Wette i ite mamal᷊intaddu ahewallu wanua indi wuṛṛu maddea'a al᷊imatan kua'e su sal᷊ukka. Asinungka i ite sarun maasangkalla nannal᷊o ipanal᷊amatta awal᷊o wuṛṛu bagalli ite, tadea'u i ite salaiwe tawe mamate saran sambau wuassu winatangngi ite.”

⁶ Napawe buatte nattahia wageangngu leta'a apan sarun ipal᷊intadda udde, ne i mangitou inaite. I Ahab su lal᷊anna sambau wuṛṛu i Obaja su lal᷊anna apan baine.

⁷ Su tangngan dal᷊anna i Obaja nassomban Elia. Napawe naaillal᷊a si Elia, i Obaja niumal᷊intudda nangaddatta si Elia ana see naiwal᷊o, “Atonnawe indi Iamangnga Elia?”

⁸ “Atonna, i ya'u i Elia.” “Orassa indi apul᷊ete waloa'a su ratumu manungku i ya'u isindi.”

⁹ I Obaja sinumimbakka, “Apa sal᷊a'u ma'oman sara Iamangnga mananti'u si Ahab iapapate?

¹⁰ Ringannu arannu Mawu apan biakka, Ruata apan sassubbannu Iamangnga, i ya'u mamasingkatta manungku ratu buatte nandolo'u maddea'a si Iamangnga su alawo'u tampa. Amungkangngu su sambau wanua tembonanne mabbisara manungku Iamangnga tawe poiaroddi, i Ahab maddorongnga tadea'u tembonannu wanua udde massalu manungku Iamangnga atonna tawe niasangkal᷊anna isudde.

¹¹ Wuṛṛu orassa indi Iamangnga mapullu tadea'u i ya'u inai ringanni tou wuṛṛu mabbisara manungku Iamangnga isindi?

¹² Amungkangngu i ya'u inai wua' isindi, Ghaṛṛaho Mawu asinungka sarun mangapiddu Iamangnga watukku tampa apan awaganangku! Wuṛṛu amungkangngu i ya'u mamasingkatta si Ahab manungku Iamangnga isindi, wua'udde i tou tawe naasomba Iamangnga, i tou sarun mamate si ya'u. Ṛinone Iamangnga masingkatta, i ya'u indi atonna-tonna mattaṛṛamawu su Mawu ro'en addio'a!

¹³ Apa Iamangnga taambe naaringikka manungku sutempo Izebel namate manga nabi Mawu, i ya'u namuni 100 su atoune wuassi mangitou sulal᷊ummu loṛṛangnga – 50 suatoune sulal᷊ummu sambau loṛṛangnga – wuṛṛu nangonggollu anna wuṛṛu ua'e si mangitou?

¹⁴ Orassa indi, anio Iamangnga mandolo'u inai mamasingkatta ratu manungku Iamangnga isindi? I tou sarun mamate si ya'u!”

¹⁵ I Elia sinumimbakka, “Ringannu arannu Mawu Apan Lembontaṛṛino apan a'imbeangku, i ya'u maddiandi sarun dumanta sassane sumaruanna ratu allo indi lai.”

I Elia wuṛṛu manga Nabi Baal

¹⁶ Ne i Obaja inaite namasingkatta ratu, wuṛṛu i Ahab inai lai naisasomban Elia.

¹⁷ Sutempo i Ahab naasilo si Elia, i Ahab nangintul᷊i, “Indete i tou mangangal᷊iba'ukka su Israel!”

¹⁸ “I ya'u wal᷊ine mangangal᷊iba'ukka,” sasimbakki Elia, “arawe i Tuangnga sassane. Ete i Tuangnga wuṛṛu amonanni Tuangnga apan mangngal᷊iba'ukka. Ringannu massubba manga paal᷊uanni Baal, i Tuangnga nilumawangnga manga parentan Mawu.

¹⁹ Orassa indi, parentaite anambon tumana'u Israel maisasomba'u su Wowon Karmel. Apira'a lai appatu ṛasutta liman pul᷊o nabi Baal wuṛṛu appatu ṛasutta nabi Monganni Asyera udde apan niwaeṛṛanni wo'i Izebel!”

²⁰ Ne i Ahab nangapiddu anambon tumanangnge wuṛṛu manga nabi udde watukku Wowon Karmel.

²¹ Ana see i Elia nangundanin tumana'a udde wuṛṛu nabbisara, “Ma'oman sara tingngera i yamiu sidutu naungnga uapapaddua? Amungkangngu Mawu udde Ruata, passubbate Mawu! Amungkangngu Baal udde Ruata, passubbate si Baal!” Tumana'a apan uasemodda isudde mangke mal᷊annabba.

²² Wua'udde i Elia nabbisara, “Suwallattu manga nabin Mawu tumba'u i ya'u apan nallambe, sumbali isindi pia 450 nabin Baal.

²³ Orassa indi apira'e inawarendi darua sapi esakka. Doloṛṛa'a manga nabin Baal udde manganu sambau wuṛṛu maṛṛata ana see addo'a su alu ipapputungnga. Arawe i mangitou tawe maaṛṛenggama putungnga isudde. Sapi apan sambau lai sarun ta'u saddianna aroddi lai. I ya'u sarun maṛṛata wuṛṛu manattadda see iaddo su wowon alu ipapputungnga. Arawe i ya'u lai tawe maaṛṛenggama putungnga isudde.

²⁴ Wala'e manga nabi udde umal᷊iomanna su manga monganni mangitou, wuṛṛu i ya'u lai sarun umal᷊iomanna su Mawu. Apan sumimbakka ringannu mangirimmu putungnga, ete i Tou Ruata.” Awadaalla sinumimbakka ringannu tingikka ma'ikkatta, “Aroddite!”

²⁵ Ana see unni Elia su manga nabi Baal udde, “Ana waugu yami manambo, i yamiu pamilete dorone sapi wuṛṛu panaddiate, arawe arie pakkunuttu putungnga su alune. Wua'udde aal᷊iomante su mawunu.”

²⁶ Ne i mangitou namile sambau sapi wuṛṛu nanaddiate. Wua'udde i mangitou niumal᷊iomanna si Baal wuassu marua allo naddatingngu allattune lapiddu mangngintul᷊i, “Simbakke si yami, Baal!” I mangitou ma'ola'a udde lapiddu massal᷊aingnga uapal᷊iwutta mezbah mangitou. Arawe tawe sasimbakka saran addio'a.

²⁷ Su allattune i Elia mannattakke mangngal᷊uandaga si mangitou. “Aal᷊iomante lembon maikkatta lai! I tou mawu, are? Asinungka i tou tantal᷊anna maṛṛingidda, ara'e niumuru. Wotongnge mariaddi lai i tou tantal᷊anna sinumal᷊ele! Ara'e asinungka i tou tantal᷊anna mattiilla, wuṛṛu i yamiu ṛinone mamu'o si tou!”

²⁸ Manga nabi niumal᷊iomanna lembon ma'ikatta lai. Wuṛṛu ere su inanaramanne apan a'olaanni mangitou, i mangitou mammakkitta ara'e manggarissa waddangnga ringannu hal᷊ele wuṛṛu sambeangnga ma'oman ara daṛṛa tumuro.

²⁹ Etearoddi i mangitou tawe maddo na'oman sara wawallo ere taumata niintaṛṛoannu ṛimuudda. Arawe taweddu sinumimbakka, wuṛṛu taweddu maddaringikka.

³⁰ Ana see i Elia nabbisara su awada'alla udde, “Wette pangundani!” I mangitou sarangkanambone na'ammulla uapal᷊iwutta si tou, wua'udde i tou nanattakke nangapia mezbah Mawu apan naṛṛa'a.

³¹ I tou nanganu mapul᷊o dua batu, suapan watu uaapiddu aranna suwallattu mapul᷊o dua ṛuanganna papapulunni Yakub, eteudde taumata apan buatte nionggol᷊annu Mawu aranne Israel.

³² Ringannu manga watu udde i Elia napararisikku apia mezbah tampa patataṛṛamawuanna su Mawu. Uapal᷊iwutta mezbah udde i tou na'al᷊i hote apan mal᷊oangnga na'oman sara wotongnga pantaṛṛoannu mapul᷊o l᷊ima litere ua'e.

³³ I tou nangatokku alu putungnga su wowon mezbah, ana see sapi apan sambau udde nitattaddi tou wuṛṛu niaddone su wowon anutungnga udde. Wua'udde i tou nabbisara, “Loṛṛoite appatta wensadda ringannu ua'e ma'oman sara mapene, ana see lal᷊ina a ua'e udde su sasamba wuṛṛu alune.” Napawe i mangitou buatte na'ola'a olangnge udde,

³⁴ i tou nabbisara, “Paassa lai,” ana see i mangitou na'ola'a. “Paassa lai,” unni i Elia, wuṛṛu i mangitou na'ola'a apia.

³⁵ Ne ua'e nangelekke uapal᷊iwutta mezbah udde na'oman sara hote lai nepenen ua'e.

³⁶ Sutempo nia'omante tempone mangonggollu sasamban bawallo, i Nabi Elia nangundanin mezbah udde ana see niumal᷊iomanna, “Oh Mawu, Ruata apan sassubbanni Abraham, i Ishak wuṛṛu i Yakub, papal᷊iatta'e orassa indi manungku Ete I'o Ruata su Israel, wuṛṛu i ya'u allang-Ngu. Pal᷊iatta'a'e lai manungku al᷊awo'a apan ta'u niola'a indi udde wuassu parenta-Nu.

³⁷ Simbakke, Mawu! Simbakke si ya'u tadea'u awada'alla indi masingkatta manungku I'o, oh Mawu, uddewe Ruata, wuṛṛu manungku ete I'o apan na'ola'a si mangitou mabbelengnge ringan-Nu.”

³⁸ Ana see Mawu nangirimmu putungnga wuassu langitta wuṛṛu nanoṛṛobba na'oman sara nepodda sasamba udde suaddio'a ringannu alune, manga watune wuṛṛu letangnge see nilumewa ua'e su hote udde na'oman sara nasue.

³⁹ Sutempo tumana'a naasilo olangnge udde i mangitou nadduma'a su leta'a lapiddu nabbisara, “Mawu udde Ruata! Atonna Mawu udde Ruata!”

⁴⁰ Ne i Elia nabbisarate, “Sametta manga nabin Baal udde! Arie pabbala'a saran sangkatou ma'al᷊assangnga!” Ana see manga taumata udde nanametta manga nabin Baal udde, wua'udde i Elia nangapiddi mangitou watukku Sal᷊ukku Kison wuṛṛu poiaroddi i tou namate si mangitou sarangkanambone.

Tempon paddissa nuddusee

⁴¹ Wua'udde i Elia nabbisarate si Ratu Ahab, “Orassa indi mappianne i Tuangnga inaite anna! Tawe mal᷊anna addio'a manguranna, ana waugu tingikke aaringiṛṛante.”

⁴² Ana see i Ahab inaite niumanna, wuṛṛu i Elia sinumaate su Wowon Karmel. Poiaroddi i tou niumal᷊intudda ringannu hatine su leta'a su wallattu wuune ruan ba'a.

⁴³ Su mangangimbene i tou nabbisara, “Saate su puidde wuṛṛu pa'ellege watukku tahal᷊oangnga.” Allangnga udde sinuma'a, see nabbelengnga wuṛṛu nabbisara, “I ya'u tawe naasilo manga apa.” Na'oman sara paapitu i Elia nandolokku allangnga wua suma'a see lumintukka iapa'ellega.

⁴⁴ Su appitune allangnga udde nabbelengnga wuṛṛu nabbisara, “I ya'u naasilo winabbawa addio'a ere pal᷊addu lima nirumanta wuassu tahal᷊oangnga.” Ne i Elia nabbisara su allangnge, “Roote ringanni Ratu Ahab, doloṛṛa'a i tou pasaea'a keretane wuṛṛu paapul᷊ea'a tantal᷊anna i tou taambe aurananna.”

⁴⁵ Tumba'u sangkaṛṛondapa langitta nabbal᷊i marandumma, wuṛṛu anginna ma'ikkatta tinumiuppe see uranna wahewalla nangansalle. I Ahab sinuma'e keretane see napul᷊ete watukku Yizreel.

⁴⁶ Orassa udde i Elia naasomba atatohassa wuassu Mawu. I tou nangal᷊aissa jubane ire'e wuṛṛu niwa'issa su lawassa ana see tinumal᷊angnga nalliuṛṛoro si Ahab su al᷊o'engngu lal᷊anna naddatingngu ngaran passalangannu soan Yizreel.