1 MARARATU 17 - WUKE SUSI WATTI'U AL᷊AL᷊USASSA

I Elia wuṛṛu tempon paddissa apan mapal᷊atta

¹ Pia sangkatou nabi aranne i Elia. I tou darantane wuassu Tisbe, sambau soa su wageangngu Gilead. Su allo sambau i tou nirumanta ringanni Ratu Ahab wuṛṛu nabbisara, “Ringannu arannu Mawu apan biakka, Ruata apan sassubbannu taumatan Israel wuṛṛu ta'u a'imbeanna, i ya'u mamasingkatta si Tuangnga manungku al᷊annune darua ara'e tallu tonna apan manansunna indi sarun tawe angngukka ara'e uranna saran addio'a, tabbene'e i ya'u mabbisara.”

² Wua'udde Mawu nabbisara si Elia,

³ “Tantanga'e tampa indi, roote watukku ra'i su samba'an Sal᷊ukku Yordan wuṛṛu pa'imbunite poiaroddi maranin ana'u Sal᷊ukka Kerit.

⁴ I'o wotongnge ma'inumma wuassu ana'u sal᷊ukka udde, wuṛṛu manu'a gagak sarun Ta'u irolokka mangapiddu anna si'o.”

⁵ I Elia tinumuṛṛutta parentan Mawu udde, wuṛṛu inaite watukku ana'u sal᷊ukka Kerit ana see natana'e isudde.

⁶ I tou ma'inumma su ana'u sa'l᷊ukka udde, wuṛṛu u'anna roti wuṛṛu ṛemessa apan ia'untuddu manu'a gagak suapan rua'allo wuṛṛu wawallo.

⁷ Napawe manga pira tempo al᷊annune, ana'u sal᷊ukka udde namara ana waugu tawe uranna.

I Elia wuṛṛu wawine wal᷊u su Sarfat

⁸ Wua'udde Mawu nabbisara si Elia,

⁹ “Orassa indi i'o ṛinone inai watukku soan Sarfat, maranin Sidon wuṛṛu matana'a poiaroddi. I ya'u buatte nandolokku sangkatou wawine wal᷊u poiaroddi tadea'u mangonggollu anna si'o.”

¹⁰ Ne i Elia inaite watukku Sarfat. Napawe na'omate su ngaran soa udde, i tou naasilo sangkatou wawine wal᷊u tantal᷊anna mangngammulu alun putungnga. Ana see wisaran Elia su wawine wal᷊u udde, “Inangnga, i ya'u tul᷊unga'a onggolen ua'e pa'inumanna.”

¹¹ Sutempo wawine wal᷊u udde tantal᷊anna u'amatta manganu ua'e, i Elia nabbisara, “Inangnga, apire lai addio'a roti.”

¹² Wawine wal᷊u udde sinumimbakka, “Ringannu arannu Mawu apan biakka, Ruata apan sassubannu Iamangnga, i ya'u massalu manungku i ya'u tawe roti. I ya'u tumba'u uatahuanna sangkangkumma taponna sulal᷊ummu mangko, wuṛṛu addio'a lanan zaitun sulal᷊ummu wotolla. I ya'u tantal᷊anna mangngammullu alu anutungnga ipallaha taponna addio'a udde, tadea'u i ya'u wuṛṛu ana'u wotongnge umanna. Ete udde anni ambua apan panginsueanne; wua'udde iambua ete uaṛṛaddo mate.”

¹³ “Arie passinggawanga, Inangnga!” unni Elia si tou, “Pa'ola'e anna Inangnga hunan Inangnga wuṛṛu ana'u Inangnga. Arawe pa'ola'e asuene sambau roti addio'a wuassu taponna wuṛṛu lana udde, wuṛṛu apira'e inawarendi.

¹⁴ Ana waugu Mawu, Ruata apan sassubbannu taumatan Israel, nabbisara manungku mangko udde sidutu lal᷊oṛṛoannu taponna, wuṛṛu wotolla udde sidutu lal᷊oṛṛoannu lana ma'oman sara tempone Mawu mandantan uranna su runia.”

¹⁵ Ana see inawal᷊uanna udde inaite nammanara apa apan buatte niwisaran Elia. Ne i mangitoun tallu piai saddian anna apan natimu su manga pira allo allannune.

¹⁶ Wuṛṛu ere buatte niwal᷊on Mawu si Elia, mangko udde sidutu lal᷊oṛṛoannu taponna, wuṛṛu wotolla udde sidutu lal᷊oṛṛoannu lana.

¹⁷ Manga pira tempo wua'udde ana'u wawine wal᷊u udde nirumadda'a. Mallannu massaddatta raddangnge na'oman sara i tou nate.

¹⁸ Ana see unnu wawine wal᷊u udde si Elia, “Allangngu Ruata, anio Iamangnga na'ola'a olangnge indi su saruangku? Apa Iamangnga rumanta tadea'u Ruata manaungnga rosa'u, na'oman sara ana'u rinone mate?”

¹⁹ I Elia sinumbakka, “Apira'e ana'a udde inawarendi.” Ana see i Elia nanganu ana'a esakka udde wuassu inangngene, wuṛṛu niapidda su wabbo'a ṛenkenne roso, su wabbo'a apan pinanaṛṛabbianni Elia. I Elia napal᷊allowangngu ana'a udde su tampa tatiil᷊anna,

²⁰ ana see niumal᷊iomanna ringannu tingikka ma'ikkatta, “Oh Mawu, Ruata'u, anio I'o nandantan asasilaka indi su wawine wal᷊u indi? I tou buatte nangonggollu wal᷊en panaṛṛabbianna si ya'u wuṛṛu orassa indi I'o namate anangnge!”

²¹ Wua'udde paatallu i Elia nirumarammanga su ana'a udde, lapiddu u'al᷊iomanna, “Oh Mawu, Ruata'u, sal᷊andeanna pasangngoa'awe ana'a indi!”

²² Mawu naddaringikka aal᷊iomanni Elia; ana'a udde mannattakke sussangngo wuṛṛu nabbiakke apia.

²³ Ana see i Elia sinumossokka wuassu wabbo'ane lapiddu nangapiddu ana'a udde su inangngene wuṛṛu nabbisara, “Inangnga, indete ana'u Inangnga! I tou nabbiakke apia!”

²⁴ Wawine wal᷊u udde sinumimbakka, “Orassa indi ya'u masingkatte Iamangnga uddewe allangngu Ruatta wuṛṛu wisaran Iamangnga udde atonna wuassu Mawu!”