1 MARARATU 16 - WUKE SUSI WATTI'U AL᷊AL᷊USASSA

¹ Ne Mawu nabbisarate si Nabi Yehu ana'i Hanani, wisara-Ne, “Wal᷊oa'a si Baesa tanata-U indi,

² ‘Dorone i'o tawe gunane, arawe i'o buatte Ta'u nitenega naola'a piaṛṛa'u uma-U Israel. Orassa indi i'o narosate ere lai Yerobeam wuṛṛu pangillul᷊eanne uma-U Israel narosa lai, na'oman sara naasopan asasa'u-U.

³ Ana waugu udde i Ya'u sarun mapaawul᷊inu wuṛṛu amonannu ere buatte Ta'u niola'a si Yerobeam.

⁴ Laloṛṛon amonannu apan nate su soa sarun inasannu asu, wuṛṛu i mangitou apan nate su liuddu soa sarun inasannu manu'u winalanganna.’ ”

^5-7 Tanatan Mawu si Baesa wuṛṛu amonanne udde niwal᷊on Nabi Yehu ana waugu i Baesa buatte na'ola'a al᷊al᷊eo su aellegu Mawu, i Baesa nandantan asasa'un Mawu, wal᷊ine tumba'u ana waugu i tou buatte namate anambon amonanni Yerobeam. Watti'a waine su ola'a i Baesa, nasutta awuwaṛṛanine sueten niwoṛṛetta su Wuken Watti'u Mararatun Israel. I Baesa nate see nilabbingnga su Tirza. I Ella parinsine nallal᷊ossa si tou naola'a ratu.

I Ela, ratun Israel

⁸ Su tonna ruan pul᷊o annumma pamamarentan Datu Asa su Yehuda, i Ela ana'i Baesa naola'a ratu su Israel. I tou uaparenta su Tirza dua tonna al᷊annune.

⁹ I Zimri, sangkatou tembonannu tantara apan uapiaṛṛa'u sambageanganna wuassu tantaran uasa'e kereta, nassanggal᷊oma maddea'a lumawangnga si Ela. Su allo sambau su Tirza, Ela mangke ma'inumma na'oman sara niwu'anne su wal᷊en Arza, tembonannu amonannu araratuanna.

¹⁰ Ana see i Zimri sinumutta wuṛṛu namate si Ela, wua'udde naola'e ratu nallol᷊ossa si Ela. Udde nariaddi su tonna ruan pul᷊o pitu pamamarentan Ratu Asa su Yehuda.

¹¹ Tawe nal᷊annu napawe i Zimri naola'e ratu, i tou namate anambon amonanni Ratu Baesa. Ewe'e lai anambon tuṛṛangngi Baesa apan esakka see manga hawen amonanne taweddu naal᷊assangnga.

¹² Ere buatte niwisaran Mawu si Baesa apan niwal᷊on Nabi Yehu, anambon amonanni Baesa pateanna.

¹³ I Baesa wuṛṛu i Ela, anangnge, massubba manga monganna wuṛṛu pangillul᷊eanne taumatan Israel na'ola'a rosa. Ana waugu udde, i mangitou nandantan asasa'un Mawu, Ruata apan ṛinone subbannu taumatan Israel.

¹⁴ Watti'a waine su ola'i Ela buatte niwoṛṛetta sulal᷊ummu wuke Watti'u Mararatun Ratun Israel.

I Zimri, ratun Israel

¹⁵ Sutempo ruan pul᷊o pitu pamamarentan Ratu Asa su Yehuda, i Zimri naola'a ratun Israel wuṛṛu uaparenta su Tirza al᷊annune pitu allo. Sutempo udde tantaran Israel tantal᷊anna mammangalo Gibeton, soan taumatan Filistin.

¹⁶ Sutempo i mangitou naaringikka manungku i Zimri buatte naammulla lumawangnga ratu wuṛṛu mamate, su allo udde lai su paddasananni mangitou udde, i mangitou sarangkanambone nanenegi Omri, tembonannu tantaran ma mangitou, naola'a ratun Israel.

¹⁷ Wua'udde i Omri wuṛṛu tantarane nanantangngu Gibeton ana see inaite namangalo Tirza.

¹⁸ Sutempo i Zimri naasilo manungku soa udde niaaṛṛote, i tou sinumutta sulal᷊ummu wal᷊en araratuanna wuṛṛu nanoṛṛobba wal᷊en araratuanna udde suaddio'a ringannu watanganne, ne i tou natete.

¹⁹ Udde nariaddi ana waugu i tou ma'ola'a al᷊al᷊eo su aellegu Mawu. Ere lai Ratu Yerobeam, i Zimri lai narosa su Mawu wuṛṛu pangillul᷊eanne taumatan Israel narosa lai.

²⁰ Watti'a waine su ola'i Zimri, nasutta lai ammul᷊annu aal᷊iba'ukka apan nihol᷊age, buatte niwoṛṛetta sulal᷊ummu wuke Watti'u Mararatun Ratun Israel.

I Omri, ratun Israel

²¹ Nariaddite pattatiakka sulal᷊ummu walahannu Israel ana waugu piaddu mappulu tadea'u i Tibni ana'i Ginat maola'a ratu, arawe piaddu lai mappandumma si Omri maola'a ratu.

²² Panginsueanne i mangitou apan uasamba'a si Omri na'auntungnga. I Tibni nate wuṛṛu i Omri naola'a ratu.

²³ Udde nariaddi su tonna tallun pul᷊o assa pamamarentan Ratu Asa su Yehuda. I Omri mammarenta naola'a ratu su Israel mapul᷊o dua su tonnane al᷊annune. Sulal᷊ummu annummu tonna paarorone i tou uaparenta su Tirza.

²⁴ Arawe wua'udde i tou namalli sambau wowone areggane 6.000 roitta sal᷊a'a wuassu sangkatou aranne i Semer. Ana see i tou napararisikku sambau soa su wowone udde wuṛṛu nisaggone Samaria, tumuṛṛuttu aranni Semer, tatahuannu wowone udde dorone.

²⁵ I Omri na'ola'a manga rosa apan maggewal᷊anne wuassu apan buatte niola'u manga ratu apan namarenta dorone wuassi tou.

²⁶ Ere lai i Yerobeam, i Omri narosa see pangillul᷊eanne lai taumatan Israel narosa wuṛṛu massubba monganna. Ana waugu udde i mangitou nandantan asasa'un Mawu, Ruata apan ṛinone subbannu taumatan Israel.

²⁷ Watti'a waine su ola'i Ratu Omri, wuṛṛu sarangkanambone apan buatte niolangnge buatte niwoṛṛetta sulal᷊ummu wuke Watti'u Mararatun Israel.

²⁸ Napawe i Omri nate wuṛṛu nilabbinga su Samaria, i Ahab anangnge naola'a ratu nallolossa si tou.

I Ahab, ratun Israel

²⁹ Su tonna tallun pul᷊o ual᷊u pamamarentan Ratu Asa su Yehuda, i Ahab ana'i i Omri naola'a ratu su Israel wuṛṛu uaparenta su Samaria ruan pul᷊o su tonnane al᷊annune.

³⁰ I tou na'ola'a manga rosa apan maggewal᷊anna su aellegu Mawu wuassu manga ratu dorone wuassi tou.

³¹ Tawe tumba'u mabbiakka marosa ere Ratu Yerobeam, i tou ewe'e lai na'awingngi Izebel ana'i Ratu Etbaal wuassu Sidon, wuṛṛu i tou mattaṛṛamawu si Baal.

³² I tou napapaririskku wal᷊en patataṛṛamawuanna su Samaria hunan Baal, wuṛṛu sulal᷊ummu wal᷊en patataṛṛamawuanna udde i tou na'aola'a sambau mezbah hunan monganna udde.

³³ I tou na'ola'a lai pa'al᷊uanni Monganna Asyera. I tou na'ola'a lembon manambo rosa wuassu apa apan niola'u anambon ratun Israel apan namarenta dorone wuassi tou. Ana waugu udde i tou nandantan asasa'un Mawu, Ruata apan ṛinone subbannu taumatan Israel.

³⁴ Sulal᷊ummu i Ahab uaparenta, i Hiel taumatan Betel napararisikku soa Yerikho apia. Arawe ere buatte niwisaran Mawu paarorane si Yosua ana'i Nun, i Hiel niawul᷊iannu darua anangnge: i Abiram iapa pahul᷊une nate sutempo i Hiel nangaddon rapappakku soa, wuṛṛu i Segub iapa ṛembonne nate sutempo i Hiel nangelen manga ngara pasallanganna su soa udde.