1 MARARATU 15 - WUKE SUSI WATTI'U AL᷊AL᷊USASSA

I Abiam, ratun Yehuda

¹ Su tonna apul᷊one ual᷊u pamamarentan Ratu Yerobeam su Israel, i Abiam naola'a ratun Yehuda

² wuṛṛu namarenta tallu tonna su Yerusalem. Inangngene eteudde i Maakha, ana'i Abisalom.

³ I Abiam na'ola'a manga rosa ere iamangnge. I tou tawe ringannu ahewallu naungnga matammuda su Mawu Ruatane, uapapaṛṛalan Daud, iupungnge.

⁴ Arawe, ana waugu i Ratu Daud, Ne Mawu, Ruata apan sassubbanni Daud, buatte nangonggolla si Abiam sangkatou ana'a iapalol᷊ossa si tou mamarenta su Yerusalem wuṛṛu manohassa soa udde.

⁵ Mawu na'ola'a olangnge udde ana waugu i Daud buatte nalluassa naung-Nge. I Daud tawe saran paassa tawe maddaringikka manga parentan Mawu, tumba'u su hatton Uria taumatan Het udde.

⁶ Pangalo suwallatti Rehabeam wuṛṛu Yerobeam apan nitattakka ro'en sutempo Rehabeam ta'e lai nasassukka sara tempon pamarentan Abiam.

⁷ Watti'a waine su ola'i Abiam buatte niwoṛṛetta sulal᷊ummu wuke Watti'u Mararatu Yehuda.

⁸ I Abiam natete wuṛṛu nilabbinga su Soan Daud. I Asa anangnge naola'a ratu nallol᷊ossa si tou.

I Asa, ratun Yehuda

⁹ Su tonna ruan pul᷊o pamamarentan Yerobeam su Israel, i Asa naola'a ratun Yehuda.

¹⁰ I tou namarenta appatu pul᷊o assa su tonnane al᷊annune su Yerusalem. Iupungnge wawine eteudde i Maakha, ana'i Abisalom.

¹¹ Ere lai i Daud, iupungngu al᷊amonane, i Asa maal᷊uassa naungngu Mawu.

¹² Anambon sumasandaga mammanara su manga tampa pasasubbanna monganna nilimbuaṛṛanne, wuṛṛu anambon paal᷊uanna apan niola'u manga ratu apan namarenta nalliu ṛoro wuassi tou nipappassa wuassu ahewallu wanua.

¹³ Iupungnge wawine, i Maakha, niapaaddone wuassu manarane Inangngu ratu, ana waugu i tou buatte na'ola'a paaluanna sassubbanna apan masandaga hunan Asyera, mongannu asasuwukka. I Asa napaṛṛa'a paal᷊uanna udde wuṛṛu nisoṛṛobba su Wawal᷊annu Kidron.

¹⁴ Salaiwe tawe su anambon tampa pasasubanna paal᷊uanna nihohakki Asa, arawe i tou sidutu matammuda su Mawu su al᷊o'engngu pabbiaṛṛanne.

¹⁵ Anambon wul᷊awanne wuṛṛu sal᷊a'a apan buatte nionggollu iamangnge su Mawu, niapidde watukku Wal᷊en Mawu, aroddi lai wul᷊awanna wuṛṛu sal᷊a'a, sasambane sassane.

¹⁶ Su al᷊o'engngu tempo pamamarentan Datu Asa wuassu Yehuda wuṛṛu Ratu Baesa wuassu Israel sidutu pia pangalo su wallatu ratu darua udde.

¹⁷ I Baesa namangalo Yehuda wuṛṛu nanohassa soan Rama tadea'u ipaṛṛapinga lal᷊anna sabbanganna wuṛṛu suttanna su Yehuda.

¹⁸ Ana waugu udde i Ratu Asa nanganu anambon bul᷊awanna wuṛṛu sal᷊a'a apan ta'e pia su Wal᷊en Mawu wuṛṛu wal᷊en araratuanna ana see niiringnga watukku Damsyik si Benhadad ratun Siria, ana'i Tabrimon, eteudde pulunni Hezion. Manga saranapa udde niiringnga su manga pira mammamanaran wal᷊en araratuanna, ringannu tanata manansunna indi,

¹⁹ “Wette i ite makkiinnu pagahahawe apan buatte niola'u hagurangngi ite. Suaddio'a lai ringannu udde i ya'u nangirimmu wul᷊awanna wuṛṛu sal᷊a'a maola'a aonggola, wuṛṛu mangahe si Tuangnga mamassutta pa'a'aukka ringanni Baesa ratun Israel, tadea'u i tou mamelengngu apia tantarane wuassu wageangngu leta'u.”

²⁰ I Benhadad niumire ringannu aahe udde ana see nandolokku manga tembonannu tantarane su addio'a ringannu tantaran mangitou namangalo manga soan Israel. I mangitou namaddon Iyon, Dan, Abel-Bet-Maakha wuṛṛu Kinerot maranin Rano Galilea see ahewallu wageangngu leta'i Naftali.

²¹ Napawe i Baesa naaringikka olangnge udde, i tou naddote nanohassa soan Rama. I tou inaite watukku Tirza wuṛṛu tantal᷊anna addio'a tempo tawe napapangalo.

²² Wua'udde, anambon taumata su ahewallu Yehuda tawe lambene niparentanni Ratu Asa maṛṛo'otta watu wuṛṛu alu apan nipaatti Baesa su Rama ipanohassa soa udde. Manga aola'a udde nipaatti Asa pinanohassa soa Mizpa wuṛṛu Geba, sambau soa su wageangngu leta'i Benyamin.

²³ Watti'a waine su ola'i Ratu Asa, eteudde awawaṛṛanine wuṛṛu manga soa apan nitohanne, nawoṛṛette sulal᷊ummu wuke Watti'u Mara Ratun Yehuda. Sutempo i tou timmadete i Asa uatataṛṛangnga radda'a su leddane ruam ba'a.

²⁴ I tou nate wuṛṛu nilabbinga su labbingu manga ratu su Soan Daud. I Yosafat, anangnge naola'a ratu nallol᷊ossa si tou.

I Nadab, ratun Israel

²⁵ Su tonna aruane pamamarentan Datu Asa su Yehuda, i Nadab ana'i Yerobeam naola'a ratun Israel wuṛṛu namarenta dua tonna al᷊annune.

²⁶ Ere lai iamangnge apan namarenta dorone, i tou lai na'ola'a al᷊al᷊eo su aellegu Mawu na'oman sara pangillul᷊eanne taumatan Israel na'ola'a rosa.

²⁷ I Baesa, ana'i Ahia, wuassu ruanganni Isakhar na'ammulla lumawangnga si Nadab, ana see namate si tou. Sutempo udde i Nadab wuṛṛu tantarane tantal᷊anna mammangalo soan Gibeton su wageangngu leta'u Filistin.

²⁸ Udde nariaddi sulal᷊ummu tonna atallune pamamarentan Ratu Asa su Yehuda. Etearoddi i Baesa naola'a ratun Israel nallol᷊ossa si Nadab.

²⁹ Tawe nal᷊annu napawe i Baesa naola'e ratu, i tou namate anambon amonanni Yerobeam. Uasul᷊ungngu apa apan buatte niwal᷊on Mawu su allang-Nge, i Nabi Ahia wuassu Silo, ne anambon amonanni i Yerobeam niapate, tawe saran sangkatou apan naatal᷊angnga.

³⁰ I Yerobeam narosa wuṛṛu pangillul᷊eanne taumatan Israel narosa lai. Ringannu aroddi i Yerobeam nandantan asasa'un Mawu, Ruata apan sassubbannu taumatan Israel.

³¹ Watti'a waine su ola'i Nadab buatte niwoṛṛetta sulal᷊ummu wuke Watti'u Mararatu Ratun Israel.

³² Su al᷊o'engngu tempo pamamarentan Baesa wuassu Israel, pangalo sidutu maddiadi suwallatti Baesa wuṛṛu Ratu Asa wuassu Yehuda.

I Baesa, ratun Israel

³³ Su tonna atallune pamamarentan Ratu Asa su Yehuda, i Baesa ana'i Ahia naola'a ratu su ahewallu Israel. I tou uaparenta su Tirza ruan pul᷊o appatta su tonnane al᷊annune.

³⁴ Ere lai i Ratu Yerobeam apan uaparenta dorone, Ratu Baesa lai narosa su Mawu wuṛṛu pangillul᷊eanne Taumatan Israel na'ola'a rosa lai.