1 MARARATU 13 - WUKE SUSI WATTI'U AL᷊AL᷊USASSA

¹ Sutempo udde pia sangkatou nabi su Yehuda. I tou nirolokku Mawu inai watukku Betel. Nabi udde na'omate poiaroddi sutempo i Yerobeam tantanl᷊anna uarisikka su saruannu mezbah mangngonggollu sasamba.

² Wuassu parentan Mawu nabi nabbisarate su mezbah udde, “Ei mezbah, ei mezbah! Arendi wisaran Mawu, ‘Sangkatou ana'a apan isassaggo Yosia sarun iasungkangnga sulal᷊ummu amonanni Daud. Uarandangnga si'o, ei mezbah, i tou sarun mamate manga imam apan mammanara su manga tampan patataṛṛamawuanna monganna, wuṛṛu apan lai buatte nangonggollu sasamba uarandangnga si'o. Wuṛṛu su wowonu lai i tou sarun manambunu manga duṛṛin taumata.’ ”

³ Wua'udde unnu nabi udde apia, “Mezbah indi sarun maṛṛa'a wuṛṛu awu apan uarandangnga sarun mabboso. Eteudde tatialane manungku i ya'u nirolokku Mawu.”

⁴ Sutempo i Yerobeam naaringikka manga wisara udde, i tou nanta'en nabi udde see nangintul᷊i, “Sametta taumata udde!” Arawe ta'iakki Yerobeam lapiddu nanottoga na'oman sara i tou tate maawol᷊engnga apia.

⁵ Mezbah udde inaṛṛombanganne naṛṛa'a wuṛṛu awu apan uarandangnga nabboso su leta'a, ere buatte niwisaran nabi udde wuassu parentan Mawu.

⁶ Ana see Ratu Yerobeam nabbisara nabi udde, “Tul᷊unga'a al᷊iomana'a su Mawu Ruatanu huna'u. Paddarongkeaakkan-Ne tadea'u ta'ia'u mapia!” Ne nabi udde niumal᷊iomante su Mawu, ana see napiate ta'iakku ratu.

⁷ Wua'udde ratu nabbisara su nabi udde, “Wette ante su wal᷊e'u. I ya'u sarun mangonggollu aonggola si'o.”

⁸ Nabi udde sinumimbakka, “Salaiwe i Tuangnga mangonggolla si ya'u sambageanganna wuassu araratuanni Tuangnga, i ya'u maddiri inai tumantalongnga umanna are'e ma'inumma ringanni Tuangnga.

⁹ I ya'u naasomba parenta wuasu Mawu tadea'u tawe umanna ara'e ma'inumma, wuṛṛu tawe mapul᷊e umamatta su lal᷊anna apan niamatangku sutempo i ya'u nirumanta.”

¹⁰ Etearoddi nabi udde napul᷊e niumamattu lal᷊anna waine.

Sangkatou nabi timmade su Betel

¹¹ Sutempo udde pia sangkatou nabi timmade uatana'a su Betel. Al᷊aṛṛanangnge namasingkatta si tou su ola'u nabi wuassu Yehuda udde. I mangitou nabbatti'a su ola'u apa apan niolangnge su Betel su allo udde, wuṛṛu apa apan niolangnge si Ratu Yerobeam.

¹² Ana see nabi timmade udde naiwal᷊ote, “Nabi wuassu Yehuda udde niumamattu lal᷊anna suapane sutempo i tou napul᷊e?” Ne i mangitou nanta'en dal᷊anna udde si tou.

¹³ Ana see i tou nandolokki mangitou namasen aiananna su keledaine. Wua'udde i tou sinuma'ete keledai wuṛṛu inaite

¹⁴ mangenggenna nabi wuassu Yehuda udde. I tou naaratingnga nabi udde tantal᷊anna ua'ianna su al᷊ungngu sambau alu masallakka. “Apa Tuṛṛangnga nabi wuassu Yehuda?” aiwal᷊on nabi timmade ude. “Atonna,” sasimbakku taumata udde.

¹⁵ “Wette umanna su wal᷊e'u,” unnu nabi timmade udde.

¹⁶ Arawe nabi wuassu Yehuda udde sinumimbakka, “Maddorongnga ampunga! I ya'u tawe maaitu'a aahen Papa inai watukku wal᷊en Papa. I ya'u lai tawe umanna wuṛṛu ma'inumma isindi ringanni Papa.

¹⁷ Mawu buatte namarenta si ya'u tadea'u imbaṛṛangnga umanna ara'e ma'inumma wuṛṛu tawe mapul᷊e umamattu lal᷊anna apan uasul᷊ungnga sutempo i ya'u nirumanta.”

¹⁸ Ne nabi timmade wuassu Betel udde nagawusu si tou, ringannu nabbisara, “I ya'u lai nabi ere Tuṛṛangnga. Wuassu parentan Mawu sangkatou mala'ekatta buatte nandolo'u iapasol᷊oho wuṛṛu manaru Tuṛṛangnga su wal᷊en.”

¹⁹ Ne nabi wuassu Yehuda udde tinumantalongke watukku wal᷊en nabi timmade udde wuṛṛu niumante suaddio'a ringanni tou.

²⁰ Tantal᷊anna itarua u'anna, Mawu nabbisara su nabi timmade udde,

²¹ na'oman sara i tou nanagu nabi wuassu Yehuda udde, wisarane, “Mawu nabbisara manungku Tuṛṛangnga tawe matuṛṛutta si Tou. Tuṛṛangnga tawe napaamattu apa apan niparenta-Ne su Tuṛṛangnga.

²² Tuṛṛangnga buatte nabbelengnga wuṛṛu niumanna na'inumma, sumbal᷊i Tuṛṛangnga buatte nisingadda ma'ola'a olangnge udde. Ana waugu udde Tuṛṛangnga sarun pateanna, wuṛṛu winal᷊unannu Tuṛṛangnga tawe ilabbingnga su lal᷊abbingannu amonanni Tuṛṛangnga.”

²³ Napawe itarua nuddusse inumanna, nabi timmade udde namasen aiananna su keledai nabi wuassu Yehuda udde,

²⁴ ana see nabi udde inaite. Su tangngan dal᷊anna i tou nitamboannu singa, ana see nate niwaṛṛanganne. Wua'udde winal᷊unanne uatal᷊allada su lal᷊anna, wuṛṛu keledaine uarisikka maranine. Singa udde lai uarisikka isudde.

²⁵ Manga taumata apan sinumabbi, naasilo winal᷊unanna wuṛṛu singa udde isudde. Wua'udde i mangitou inaite watukku Betel wuṛṛu namasingkattu arariadianna apan niasiloanni mangitou.

²⁶ Sutempo nabi timmade udde naaringikka olangnge udde, i tou nabbisara, “Asinungka udde nabi apan tawe naddaringikka parentan Mawu! Ana waugu udde Mawu nandolokku singa udde niapatambo wuṛṛu niapapate si tou ere buatte niwal᷊on Mawu paarorone.”

²⁷ Ana see nabi timmade udde nabbisarate su manga al᷊aṛṛanangnge, “Pasea'e aiananna su keledai'u.” Napawe uasa'ete su keledaine, i tou inaite.

²⁸ I tou naasangkalla winal᷊unannu nabi wuassu Yehuda udde ta'e uatattere su lal᷊anna ringannu keledai wuṛṛu singa maranine. Singa udde tawe tinumambo keledai udde, wuṛṛu tawe inuminassa winal᷊unanna udde.

²⁹ I tou namengketta winal᷊unanna udde wuṛṛu niluranna su keledaine, ana see niapidda nabbelengnga watukku Betel tadea'u luaianna wuṛṛu ilabbinga.

³⁰ Nabi timmade udde sassane nallabbingu winal᷊unanna udde, su lal᷊abbingannu amonanne, ana see i tou wuṛṛu manga anangnge nilumuain asuangnga udde. I mangitou mannisara: “Asusawe eteapa i'o, tuṛṛangku, uare!”

³¹ Wua'udde nabi timmade udde nabbisara su al᷊aṛṛanangnge, “Napawe i ya'u mate, labbinga'a i ya'u su labbinga indi su sandiṛṛannu nabi udde.

³² Apa apan buatte niwisarane wuassu parentan Mawu su saruannu mezbah su Betel udde wuṛṛu su saruannu anambon tampa patataṛṛamawuanna su manga soan Samaria atonna sarun matipussa.”

I Yerobeam na'ola'a al᷊al᷊eo

³³ I Ratu Yerobeam sidutu maddiri manantangngu pallal᷊agune apan dal᷊eo. Su ipallu'adda manga tampa patataṛṛamawuanna apan buatte niolangnge udde, i tou sidutu mammile imam wuassu manga amonanna wiasa. Walate isai apan mappulu, itenega mabbal᷊i imam.

³⁴ Inolaanne apan dal᷊eo udde pinangillul᷊eanne papapulunne nasilaka wuṛṛu mangke naṛṛimunsa'a.