1 KORINTUS 6 - WUKE SUSI WATTI'U AL᷊AL᷊USASSA

Mangngalaen tuṛṛangnga su mallaṛṛuungnga

¹ Anio su wallatti yamiu piaddu waṛṛani inai ringannu mallaṛṛuungnga apan wagga Ruata, inai mangalaen tuṛṛangngu apan sambau sulal᷊ummu pangangimanna, amungkangngu i tou uawawul᷊on tuṛṛangnge udde? Anio i tou tawe madorongnga al᷊aṛṛana'u Ruata manginsue hatto udde?

² Apa i yamiu wagga manungku al᷊aṛṛana'u Ruata sarun mamarikissa runia indi? Nariaddi, amungkangngu atonna i yamiu mamarikissa runia indi, apa i yamiu tawe maapanginsue manga hatton mallaṛṛuungnga apan tawe gunane?

³ Apa i yamiu wagga manungku i ite sarun mamarikissa manga mala'ekatta? Nangillembo lai su ola'u manga hatton pabbiaṛṛanna su miallo-miallo!

⁴ Napawe amungkangngu nilumapputa manga hatto ereudde, apa i yamiu mangalae su manga taumata apan tawe manarane sulal᷊ummu jamaatta?

⁵ Tumaniten maasili! Asinungka su wallatti yamiu pia sangkatou pande apan wotongnge manginsue pattatiakka su wallattu manga tuṛṛangnga apan rundussa Saṛṛani!

⁶ Arawe anio sangkatou taumatan Saṛṛani inai ringannu taumata wal᷊ine Saṛṛani mangalaen pabbawawul᷊one ringannu tuṛṛangnge Saṛṛani lai!

⁷ Arie inai maggahaton taumata apan wal᷊ine Saṛṛani; su ola'u pattatiakka su wallatti yamiu udde naola'e sambau al᷊allome si yamiu. Mappianne i yamiu woddoanna, ara'e ruggianna!

⁸ Arawe ete i yamiu sassane apan na'ola'a taumata waine ringannu tawe su ṛinone. I yamiu sassane lai mandugi taumata waine. Wuṛṛu udde niola'i yamiu su manga tuṛṛangnga apan sambau sulal᷊ummu pangngimanna.

⁹ Massingkate i yamiu manungku manga taumata apan tawe tumuṛṛutta apulun Duata, tawe maola'a al᷊aṛṛana'u Ruata? Arie aawusuanna! Manga taumata apan sussandaga, manga taumata apan massubba paal᷊uanna, apan mannalangnga wawine, apan ma'ola'a inolaanna apan maasili su sansul᷊ungnge,

¹⁰ apan manna'o, apan wal᷊iu, apan taṛṛa wu'anna, apan taṛṛa umbilangngu taumata waine, wuṛṛu taṛṛa l᷊inga taumata waine – anambon taumata ereudde, tawe maola'a al᷊aṛṛana'u Ruata.

¹¹ Siri pira su wallatti yamiu dorone pia pallal᷊agune ereudde. Arawe orassa indi yamiu niapaal᷊iatta'a waresi wuassu rosa. I yamiu naola'e pussa'a Ruata sassane. I yamiu nabelengke apia ringannu Ruata, ana waugu i yamiu mangngimanna Mawu Yesus Kristus, wuṛṛu ana waugu taṛṛinon Ghaṛṛaho wuassu Mawu Ruatan kite.

Paata'e watangannu ipamantuga Ruata

¹² Piaddu mabbisara manungku suapan taumata wotongnge ma'ola'a al᷊awo'u inolaanna. Arawe mawala si ya'u tawe sarangkanambone udde pia gunane. Nariaddi salaiwe i ya'u wotongnge ma'ola'a al᷊awo'u inolaanna, arawe i ya'u maddiri mapaawalan watangangku paparentannu al᷊awo'u inolaanna.

¹³ Piaddu lai mabbisara manungku anna tumba'u hunane su tianna, wuṛṛu tianna nissaddia pangadoannu anna. Arawe itarua udde tawe ipaattu Ruata. Wadangngu taumata tawe wotongnge ipaatta ipa'ola'a sandaga, ewe'e tumba'u hunane ipamantuga Ruata. Wuṛṛu Mawu sarun mappadul᷊i wadangnga udde.

¹⁴ Ruata suete napaawiakku Mawu Yesus wuassu papate, aroddi lai Ruata sarun mapaawiakki ite ringannu taṛṛino-Ne.

¹⁵ Manga tuṛṛangnga masingkata manungku wadangngu eteudde wageangngu wadangngi Kristus. Nariaddi wotongngewe i ya'u manganu sambau wageangngu wadangngi Kristus, see olaanna wageangngu wadangngu sangkatou wawine masandaga? Mangke tawe wotongnge!

¹⁶ Ara'e asinungka i yamiu ta'e wagga manungku taumata apan uaammulla suadio'a ringannu sangkatou masandaga, maola'a sambau ringannu taumata masandaga udde! Ana waugu sulal᷊ummu Wuke Susi uawoṛṛetta, “Itarua naola'e sambau.”

¹⁷ Arawe taumata apan napaa'aukku watanganne ringannu Mawu, Ghaṛṛahon Mawu wuṛṛu Ghaṛṛahon taumata udde naola'e sambau.

¹⁸ Pangindaute manga inolaanna sussandaga. Ana waugu anambon dosa waine apan niola'u taumata, nariaddi su liuddu wadangngu taumata udde. Arawe taumata apan sussandaga, udde mangal᷊ene ma'ola'a rosa lai su wadangnge sassane.

¹⁹ I yamiu ṛinone masingkata manungku eteudde wadangngu atatanaannu Ghaṛṛahon Duata. Ghaṛṛaho udde uatana'a sulal᷊ummi yamiu. Wuṛṛu Ghaṛṛahon Duata sassane apan nangonggolu Ghaṛṛaho udde si yamiu. Wadangngu wal᷊inewe pussaanu. Udde pussa'an Duata.

²⁰ Ruata suete namalli si yamiu wuṛṛu nasueten baekke. Ana waugu udde, paata'e wadangngu aroddi olangnge ma'oman sara Ruata wantuhanna.