1 KORINTUS 3 - WUKE SUSI WATTI'U AL᷊AL᷊USASSA

Manga mangangimben Duata

¹ Manga tuṛṛangnga, i ya'u tawe su ṛinone maggahatton kamiu ere taumata uatahuanna Ghaṛṛahon Duata. I ya'u tumba'u wotongnge maggahatton kamiu ere taumata apan ta'e mabbiakka tumuṛṛuttu apulun dunia; ere manga taumata apan ta'e ere ana'a maraddio'a sulal᷊ummu pangangimanne si Kristus.

² Dorone i ya'u tumba'u wotongnge mangonggola si yamiu pabbawiakku ana'a maradio'a, wal᷊ine pabbawiakku taumata timmaddete; ana waugu i yamiu ta'e lome su pangangimanna. Arawe orassa indi lai yamiu ta'e lome su olangnge udde,

³ ana waugu i yamiu ta'e mabbiakka tumuṛṛuttu pallal᷊agun taumata. Ana waugu amungkangngu i yamiu ta'e uasasihikka wuṛṛu uawawul᷊o sangkatou ringannu waine, wal᷊inewe udde mapaal᷊iatta'a manungku i yamiu ta'e pia pallal᷊agu manga taumata apan tawe maaillal᷊a Ruata?

⁴ Amungkangngu piaddu mabbisara, “I yami tumantalongnga si Paulus,” wuṛṛu waine lai mabbisara, “I ya'u tumantalongnga si Apolos,” wal᷊inewe udde mapaal᷊iatta'a manungku i yamiu ta'e pia pallal᷊agun taumatan dunia?

⁵ Su ṛinone isai Apolos udde? Wuṛṛu isai Paulus? I yami tumba'u mangangimbe Ruata, apan suete nangehetta si yamiu see mangngimanna si Kristus. I yami tumba'u mappaamattu manara apan nirolokku Mawu si yami sangkatou-sangkatou.

⁶ I ya'u massuanna wuṛṛu Apolos mamamokkane, arawe Ruata sassane apan mamadul᷊i sasuanna udde.

⁷ Nariaddi ahunanne eteudde Ruata, ana waugu ete i Tou mamadul᷊ine. Iapa massuanna wuṛṛu mamamokkane tawe tumaniten mahuna;

⁸ itarua uassul᷊ungnga. Sangkatou-sangkatou sarun manengkamma lal᷊antake tumuṛṛuttu inasaharanne.

⁹ Ete i yami udde manga taumata apan mammanara suadio'a manaran Duata; wuṛṛu eteudde i yamiu waillu Ruata. Manga tuṛṛangnga naola'a lai Wal᷊e Ruata.

¹⁰ Ringannu apapande apan nionggolu Ruata, i ya'u ere sangkatou taṛṛa ola'a wal᷊e buatte nangaddon rapappaku wal᷊e udde, wuṛṛu taumata waine mapararisikku wal᷊e so wowon rapappake udde. Suapan taumata ṛinone manutukka mapia-pia ereapa i tou mapararisikka su rapappake udde.

¹¹ Ana waugu Ruata sassane buatte nangaddon Yesus Kristus maola'a ere rapappaku wal᷊e udde; tawe rapappake apan waine.

¹² Piaddu mappararisikka su rapappake udde ringannu mappaattu wul᷊awanna, piaddu mappaattu sal᷊a'a, piaddu mappaattu permata, piaddu mappaattu alu, radduutta mamara ara'e laṛṛami.

¹³ Manaran sangkatou-sangkatou sarun asiloanna su tempo Kristus rumanta apia. Ana waugu su allo udde putungnga sarun manemakka manaran sangkatou-sangkatou see asiloanna. Putungnga sarun manal᷊u'atta wuṛṛu manantunnu apapian manara udde.

¹⁴ Amungkangngu wal᷊e apan niapararisikku taumata su wowon rapappake udde mal᷊annu matutungnga, taumata udde sarun manengkamma lal᷊antake.

¹⁵ Arawe amungkangngu manaran taumata udde matutungnga, i tou sarun marugi; i tou sassane sarun masal᷊amatta, arawe naal᷊ihida ere taumata apan nal᷊iu wuassu ṛenggamu putungnga.

¹⁶ Masingkatawe tuṛṛangnga manungku eteudde i yamiu Wal᷊en Duata? Wuṛṛu manungku Ghaṛṛahon Duata uatana'a sulal᷊ummi yamiu?

¹⁷ Amungkangngu pia taumata manggohakku Wal᷊en Duata, Ruata lai sarun manggohakku taumata udde. Ana waugu Wal᷊en Duata udde tumba'u hunane su Ruata sassane, wuṛṛu eteudde i yamiu Wal᷊e-Ne.

¹⁸ Imbaṛṛangnga piaddu sangkatou mamahia watanganne sassane. Amungkangngu pia taumata su wallatti yamiu mammendama watanganne pande tumuṛṛuttu aul᷊aannu runia indi, taumata udde mabbal᷊i woddo, tadea'u i tou atonna-tonna mabbal᷊i pande.

¹⁹ Ana waugu apan sassunnannu runia pande, udde awawoddo su aelleggu Ruata. Sulal᷊ummu Wuke Susi uawoṛṛetta, “Ruata mapaasal᷊a manga taumata pande sulal᷊ummu asingkati mangitou sassane.”

²⁰ Pia lai uawoṛṛetta arendi, “Mawu masingkata manungku ṛingirannu manga taumata pande uddewe ṛingiranna apan tawe gunane.”

²¹ Ana waugu udde, imbaṛṛangnga piaddu sangkatou maddalo taumata, ana waugu sarangkanambone buatte nionggola maola'a pussaanu;

²² Paulus, Apolos, Petrus, runia indi, mabbiakka wuṛṛu mate, tempo indi ara'e tempo apan sarun rumanta, sarangkanambone udde tatahuanannu.

²³ Wuṛṛu i yamiu udde tatahuanni Kristus, wuṛṛu Kristus tatahuannannu Ruata.