1 KORINTUS 2 - WUKE SUSI WATTI'U AL᷊AL᷊USASSA

Watti'u papaten Mawu Yesus su alu arussa

¹ Manga tuṛṛangnga! Su tempo i ya'u nirumanta ringanni yamiu wuṛṛu namasingkata si yamiu su ola'u pandumannu Ruata apan taambe niasingkatannu runia, i ya'u tawe mappaattu asingkattu runia indi ara'e nabbisara ringannu wisara sasal᷊o'a.

² Ana waugu i ya'u buatte naddiandi, manungku su al᷊o'engngu allo i ya'u ta'e ringanni yamiu, i ya'u tawe bisarane apa-apa, tumba'u su ola'i Yesus Kristus; ahewal᷊anne manungku i Tou buatte nate su alu arussa.

³ Su tempo i ya'u suadio'a ringanni yamiu, i ya'u lome wuṛṛu mangngindon atata'utta.

⁴ Watti'a apan ta'u niapaasingkata si yamiu tawe ta'u niwatti'a ringannu al᷊awo'u wisara apan ipammono'a tumuṛṛutta apanden taumata. I ya'u mabbatti'a udde ringannu lal᷊anna apan mappatiala manungku Ghaṛṛahon Duata uataṛṛino.

⁵ I ya'u na'ola'a aroddi, tadea'u pangangimannu si Kristus tawe pinangiananne wuassu apanden taumata, ewe'e pinangiananne wuassu taṛṛinon Duata.

Apapanden Duata

⁶ Salaiwe aroddi, su wallattu manga taumata apan wiakku pangangimanne nal᷊inte, atonna, i ya'u nabbisara su ola'u apapande. Arawe apapande indi wal᷊inewe apapanden runia, ara'e apapande manga tembonanne tempo indi, apan taṛṛinone sarun mawul᷊i.

⁷ Apapande apan ta'u iwal᷊o udde eteudde apapande wuassu Ruata. Apapande udde awaganannu runia, arawe Ruata suete nanaddia lal᷊umanna'i ite ro'en runia indi taambe niriaddi.

⁸ Tawe saran sangkatou wuassu manga tembonannu tempo indi apan masingkatu apapande udde. Ana waugu amungkangngu i mangitou masingkate, i mangitou tawe nangarussa Mawu apan mawantuga udde.

⁹ Arawe olangnge udde ere uawoṛṛetta sulal᷊ummu Wuke Susi, “Apa apan taambe saran paassa niasiloanna ara'e niaringiṛṛannu taumata, wuṛṛu tawe lai saran paassa nilumatto sulal᷊ummu ṛingiṛṛannu taumata, eteudde apan nisaddian Duata su manga taumata apan mandangngu si Tou.”

¹⁰ Arawe Ruata buatte napaal᷊iatta'a si ite sulal᷊ummu Ghaṛṛaho-Ne. Ghaṛṛahon Duata udde mammarikissa sarangkanambone, na'oman sara manga pandumannu Ruata apan uawuni.

¹¹ Ana waugu masingkatu lal᷊oṛṛo naungngu sangkatou eteudde ghaṛṛahon taumata udde sassane, are? Aroddi lai ola'u Ruata. Apan masingkattu lal᷊oṛṛo naungngu Ruata tumba'u Ghaṛṛahon Duata sassane!

¹² Wuṛṛu i ite tawe nionggol᷊annu ghaṛṛahon dunia indi, ewe'e Ghaṛṛaho wuassu Ruata, tadea'u i ite masingkattu sarangkanambone apan buatte nionggolu Ruata si ite.

¹³ Ana waugu udde amungkangngu i yami mannal᷊a'a manga inolaannu Ruata su manga taumata apan pia Ghaṛṛahon Duata, i yami maddiri mamasingkata tumuṛṛuttu apapanden taumata, ewe'e tumuṛṛuttu al᷊aṛṛa'u Ghaṛṛahon Duata.

¹⁴ Taumata apan tawe uatahuanna Ghaṛṛahon Duata, tawe maasengkama apa apan niapaal᷊iatta'u Ghaṛṛaho udde. Ana waugu su taumata udde inolaanne naola'a sambau awawoddo. Taumata udde tawe maasunna, ana waugu inolaanne udde tumba'u wotongnge ellehannu pangangimanna.

¹⁵ Taumata apan uatahuanna Ghaṛṛahon Duata wotongnge maatiala al᷊awo'u inolaanna, arawe tawe saran sangkatou wotongnge maatiala si tou.

¹⁶ Sulal᷊ummu Wuke Susi uawoṛṛetta, “Isai massingkatu ṛingiṛṛannu Mawu? wuṛṛu isai wotongnge mangal᷊aṛṛa'a si Tou?” Ete i ite apan uatahuanna ṛingiṛṛanna apan uasul᷊ungngi Kristus!