1 KORINTUS 16 - WUKE SUSI WATTI'U AL᷊AL᷊USASSA

Sasumbala su sansul᷊ungngu taumatan Saṛṛani

¹ Orassa indi su ola'u roitta apan ipassumbalan kamiu su sansul᷊ungngu taumatan Saṛṛani, ya'u mangaṛṛa'a tadea'u i yamiu ma'ola'a ere tatantiro apan ta'u nionggola su manga jamaatta su Galatia.

² Su allo paarorone suapan allo misa, ṛinone tuṛṛangnga sarangkanambone maṛṛaen roitta, sambau-sambau tumuṛṛuttu asombangi tou. Addoa'e roitta udde ma'oman sara i ya'u rumanta, tadea'u orassa udde lai tate madea'a mangammula.

³ Napawe i ya'u narantate, i ya'u sarun mandolokku manga taumata apan ipaapulun kamiu. I ya'u sarun mangonggolu surattu papasingkata, tadea'u i mangitou mangapiddu roitta sasumbala udde watukku Yerusalem.

⁴ Wuṛṛu amungkangngu aellehanna mapia manungku i ya'u lai inai ringanni mangitou, ne i ya'u sarun inai suadio'a ringanni mangitou.

Ṛiinni Paulus

⁵ I ya'u sarun mattembo si yamiu napawe i ya'u sumabbi Makedonia, ana waugu i ya'u maapulu sumabbi isudde.

⁶ Wotongnge lai ya'u matana'a tal᷊an kadio'a ringanni yamiu, asinungka al᷊annune su tempo masunge. Wua'udde i yamiu wotongnge mantul᷊ungku manassu amatangku watukku tampa manansunna.

⁷ I ya'u maddiri mattembo si yamiu amungkangngu tumba'u umotongnga tal᷊ang kadio'a. Amungkangngu Mawu mamala'u, i ya'u maapulu matana'a mal᷊annu ringanni yamiu.

⁸ Tantal᷊anna udde i ya'u sarun matana'a su soa indi, su Efesus, ma'oman sara allon Pentakosta.

⁹ Manambo allo'u isindi ipammanara manara apan pia gunane, salaiwe manambo lai taumata mannal᷊are.

¹⁰ Amungkangngu Timotius rumanta, sal᷊ohoi i tou ringannu mapia tadea'u i tou maapendama mal᷊uassa matana'a ringanni yamiu ana waugu i tou ere lai ya'u mammanara manara Mawu.

¹¹ Arie ma'oman sara piaddu mangngadio'a si tou. Sumbalaite i tou tadea'u i tou wotongnge manassu amatanne apia mattudda'u ringannu sal᷊amatta, ana waugu i ya'u uaraṛṛado rarantane suadio'a ringannu manga tuṛṛangnga waine.

¹² Su ola'u tuṛṛangngi ite Apolos, paapirate i ya'u mabal᷊o si tou tadea'u i tou su sambau ringannu tuṛṛangnga apan waine inai mattembo si yamiu. Arawe i tou taambe mangngimanna atonna manungku i tou sarun inai orassa indi. Arawe amungkangngu pia tempone, i tou sarun rumanta.

Pangudusannu suratta

¹³ Ṛinone i yamiu paatehamma wuṛṛu matohassa sulal᷊ummu pabbiaṛṛannu ere taumatan Saṛṛani. Pammanarate ringannu waṛṛani wuṛṛu paatohassa.

¹⁴ Sarangkanambone apan a'olaanni yamiu, olaawe ringannu darangngu.

¹⁵ I yamiu asinungka massingkatti Stefanus wuṛṛu amonanne; i mangitou apan paarorone naola'a taumatan Saṛṛani su Akhaya. I mangitou ringannu ahewallu naungnge mammanara tumba'u mangngimbe walahannu Ruata.

¹⁶ I ya'u maddorongnga ringannu atonna-tonna tadea'u i yamiu tumuṛṛutta papiaṛṛa'u manga taumata ereudde, wuṛṛu manga taumata waine apan mammanara suadio'a wuṛṛu mangngimbe suadio'a ringanni mangitou.

¹⁷ I ya'u mal᷊uassa su darantan Stefanus, Fortunatus wuṛṛu Akhaikus. I mangitou naola'a hahantin kamiu si ya'u.

¹⁸ I mangitou buatte nalluassa naungku, ere i mangitou nalluassa naungngu. Manga taumata ere udde ṛinone aaddatanna.

¹⁹ Manga jamaatta su Asia nannanatan tabea mangitou si yamiu. Akwila wuṛṛu Priskila wuṛṛu jamaatta apan uaammulla su wal᷊e mangitou lai napaapiddu tabean taumatan Saṛṛani apan napenen ṛintulu.

²⁰ Anambon tuṛṛangnga isindi nannanatan tabea si yamiu. Patatabeate ringannu mapia su saruannu tuṛṛangnga taumatan Saṛṛani.

²¹ I ya'u manamba lai isindi tabea'u apan niwoṛṛe'u sassane: Tabea wuassia'u, Paulus.

²² Taumata apan tawe mandangngu Mawu, wala'e i tou awontohanna! Maranatha – Mawun kami, rantate!

²³ Antimanna Mawu Yesus mangal᷊amatta si yamiu.

²⁴ Napaapiddu lai darangngu si yamiu sarangkanambone apan naaukka suadio'a ringanni Kristus Yesus. Tabea wuassi yami, Paulus