1 KORINTUS 14 - WUKE SUSI WATTI'U AL᷊AL᷊USASSA

Manga pira tatal᷊a'a su ola'u al᷊amatta wuassu Ghaṛṛahon Duata

¹ Ṛinone i yamiu madea'a suapan botongnge mandangngu manga taumata waine. Wuṛṛu padea'a lai manengkamma manga al᷊amatta apan ionggolu Ghaṛṛahon Ruata, lembonete lai apande ipamasingkatu apulun Duata su taumata.

² Taumata apan mabbisara sulal᷊ummu sasinaukka apan maaṛṛindu'a, taumata udde wal᷊inewe mabbisara su taumata; i tou mabbisara su Ruata. Tawe taumata apan maasunna wisarane, ana waugu Ghaṛṛahon Duata apan na'ola'a si tou mabbisara manga inolaana apan tumba'u asingkatannu Ruata.

³ Mawal᷊i'a, taumata apan mammasingkatu watti'a wuassu Ruata, namasingkattu watti'a udde lai su taumata; ipannohassa pangangimanni mangitou, ipangonggolu sasasa si mangitou wuṛṛu ipallimbata naungngi mangitou.

⁴ Taumata apan mabbisara sulal᷊ummu sasinaukka apan maaṛṛindu'a tumba'u mannohassa ririne sassane, arawe taumata apan mammasingkatu watti'a wuassu Ruata, mantul᷊ungngu jamaatta maola'a mapia.

⁵ Lembon apianne amungkangngu i yamiu sarangkanambone wotongnge mabbisara ringannu alawo'u sasinaukka apan maaṛṛindu'a. Arawe lembon apianne eteudde amungkangngu i yamiu wotongnge mabbatti'u manga apulun Duata. Ana waugu taumata apan mabbatti'u watti'a wuassu Ruata, maggewal᷊anna wuassu taumata apan mabbisara ringannu al᷊awo'u sasinaukka apan maaṛṛindu'a; waine lai olangnge amungkangngu taumata apan mabbisara sulal᷊ummu al᷊awo'u sasinaukka apan maaṛṛindu'a udde wotongnge manal᷊a'a apa apan iwabbisarane udde, tadea'u anambon jamaatta maasomba hessine, ara'e wuane.

⁶ Amungkangngu unnu wisara i ya'u rumanta ringanni yamiu wuṛṛu i ya'u mabbisara sulal᷊ummu sasinaukka apan maaṛṛindu'a, apa hunane udde si yamiu? Tawe gunane saran kadio'a! Waine lai olangnge amungkangu i ya'u mamassingkatu sambau pandumannu Ruata, ara'e i ya'u mannal᷊a'a su ola'u ereapa Ruata, ara'e i ya'u mapaasingkatu watti'a wuassu Ruata, ara'e i ya'u mangngaṛṛa'a.

⁷ Manga sarannapan musikka apan tawe niawane saran kadio'a ere lihidde wansi wuṛṛu kecapi, amungkangngu aantarine tawe nalanganna ringannu mapia, ereapa taumata maasingkata antari apan nannalanganne udde?

⁸ Sambau lai sasumandingnge waine: Amungkangngu trompeta walate atuntingikke, isai masasaddia mapapangalo?

⁹ Aroddi lai apapandenu mabbisara ringannu al᷊awo'u sasinaukka apan maaṛṛindu'a. Amungkangngu i'o ringannu apandenu udde mabbisara wisara apan tawe iasunna, tawe saran sangkatou lai wotongnge maasunna apa iwabbisaranu udde. Wisaranu udde sarun mawul᷊i tawe tutukke.

¹⁰ Su runia indi pia sasinaukka aroddi anambone, arawe tawe saran sambau lai wuassu manga sasinaukka udde apan tawe atappasanne.

¹¹ Arawe amungkangngu i ya'u tawe maasunna sasinaukka apan iwabbisaran taumata, ne taumata apan nappaattu sasinaukka udde, ere taumata raho sia'u; aroddi lai ya'u su saruanni tou.

¹² Su ola'i yamiu sassane, i ya'u masingkata manungku i yamiu maapulu atonna-tonna maasomba al᷊amatta wuassu Ghaṛṛahon Duata. Arawe lembon apianne, ṛinone i yamiu madea'a mappaattu apandenu mantul᷊ungngu jamaatta ana see aatambanna apiane.

¹³ Ana waugu udde taumata apan mabbisara sulal᷊ummu sasinaukka apan maaṛṛindu'a, ṛinone madorongnga wuassu Ruata tadea'u i tou onggol᷊annu lai apande ipannal᷊a'a apa apan iwabbisarane udde.

¹⁴ Ana waugu amungkangngu i ya'u umal᷊iomanna ringannu sasinaukka apan maaṛṛindu'a, ghaṛṛaho'u atonna u'al᷊iomanna, arawe ṛingiṛṛangku tawe mammanara.

¹⁵ Nariaddi, ṛinone i ya'u ma'ola'a apa? Indi apan sarun ta'u olaanna: I ya'u sarun umal᷊iomannu ghaṛṛaho'u, arawe i ya'u sarun umal᷊iomanna lai ringannu ṛingiṛṛangku. I ya'u sarun mangantari ringannu ghaṛṛaho'u, arawe i ya'u maapulu lai mangantari ringannu ṛingiṛṛangku.

¹⁶ Ana waugu amungkangngu tuṛṛangnga maadiangkamanna su Ruata tumba'u ringannu ghaṛṛahonu sassane, wuṛṛu pia taumata waine apan tawe maasunna sasinaukka maaṛṛindu'a wuassu Ghaṛṛahon Duata udde, ne taumata udde tawe maappabbisara, “I ya'u lai maapulu” su aadiangkamannu udde; ana waugu i tou wagga apa apan iwabbisaranu udde.

¹⁷ Salaiwe aal᷊iomanna aadiangkamanna su Mawu udde lembon mapia, arawe aal᷊iomannu udde mangke tawe gunane saran kadio'a su taumata waine.

¹⁸ I ya'u maadiangkamanna su Ruata ana waugu i ya'u sassane wotongnge mabbisara sulal᷊ummu al᷊awo'u sasinaukka apan maaṛṛindu'a nangillembo wuassu manga tuṛṛangnga sarangkanambone.

¹⁹ Arawe sulal᷊ummu manga ammul᷊anna ipassubba Mawu, i ya'u mappianne mappaattu liman kapadi wisara apan wotongnge asunnannu taumata wuassu mappaattu su ṛiwune wisara sulal᷊ummu sasinaukka apan maaṛṛindu'a. I ya'u mappianne maapulu aroddi, tadea'u i ya'u wotongnge mangaṛṛa'a taumata.

²⁰ Manga tuṛṛangnga! Arie paṛṛingidda ere al᷊aṛṛana'a. Sulal᷊ummu al᷊al᷊eo, ṛinone i yamiu uatatana'a ere ana'a maradio'a. Arawe sulal᷊ummu paṛṛaṛṛingidda, ṛinone i yamiu maola'a taumata apan timmaddete.

²¹ Sulal᷊ummu Wuke Susi uawoṛṛetta arendi, “Mawu nabbisara, ‘Ringannu tatal᷊oarannu manga taumata apan mabbisara ringannu sasinaukka tawe iasunna, I ya'u sarun mabbisara su walahanna indi. Wuṛṛu lai ringannu tatal᷊oarannu manga taumata raho, i ya'u sarun mabbisara su walahang-Ku; salaiwe aroddi, i mangitou maddiri maddaringikka wisara-U.’ ”

²² Nariaddi al᷊amatta ipabbisara ringannu al᷊awo'u sasinaukka apan maaṛṛindu'a eteudde maola'a tatiala su taumata apan tawe mangngimanna, wal᷊ine su taumata apan mangngimanna. Wuṛṛu al᷊amatta ipammasingkatu pandumannu Ruata su taumata eteudde tatiala su taumata apan mangngimanna, wal᷊ine su taumata apan tawe mangngimanna.

²³ Ana waugu, amungkangngu unnu wisara sulal᷊ummu ammul᷊annu jamaatta, al᷊awo'u jamaatta mabbisara sulal᷊ummu al᷊awo'u sasinaukka apan maaṛṛindu'a, wua'udde nirumanta sire pira taumata raho, ara'e manga taumata wal᷊ine Saṛṛani, taumata udde sarun massunna si yamiu sarangkanambone nabbewate!

²⁴ Arawe amungkangngu i yamiu sarangkanambone mabbatti'u watti'a wuassu Ruata, see nirumanta sangkatou apan wal᷊ine Saṛṛani ara'e sangkatou raho, ne manga inolaanna apan niapaasingkati yamiu sarangkanambone sarun mapaal᷊iatta'u manga rosan taumata udde wuṛṛu mabal᷊i maatutukka manga rosane.

²⁵ Manga inolaanna apan uawuni sulal᷊ummu naungnge sarun iapaal᷊iatta'a, na'oman sara i tou sumallungu watanganne see massubba Ruata. I tou sarun manga'u, manungku Ruata atonna tonna su pattangnganni yamiu.

Atoranna sulal᷊ummu jamaatta

²⁶ Nariaddi, manga tuṛṛangnga, apa atappasanne sarangkanambone udde? Amungkangngu yamiu maammula massubba Mawu piaddu mangngantari, piaddu mangngaṛṛa'a, piaddu lai mammasingkatu pandumannu Ruata, piaddu mabbisara sulal᷊ummu sasinaukka apan maaṛṛindu'a, wuṛṛu piaddu mannal᷊a'a apa apan iwabbisara udde. Arawe sarangkanambone udde ṛinone olaanna ipangaṛṛa'a wuṛṛu ipangngapia sarangkanambone.

²⁷ Amungkangngu piaddu mabbisara sulal᷊ummu sasinaukka apan maaṛṛindu'a, ṛinone darua ara'e mattingka nambo sire tallu ual᷊al᷊ol᷊ossa mabbisara. Wuṛṛu ṛinone piaddu mannal᷊a'a apa apan iwabbisaran taumata udde.

²⁸ Amungkangngu tawedu wotongnge mannal᷊a'a, ne manga taumata apan mabbisara sulal᷊ummu sasinaukka apan maaṛṛindu'a udde ṛinone mangillol᷊o mabbisara su ammul᷊anna udde. Wala'e i mangitou mabbisara tumba'u sulal᷊ummu naungnge su Ruata.

²⁹ Darua ara'e sire tallu apan uatahuanna watti'a wuassu Ruata ṛinone mamasingkattu watti'a udde tantal᷊anna waine maṛṛingiddu apa apan iwabbisara udde.

³⁰ Arawe unnu wisara watti'u Ruata nirumanta su sangkatou waine apan ua'ianna su ammul᷊anna udde, ne taumata apan tantal᷊anna mabbisara, ṛinone mangillol᷊o.

³¹ Ringannu atokke aroddi, manga tuṛṛangnga sarangkanambone, sangkatou ringannu sangkatou wotongnge mapaasingkatu Watti'u Ruata; tadea'u sarangkanambone wotongnge manengkamma al᷊aṛṛa'a wuṛṛu maola'a lembon mangngimanna.

³² Al᷊amatta wuassu Ghaṛṛaho ipammasingkatu watti'u Ruata wotongnge iapiaṛṛa'u taumata apan mammasingkatu watti'a udde.

³³ Ruata eteudde Mawu apan maapulu uaatokka mapia; i Tou wal᷊ine Ruata apan maapulun patatiakka. Ere lai nariaddi sulal᷊ummu anambon jamaattu Ruata,

³⁴ wawine ṛinone mal᷊annaba su tempon ammul᷊annu jamaatta. I mangitou tawe iwala mabbisara. I mangitou tawe wotongnge maola'a piaṛṛangnge; udde uasul᷊ungngu titan agama.

³⁵ Amungkangngu i mangitou maapulu maasingkata manga apa, i mangitou ṛinone maiwal᷊o awingngi mangitou su wal᷊e. Tumaniten maasili amungkangngu sangkatou wawine massinaukka sulal᷊ummu ammul᷊annu jamaatta.

³⁶ Apa wisaran Duata nirumanta wuassi yamiu? Ara'e tumba'u si yamiu sassane wisara udde niwal᷊o?

³⁷ Amungkangngu pia taumata uatahuanna al᷊amatta ipammasingkatu watti'u Ruata, ara'e i tou pia al᷊amatta waine wuassu Ghaṛṛahon Duata, taumata udde ṛinone manutukka manungku apa apan ta'u niwoṛṛetta indi eteudde darolokka wuassu Mawu.

³⁸ Arawe amungkangngu piaddu maddiri manengkamma indi, imbaṛṛangnga mappandumma si tou.

³⁹ Ana waugu udde, manga tuṛṛangnga, pattinsahadde mammasingkatu watti'u Ruata, arawe arie paningaddu taumata apan maapulu mabbisara sulal᷊ummu al᷊awo'u sasinaukka apan maaṛṛindu'a.

⁴⁰ Arawe sarangkanambone ṛinone olaanna ringannu mapia wuṛṛu uaatokka.