1 KORINTUS 13 - WUKE SUSI WATTI'U AL᷊AL᷊USASSA

Darangngu

¹ Salaiwe i ya'u wotongnge mabbisara ringannu al᷊awo'u wisaran taumata, wuṛṛu wisara mala'ekatta, arawe i ya'u tawe mandangngu taumata waine, ne manga wisara'u udde tumba'u tingikka apan matelengnga arawe tawe mangal᷊ene.

² Salaiwe i ya'u pande mabbatti'u watti'a wuassu Ruata, wuṛṛu maassunna anambon hatto apan malal᷊al᷊umma, wuṛṛu masingkatu manga al᷊awo'a wuṛṛu lembon mangngimanna Ruata na'oman sara wotongnge maaingkatu wowone, arawe i ya'u tawe mandangngu taumata waine, ne i ya'u tawe aregane saran kadio'a!

³ Salaiwe anambon darotongku, ta'u ionggola su taumata asiangnga, wuṛṛu i ya'u manantillu wadangku tutunganna, arawe i ya'u tawe mandangngu taumata waine, ne sarangkanambone udde tawe gunane saran kadio'a.

⁴ Taumata apan marangngu taumata waine, masabbare wuṛṛu naungnge mapia. I Tou tawe mapaasabangngu naungnga lal᷊eo, tawe tal᷊imoṛṛonganna, tawe mamarabunga.

⁵ I tou taumata tawe mamarabunga, taumata tawe maṛṛagissa, i tou tawe mamata'u taumata waine tumuṛṛutta apulune sassane, tawe lai mal᷊ihakka umal᷊udda, wuṛṛu tawe mangune.

⁶ Taumata apan marangngu manga taumata waine, maddirin kal᷊al᷊eo, i tou tumba'u mal᷊uassa su apapia.

⁷ I tou maṛṛaddana sumaruanna al᷊awo'u wawono'a wuṛṛu maapulu mangngimanna apan apianne wuassu al᷊awo'u taumata; sulal᷊ummu olangnge apan tumaniten susa, taumata apan mandangngu udde tawe awul᷊iannu antimma wuṛṛu masabbare maṛṛado sarangkanambone apan sarun mariaddi.

⁸ Tawe tempone, manungku taumata udde tawe maddarangngu. Orassa indi pia taumata apan masingkata mabbatti'u Watti'a wuassu Ruata, arawe i tou sarun mangillol᷊o mabbatti'u watti'a udde. Orassa indi piaddu masingkata mabbisara sulal᷊ummu al᷊awo'u sasinaukka apan maaṛṛindu'a, arawe i tou sarun mangillol᷊o mabbisara sulal᷊ummu manga sasisaukka udde. Orassa indi pia taumata apan masingkatu anambon inolaanna, arawe sal᷊immurine apa apan aasingkatanni mangitou udde sarun abbul᷊iananna.

⁹ Ana waugu asingkati ite wuṛṛu apapanden kite mabbatti'u watti'a wuassu Ruata, ta'e pia auranganne.

¹⁰ Sal᷊immurine sarun a'omanna tempone Ruata ma'ola'a sarangkanambone nasuungnga, wuṛṛu apan tawe nasuungnga udde sarun mawul᷊i.

¹¹ Su tempo i ya'u ta'e al᷊aṛṛana'a, i ya'u mabbisara ere wisaran dario'a, apendangku ere apendammu dario'a, wuṛṛu ṛingiṛṛangku ere ṛingiṛṛannu dario'a. Orassa indi ya'u timmaddete, pallal᷊agu'u ere pallal᷊agun dario'a, nirammete.

¹² Apa apan aasiloanni ite orassa indi eteudde nassul᷊ungngu lintau mal᷊abukka su saṛṛuminanna. Arawe i ite sarun maasilo ringannu matilangnga. Orassa indi ya'u ta'e waggan sarangkanambone, arawe sal᷊immurine i ya'u sarun maasingkata sarangkanambone ere lai Ruata namasingkatu sarangkanambone su ola'u riri'u.

¹³ Nariaddi, su orassa indi pia tatallu inolaanna apan sidutu a'olaanni ite: pangangimanna, pangangantimma wuṛṛu uararangngu. Ahunanne wuassu tatallu udde eteudde mandangngu taumata waine.