1 KORINTUS 11 - WUKE SUSI WATTI'U AL᷊AL᷊USASSA

¹ Pattannote pallal᷊agu'u, ere i ya'u lai mattanno pallal᷊agun Kristus.

Su ola'u mappaattu tatindungngu pua su tempo mammisa

² I ya'u maddalo si yamiu ana waugu i yamiu sidutu mannaungnga si ya'u wuṛṛu tuttuṛṛutta al᷊aṛṛa'a apan ta'u nionggola si yamiu.

³ Arawe i ya'u maapulu lai yamiu maasingkata sambau hatto, eteudde manungku apan maola'a tembonannu al᷊awo'u taumata esakka eteudde Kristus; apan maola'a tembonannu awingnge wawine eteudde awingnge esakka, wuṛṛu apan maola'a tembonanne wuassu Kristus eteudde Ruata.

⁴ Amungkangngu sangkatou esakka su tempo umal᷊iomanna ara'e su tempo mapaasingkatu watti'a wuassu Ruata su saruannu awadaalla, uapaattu tatindunga su pua, ne taumata udde mangngal᷊uandaga Kristus.

⁵ Wuṛṛu amungkangngu sangkatou wawine su tempo umal᷊iomanna ara'e su tempo mapaasingkatu watti'a wuassu Ruata su saruannu awadaalla, tawe uapaattu tatindungnga, ne wawine udde mangngadio'a awingnge apan uaparenta si tou. Udde nassul᷊ungngu ere puan wawine udde suete nilungguka.

⁶ Ana waugu amungkangngu sangkatou wawine maddiri manindunga puane, mappianne utangnge pol᷊oanna. Arawe amungkangngu sangkatou wawine pol᷊oanna puane ara'e huntinganna utangnge, ne udde sambau lal᷊obbosa si tou. Ana waugu udde mappianne i tou mappaattu tatindunga.

⁷ Esakka tawe wotongnge mappaattu tatindunga, ana waugu i tou naal᷊ihida hambarannu inolaan-Ne wuṛṛu awawantugu Ruata. Arawe wawine maola'a hambarannu awawantugu esakka,

⁸ ana waugu esakka tawe niola'a wuassu wawine, ewe'e wawine niola'a wuassu esakka.

⁹ Esakka lai tawe niola'a hunane su wawine, ewe'e wawine niola'a ana waugu hunane su esakka.

¹⁰ Ana waugu udde tadea'u mapaal᷊uassu manga mala'ekatta, sangkatou wawine ṛinone mappaattu tatindunga maola'a tatiala manungku i tou su al᷊ungngu parentan kawingnge.

¹¹ Salaiwe aroddi sulal᷊ummu i ite mabbiakka naola'a taumatan Saṛṛani, wawine tawe maawiakka sassane uatal᷊ei wuassu esakka, wuṛṛu esakka lai tawe maawiakka sassane uatal᷊ei wuassu wawine.

¹² Ana waugu salaiwe wawine paarorone niola'a wuassu esakka, arawe wua isudde esakka inasungkangnga wuassu wawine; wuṛṛu al᷊awo'u sarangkanambone darantane wuassu Ruata.

¹³ Manga tuṛṛangnga paannama sassane maṛṛingiddu hatto indi: Apa mapia sangkatou wawine u'al᷊iomanna su Ruata su saruannu awadaalla, ringannu tawe uapaattu tatindunga?

¹⁴ Wuassu asingkattu awadaalla, i yamiu buatte niaṛṛaanna manungku amungkangngu esakka utangnge mal᷊o'e, udde sambau apan tawe su ṛinone.

¹⁵ Arawe su wawine, uta'a nionggola si tou ipanaappa puane, wuṛṛu uta'a mal᷊o'e udde naola'a awawantuge.

¹⁶ Aroddi amungkangngu piaddu maapulu matatiakka su ola'u hatto indi, tumba'u sambau ta'u iwal᷊o eteudde manungku mawae i ite ara'e manga jamaattu Ruata waine, sarangkanambone tumba'u pia sambau inanaramanna udde sulal᷊ummu jamaatta, waine wua isudde tawe wotongnge.

Andeangngu Mawu

¹⁷ Su ola'u manansunna indi; ya'u tawe maddalo si yamiu. Pamamisan kamiu wal᷊ine mapaal᷊iatta'u apapia, ewe'e al᷊al᷊eo.

¹⁸ Paarorone i ya'u naaringikka, manungku sulal᷊ummu ammul᷊anni yamiu pia manga ammul᷊anna apan uatatiakka. Wuṛṛu i ya'u maṛṛangngo manungku mannamboanna watti'a udde atonna.

¹⁹ Naṛṛinote amungkangu pia patatiakka su wallatti yamiu, tadea'u sarun asiloanna isai-sai taumatan Saṛṛani tutune.

²⁰ Arawe su tempo i yamiu maammula, apa niola'i yamiu udde wal᷊inewe andeangngu Mawu.

²¹ Ana waugu su tempo u'anna i yamiu sambau-sambau uapapul᷊aṛṛo mangnganu anna sassane, na'oman sara piaddu tawe niattiuranne, arawe ingana'a waine niwu'anne.

²² Anio aroddi? Wal᷊inewe i'o pia bal᷊enu? I'o wotongnge umanna wuṛṛu ma'inumma isudde! Ara'e i'o maapulu mangal᷊uandaga jamaattu Ruata wuṛṛu mapaasilin taumata asiangnga? Apa ta'u iwisara si yamiu? Ṛinone i ya'u maddalo si yamiu? Tawe! Saran paassa tawe maddalo si yamiu.

²³ Ana waugu apan ta'u iaṛṛa'a si yamiu, udde ta'u sinengkamma wuassu Mawu sassane; manungku su ṛabbi udde su tempo Mawu Yesus, Mawun kite nilal᷊eo, i Tou nanganu roti,

²⁴ wuṛṛu napawe i Tou buatte naadiangkamanna su Ruata ana waugu roti udde, i Tou namesangnga roti ringannu lima-Ne, see nabbisara, “Ete indi wadang-Ku apan tinantilla ana waugu i yamiu. Ola'e indi sambau pananaunganna si Ya'u.”

²⁵ Aroddi lai napawe buatte inumanna, i Tou nanganu mangkon anggore see nabbisara, “Anggore indi eteudde paaire Duata apan wakku, nitohassu ṛaṛṛa-U. Suapan tempo i yamiu ma'inumma indi, olaawe indi ipannaungnga si Ya'u.”

²⁶ Atonna suapan tempo i yamiu umanna roti wuṛṛu ma'inumma anggore indi, yamiu mapaasingkatu papate Mawu ma'oman sara i Tou rumanta.

²⁷ Ana waugu udde, taumata apan u'anna rotin Mawu ara'e ma'inumma anggore wuassu Mawu ringannu tawe su ṛinone, taumata udde marosa su saruannu Mawu apan suete nanantillu wadang-Nge wuṛṛu ṛaṛṛa-Ne.

²⁸ Nariaddi, suapan taumata ṛinone mamarikissa ririne paarorone, wua'udde i tou wotongnge umanna roti wuṛṛu ma'inumma anggore udde.

²⁹ Ana waugu amungkangngu taumata umanna roti wuṛṛu ma'inumma anggore tawe mangngimanna manungku sal᷊iwangnga udde uasamputu wadangngu Mawu, taumata udde u'anna wuṛṛu ma'inumma tumba'u ipanengkamma ṛuumannu Ruata su wadangnge sassane.

³⁰ Ana waugu udde manambo wuassu wallatti yamiu apan marada'a wuṛṛu lome, wuṛṛu piaddu lai apan nate.

³¹ Arawe amungkangngu i ite mamarikissa wadangngi ite rorone, i ite tawe iṛṛuumannu Ruata.

³² Arawe amungkangngu i ite iṛṛuumannu Ruata, i Tou sarun mamuulla si ite, tadea'u tawe maṛṛuumanna suadio'a ringannu runia indi.

³³ Ana waugu udde, manga tuṛṛangku, amungkangngu i yamiu maammula see umanna su sal᷊iwangngu Mawu, i yamiu ṛinone ual᷊al᷊aṛṛado.

³⁴ Amungkangngu piaddu mal᷊unussa, i tou ṛinone umanna asuene su wal᷊e. Amungkangngu i yamiu maddaringikka al᷊aṛṛa'a indi, ammul᷊annu pamamisanu tawe mapaarantan ṛuumanna wuassu Ruata su wadangngi yamiu sassane. Su ola'u manga hatto apan waine, sarun ital᷊aa'u si yamiu, amungkangngu i ya'u rumanta isindi.