Yunus 1 - Sura Magali Nuntu Ngkatuwu

I Yona bareʼe malulu songka i m Pue 1:1-17

¹ Ri anu sandeme, i Pue mompau ri Yona, ana i Amitai.

² Ndatoʼo, “Kanjoʼumo ri kota Niniwe anu bangke setu, da mangantoʼoka tau, maka kuincanimo waʼa mpowia waʼa ntaunya anu maʼai ngkajaʼanya setu.”

³ Paikanya i Yona jamalai sambakanya mampelilimika i Pue. Siʼa malai njoʼu ri Yope, njairia siʼa momberata pai kapala apu anu da mosumomba njoʼu ri Sipanyoli. Roo nabayari saro ngkapala, meʼulaya siʼa ri kapala setu, nepa mosumomba siʼa njoʼu ri Sipanyoli, da mampalaika i Pue.

^4-5 Menaʼu i Yona ri dasari ngkapala moturu rantani lintu yore siʼa njairia. Ungka lairia, ndapapewui i mPue ngoyu marimbo ri wawo ntasi, painaka mewali balumba ndopo anu maʼai kojo marumpa kapala setu sakodi maposo. Maekamo raya waʼa ntau ri kapala setu painaka meboo-boo merapi petulungi, sambaʼa-sambaʼa seʼe meboo ri lamoanya. Ua da naka ngaʼa ngkapala, nataji ntau seʼe waʼa ulaya ngkapala setu ri tasi.

⁶ Penaʼu i anakoda ngkapala ri dasari ngkapala, narata i Yona njau lintu ngkayore. Painaka natoʼoka, “Madago kojo rayamu lintu ngkayore ri tempo kita narumpa mpepa! Io pembangu! Pekakaimo merapi tulungi ri lamoamu. Boi siʼa anu mapuru rayanya ri kita painaka bareʼe da magero kita.”

⁷ Butu mepone i Yona pai anakoda setu ri wawonya, napombetoʼoka waʼa ntau ri kapala setu, natoʼo, “Moruana kita da mantende dadu, da naka taincani isema anu masala painaka kita narumpa ngkapari seʼi!” Natende ntau seʼe dadu, tongawa toʼo i Yona anu kono.

⁸ Nepa natoʼo ntau seʼe ri Yona, “Monco kojo kasikonya puʼunya painaka kita narumpa mpari seʼi? Siko seʼi ungka ri mbeʼi? Wenu painaka siko reʼe ireʼi?”

⁹ Mesono i Yona natoʼo, “Yaku seʼi to Ibarani. Yaku manyomba ri Pue Ala anu ri suruga anu mampapewali tasi pai karatana.”

¹⁰ Nepa napau ewambeʼi palainya mampelilimika i Pue. Madonge inceʼe maʼaimo kaeka ndaya waʼa ntopotetala ri kapala setu, natoʼo ntau seʼe ri siʼa, ‘Majaʼa kojo powiamu setu!’

¹¹ Sindara setu ropo kako marimbo-rimbo, nepa meoasi tau seʼe ri siʼa, “Mewali seʼi-seʼi nunjaa da kapowia ri siko da naka manda ropo seʼi?”

¹² Mesono i Yona natoʼo, “Nditajimo yaku ri tasi, manoto da manda ropo seʼi. Maka seʼi-seʼi manoto rayaku, kayakunya puʼunya painaka ropo maʼai seʼi mamparini komi.”

¹³ Paikanya waʼa ntopotetala ri kapala setu ntongo mampari-mpari mawose kepala setu njoʼu ri wingke. Paikanya kako maʼai-ai ropo painaka bereʼe yowenya mpompari-mpari ntau seʼe.

¹⁴ Painaka meboo tau seʼe ri Pue natoʼo, “Boo Pue, merapi puru kami, da naka neʼe magero kami ua mangayali inosa ntau anu bareʼe mowia sala bara nunjaa-njaa ri kami, Boo Pue, Komi mangawianakamo nunjaa anu ndipokono.”

¹⁵ Nepa natendeka ntau seʼe i Yona ri tasi. Inceʼe painaka mandamo ropo setu.

¹⁶ Painaka maʼaimo kaeka ndaya waʼa ntopotetala ri kapala setu ri Pue. Napapesonda ntau seʼe kapala setu ri wingke, njairia napanyombaka ntau seʼe panyomba pai napareʼe ntau seʼe pojanji mpengaya-ngaya ri Pue.

¹⁷ Sindara setu ndapokau i mPue sambaʼa bau anu bangke maomo i Yona. Painaka maroo-roo i Yona ri raya ngkompo bau tatogo ndeme tatogo mbengi kasaenya.