Yosua 1 - Sura Magali Nuntu Ngkatuwu

I mPue Ala mancongka i Yosua da mancuaki tana Kanaʼa 1:1-9

¹ Karoonya mate i Musa pomokau i mPue setu, mompau i Pue ri sarungkoro i Musa inceʼemo i Yosua ana i Nuu.

² Ndatoʼo i mPue, “Pomokau-Ku i Musa matemo. Mewali seʼi-seʼi moruana siko sangkani pai pura-pura to Isaraeli ndipompatikalimo da mawote Koro Yarade da mancuakimo tana anu da Kuwaika tau seʼe.

³ Roomo Kutoʼoka i Musa, mbeʼi ntano tana anu ndilinjaki, inceʼemo roomo kuwaika siko, Yosua, sangkani pai waʼa ntauku.

⁴ Lemba ntanami da mompanimbi montepuʼu umgka ri pada bone tondo selata rata ri Buyu mongkodo Libano tondo utara. Pai ungka ri Koro Eparata tondo pebetea nasango tana nto Heti rata ri tasi ri tongo tondo kasoyoa.

⁵ Bereʼe mau sambaʼa tau anu mangkoto da manangu siko, Yosua sangkarate ngkatuwumu, maka Yaku bareʼe bali-bali mangaaweri siko ewa Kupangaaweri i Musa owi, pai bareʼe kojo sangkani da Kupalaika siko.

⁶ Mbolimo siko da maroso rayamu pai da makoje kojo, maka sikomo anu da mawawanaka banca seʼi ri da pampotundasi ntau seʼe tana anu Kujanjika tau piamonya.

⁷ Paikanya da monco-monco kojo da maroso rayamu pai da makoje. Da nujagai kojo koromu da mepoʼinaya ri pura-pura padika anu nawaika siko pomokau-Ku i Musa, neʼe boi nulewa mau sakodi, ane ewanceʼe powiamu nepa da moyowe pura-pura anu nupowia.

⁸ Bangani ncura mpadika setu neʼe bali-bali da nubasaka waʼa ntauku. Sura setu da nupeguru ri wengi pai ri eo, da naka nuwianaka pura-pura anu lau ndaʼuki ri rayanya. Ane nuwianaka pura-pura setu da gana-gana katuwumu pai da reʼe poyowenya.

⁹ Neʼe nukalingani, anu roo Kusongkaka siko da monco-monco kojo da maroso rayamu pai makoje! Neʼe boi maea rayamu bata teloo rayamu, maka Yaku i Pue Ala puemi maaweri siko ri mbeʼi ntano kanjoʼumu.”

I Yosua mamparat songka pai totoraka ri waʼa nto Isaraeli 1:10-18

¹⁰ Nasongka i Yosua waʼa ntadulako nto Isaraeli

¹¹ da naka maliliwungi pura-pura kema nto Isaraeli pai da mamparata songka seʼi, “Ndipatokamo bakumi, maka jamo togo ndeme waseʼi, komi pura-pura sangaya-ngaya da mawotemo Koro Yarade da njoʼu mampotundasi tana anu da ndawaika komi i mPue Ala puemi.”

¹² Ri lemba i Rube, lemba i Gati pai ri santila lemba i Manase, natoʼo i Yosua,

¹³ “Neʼe ndikalingani! I Musa pomokau i mPue setu roomo mantoʼoka komi, tana anu ri tondo pebetea ngKoro Yarade seʼi, ndawaikamo komi i mPue Ala puemi da ndipotumpu.

¹⁴ Mewali anami pai rongomi sangkani pai waʼa mpinatuwumi inceʼe da metaʼamo ireʼi, paikanya waʼa mpomakojemi sangaya-ngaya da njoʼu moʼiwali, tau seʼe da mesindiu mawote Koro Yarade.

¹⁵ Komi sangaya-ngaya da mampelae tau seʼe rantani naleʼo ntau seʼe mampotundasi tana anu ri tondo kasoyoa ngKoro Yarade seʼi anu ndawaika i mPue Ala puemi ri tau seʼe. Ane ndawaikamo komi i mPue kaʼuono ngkareʼe ri pura-pura to Isaraeli, nepa da maya komi mewalili ri tanami ri sambote ngKoro Yarade tondo pebetea seʼi, anu nawaikamo komi i Musa pomokau i mPue setu.”

¹⁶ Mesono to Rube, to Gati pai santila to Manase natoʼo, “Nunjaa ntano anu ndasongkaka kami sangaya-ngaya da kawianaka, pai ri mbeʼi ntano nupampokau kami sangaya-ngaya da njoʼu kami.

¹⁷ Kami da kamedonge ri siko, da ewa pedonge mami ri Musa. Mbolimo i Pue Ala Puemu da maaweri siko, ewa ndapaaweri i Musa!

¹⁸ Isema ntano anu bareʼe medonge ri songkamu bara bareʼe malulu songkamu da ndahuku mate. Pai siko da maroso rayamu pai makoje!”