YOELI 1 - Sura Magali Nuntu Ngkatuwu

Patada ri Yoeli 1:1

¹ Ewaseʼi nuntu i mPue ri Yoeli, ana i mPetueli.

Waʼa nto Isaraeli mapari rayanya maka bangani njamaanya pura nakoni ntupako 1:2-20

² Pedongekamo ee waʼa ntau tuʼa; patomatamo, pura-pura tau ri Yahuda. Bara reʼemo pewalinya anu ewanceʼi ri tempo ngkatuwumi, bara ri tempo ngkatuwu waʼa ntau piamomi?

³ Tuntuka waʼa anami nunjaa anu mewali setu; da naka tau seʼe woʼu mangantuntuka waʼa ananya. Ewanceʼe seʼe mulinya anu nepa da rata sangaya-ngaya da mangadonge woʼu tuntuka anu da mewali setu, pai da mangantuntuka woʼu waʼa mulinya.

⁴ Tupako anu sondo bareʼe ndaincani imbanya, metopa ri waʼa njamaa pai mampapurasi waʼa bangani njamaa, nunjaa anu totaʼa yabi mpangkoni ntupako anu sancuncu seʼi, napapurasi ntupako anu sancuncu woʼu

⁵ Ee waʼa ntopoyanga-yangu, pembangumo! Ee waʼa ntopanginu, ndipotumangimo! Maka anggoro anu dawoʼu roo ndarampa ungka ri ngujumu.

⁶ Gerombola ntupako mangaungku tanata; tau seʼe maroso, pai bareʼe ndaincani kasondo imbanya, ngisinya ewa kataja ngisi ncinga tina.

⁷ Tau seʼe mampapurasi puʼu anggorota, pai puʼu arata jamo tuʼanya. Waʼa wotonya pura nalepasi pelanya, painaka mabuya-buya raʼanya.

⁸ Potumangimo, ee waʼa ntau, ewa anaweʼa anu mapari rayanya anu mantangisi kamate ntengeanya anu napomawo.

⁹ Gandu pai anggoro bemoreʼe ri Banua i mPue. Painaka nakabalusimo waʼa ntadu mpanyomba anu todo mamporiokoi i Pue.

¹⁰ Waʼa njamaa seʼi-seʼi malesamo. Tana mongkabalusi; maka mpengaya-ngaya gandu puramo, makaramo wua anggoro, pai puramo lana saitu.

¹¹ Ee topojamaa, ndipokukuoumo! Ee topobonde anggoro, ndipotumangimo! Maka gandu pai jole kuku pai pura-pura bangani njamaa malesamo.

¹² Waʼa mpuʼu ngkaju anu mowua ri pada mangaumo pura-pura: puʼu anggoro, apeli, ara, koroma pai delima. Inceʼe painaka waʼa ntau sondo bareʼemo mawongko rayanya.

¹³ Ee waʼa ntadu mpanyomba anu mamporiokoi lampaʼani, porengkokamo karu pai potumangimo. Pesuamo ri raya Banua i mPue, da motumangi sambangi muntu, maka bareʼemo da reʼe anggoro mpanyomba pai gandu da ndapanyombaka ri Pue Ala puemu.

¹⁴ Songkamo waʼa ntaumu da mopuasa, pareʼemo pogombo bangke! Peboomo waʼa ntadulako pai waʼa ntau tuʼa pai pura-pura bangani Yahuda, da naka rata ri Banua i mPue Ala, da naka meboo merapi tulungi ri Sira.

¹⁵ Eo i mPue mosumo, eo anu ndapokaeka setu; tempo Sira Anu Makuasa da mampareʼe kagero.

¹⁶ Pangkoni puramo magero ri suarata Banua i mPue Ala pueta bareʼemo da reʼe podoro-doro.

¹⁷ Inii mate ri tana anu mangau-ngau, bareʼemo reʼe gandu da ndapariala, inceʼe painaka waʼa ala soa-soa painaka marua ngkabongo.

¹⁸ Waʼa mpinatuwu mengara mapari rayanya; maka bareʼemo reʼe ewo da naande. Ewanceʼe dompu bimba da yoga.

¹⁹ Yaku merapi tulungi ri Komi, boo Pue maka waʼa mpada mpongkambi puramo mangau, waʼa mpuʼu ngkaju woʼu puramo mangau, mate jamo ewa anu nasuwe apu.

²⁰ Sakopa waʼa mpinatuwu anu maila ri yopo meboo merapi tulungi ri komi. Bareʼemo naleʼo ntau seʼe mampakaʼosa karanganganya. Maka waʼa ngkoro ue puramo mangau.