Ulang 1 - Sura Magali Nuntu Ngkatuwu

Tepuʼu ncura 1:1-8

¹ Bangani ncura seʼi inceʼe totoraka anu naparata i Musa ri to Isaraeli sindara nganjau ntau seʼe ri pada bone ri Rato Yarade. Rato setu ri tondo pebetea ngKoro Yarade mosu ri kota Supi, ri oyo ngkota Parani pai waʼa ngkota: Topeli pai Laba, Hasero pai Di-Saha. (

² Ungka ri Buyu Sinai rata ri Kadesi-Baranea maliu waʼa buyu ri tana Edomi; sampuyu pai sandeme kasaenya ndapalinjaki.)

³ Ri sambaʼa eo mbuya anu kasampuyu pai sambaʼa, ri taʼu anu kaʼaopo mpuyu palai ntau seʼe ungka ri tana Masiri; i Musa mamparataka to Isaraeli pura-pura anu ndasongkaka i mPue da naparataka tau seʼe.

⁴ Inceʼe tepewali ri karoonya nanangi i Musa i Siho mokole nto Amori, anu moparenta ri kota Hesibone, pai i Ogo mokole ri Basani anu moparenta ri kota Asitaro pai Ederei.

⁵ Mewali ri tondo mpebetea Koro Yarade ri tana Moabi, njairiamo kaʼisa ngkaninya i Musa mantotoraka waʼa mpadika pai waʼa ncongka i mPue. Natoʼo i Musa,

⁶ “Sindara kita njau ri Buyu Sinai, i Pue Ala mantoʼo, ‘Ganamo kasaenya komi maroo-roo ri puʼu buyu seʼi.

⁷ Seʼi-seʼi ndirongkasimo kemami pai ndikanjoʼumo ri daera buyu mongkodo ntana nto Amori pai ri samalele ntana anu sampotenginya inceʼemo Rato Yarade, ri karia mpongku ntana pai ri yombo tondo selata pai wiwi nTasi ti Tongo. Ndikanjoʼu mampotundasi tana Kanaʼa pai Buyu mongkodo Libano rata ri koronya bangke Eparata.

⁸ Yaku, Pue anu roomo majanjika komi juku-juku tana setu ri ngkaimi i Burahima, i Saki pai i Yako pai waʼa mulinya. Mewali ndikanjoʼumo mampotundasi tana setu.’ ”

I Musa mampatongko waʼa ntopombawanaka 1:9-18

⁹ Natoʼo i Musa ri banca setu, “Sindara kita njau ri Buyu Sinai kutoʼoka komi: Tetala da mawawanaka komi manee gaga da kukoyo ngkalioku. Bareʼe da kukoto mawianaka ngkalioku, maka

¹⁰ I Pue Ala puemi anu mampakateranga-rangani imbami ewa karia betuʼe ri yangi.

¹¹ Mbolimo i Pue, Ala pue ntau piamomi da mampakaria mpaliu imbami rantani sancowu ngkani karianya, pai da mampapewali komi sambaʼa banca anu gana-gana katuwumi ewa anu ndajanjika kami.

¹² Paikanya ewambeʼi da pewalinya ane yaku ngkalioku da mangkoyo tetala mawawanaka komi seʼi da mampasilolongani katuwumi pura-pura?

¹³ Da ndipilisimo ri sambaʼa-sambaʼa lemba seʼe bara tesangkuja tuama anu loʼe, madago poʼengko ngkatuwunya, madago ponawa-nawanya da naka kupatongko tau seʼe da mawawanaka komi.

¹⁴ Perapi seʼi da ndisabe ri kadagonya.

¹⁵ Inceʼe painaka ri waʼa ntopombawanaka anu da ndapilisi setu, da reʼe tesangkuja tau anu loʼe pai gana parata ndayanya anu da kudika mawawanaka komi pai da mantadulakoni komi. Da reʼe bara tesangkuja anu da mantadulakoni sancowu tau, anu saʼe da mantadulakoni saatu tau, lima mpuyu tau pai anu sampuyu tau. Pai da kupatongko woʼu woʼu anu da mantadulakoni pampasilolongani sambaʼa-sambaʼa lemba.

¹⁶ Ri tempo setu tau seʼe da kuwaika tetala ewaseʼi: Da ndipasilolongani waʼa mposisala anu reʼe ri oyo bancami. Pobotusimi da mayoa, madago ri oyo ntau kasambaʼa-mbaʼa bancami bara ri oyo waʼa ntau mencua anu rodomo ri oyomi.

¹⁷ Pobotusi neʼe boi manee ncambali; da ndipasiwia mampeole tau. Neʼe reʼe tau anu ndipokaeka, maka pobotusi anu ndipakanoto inceʼe ungka ri Pue Ala. Ane ndipomberataka kara-kara anu manee da ndipabotusi, inceʼe da ndikeni ri yaku, da naka yaku anu da mabotusi.

¹⁸ Ri tempo setu woʼu da kutotorakaka komi nunjaa anu da ndiwianaka.”

Pampokau waʼa ntau padaso ungka Kadesi-Baranea 1:19-33

¹⁹ “Silulu pai songka i mPue Ala ri kita, palaita ungka ri Buyu Sinai pai pelinjata malempo pada bone anu bangke pai maria kapari mantagodi buyu mongkodo ri tana nto Amori. Karatata ri Kadesi-Baranea,

^20-21 kutoʼo, “Seʼi-seʼi komi ratamo ri daera buyu mongkodo nto Amori, ri tana anu ndawaika kita i mPue Ala pueta, Pue Ala pue ntau piamota. Papowawo, ri suaramu ewambeʼi kabangke ntana setu. Ndikanjoʼumo mampotundasi tana setu silulu pai songka i mPue. Neʼe boi ipu pai maeka rayami.

²² Paikanya ndidadu yaku nditoʼo, ‘Da tapokau tau padaso mampesindiuka kita da mamparesa tana setu da naka tau seʼe mantoʼoka kita jaya mpesua anu da talulu, pai ewambeʼi katedinaka waʼa ngkota anu da kanjoʼu setu.’

²³ Perapimi setu kupoʼioka, painaka kupilisi tau sampuyu pai radua sambaʼa lemba sambaʼa tau.

²⁴ Nasuaki ntau seʼe daera buyu mongkodo setu rata ri Yombo Esikoli, nepa naleleangi.

²⁵ Pewalili ntau seʼe mangkenika kita wua mpinamuya anu natima ntau seʼe ungka njairia, napetumbuka kita ewambeʼi kotaʼa ntana anu da ndawaika kita i mPue Ala setu maʼai kabokonya.

²⁶ Paikanya komi maewa songka i mPue Ala puemi, bareʼe ndipikono mencuaki tana setu.

²⁷ Monggantali komi ewaseʼi: “Kita ndajeani i mPue. Kita ndakeni mpesuwu ungka ri tana Masiri nepa ndapepombaika ri to Amori, da naka napepate ntau seʼe kita.

²⁸ Mewali nunjaa yowenya kita da njoʼu njairia? Waʼa ntau anu tapokau njoʼu padaso podo mangaekasi kita, natoʼoka kita waʼa ntau njairia bose pai meruu karosonya pai kakojenya pai kita, pai tau seʼe mampeari waʼa ngkota anu bentenya sawi ri yangi. Tau seʼe mangkita rakisasa njairia.”

²⁹ Paikanya yaku mantoʼo: Neʼe ndipokaeka waʼa ntau setu.

³⁰ I Pue Ala puemi da mawawanaka komi pai da moʼiwali mampelae komi, ewa anu ndikitamo ngkaliomi ri tana Masiri,

³¹ pai ri pada bone. Ndikita ewambeʼi ndapamponinika i mPue komi sangkasae pai sangkarate mpelinjami rantani rata ireʼi. Bareʼe sala ewa sambaʼa papa anu mauba ananya.

³² Paikanya mau ewanceʼe pantoʼoku, komi bareʼepa ndiaya i Pue Ala puemi,

³³ anu melinja ri suarami mampepalika komi da kareʼe mpokemami. Sira anu mantujuka komi jaya ri wengi pai nono apu, pai ri ndeme pai nono limu.”

I Pue mahuku to Isaraeli 1:34-45

³⁴ “Ndadonge i mPue ponggantalimi painaka marau raya-A. Montandokoro sira ndatoʼo,

³⁵ ‘Bareʼe da reʼe mau sambaʼa tau anu majaʼa tuwu salapi seʼi anu da mesua ri tana anu maboko anu kujanjika tau piamomi.

³⁶ Podo i Kalebi ana i Yepune anu da mesua, maka siʼa todo peayanya ri yaku. Tila i ngKalebi pai mulinya da Kuwaika tana anu roo naleleangi setu.’

³⁷ Komi woʼu da mampapopuʼu karau ndaya i mPue ri yaku pai ndapantoʼo, ‘Musa, siko woʼu bareʼe da mesua ri tana setu.

³⁸ Paikanya pakarosomo raya ntaumu i Yosua ana i Nuu. Maka siʼamo anu da mawawanaka to Isaraeli mangarampa tana setu.’

³⁹ Nepa ndatoʼo i mPue ri kita pura-pura, ‘Waʼa anamu anu ntongo kodi-kodipa anu bareʼepa naincani mampaposisala anu madago pai anu majaʼa, waʼa ananggodi anu nditoʼo da narampa waʼa iwali, ri tau seʼemo da kupawai tana setu, pai tau seʼe anu da mampotundasi.

⁴⁰ Paikanya komi, ndipewalili njoʼu ripada bone maliu jaya anu da njoʼu ri Suo nTasi Akaba.’

⁴¹ Mesono komi nditoʼo, ‘Musa, kani mampowiamo salaa ri Pue. Paikanya seʼi-seʼi kami da njoʼu moʼiwali malulu songka i mPue, Pue Ala pueta.’ Inceʼe painaka sambaʼa-sambaʼa komi mompatikali da moʼiwali, maka ndisarumaka podo saru-saru da mancuaki daera buyu mongkodo setu.

⁴² Paikanya ndatoʼo i mPue ri yaku, ‘Neʼe nupapaliuka tau seʼe da moʼiwali, maka yaku bareʼe da mayunuki tau seʼe, tau seʼe da nanangi iwalinya.’

⁴³ Yaku mamparataka komi nunjaa anu ndatoʼo i mPue, paikanya bareʼe ndiaya. Komi maewa songka i mPue, pai ri pobangke-bangkemi ndeku komi ri daera buyu mongkodo setu.

⁴⁴ Inceʼe painaka to Amori anu mampeari daera buyu mongkodo setu mesuwu maewa komi. Karia ntau seʼe ewa kakantompu-ntompu uani. Naduduki ntau seʼe komi rata ri Horoma, nepa nanangi komi ri daera buyu mongkodo Edomi.

⁴⁵ Ungka lairia, mewalili komi, meboo komi merapi tulungi ri Pue, paikanya bareʼe ndapedongeka pai bareʼe ndalinga komi.”

Sangkasae ri pada bone 1:46–2:25

⁴⁶ “Roo setu masae kojo karoo-roota ri pada bone.