TADUMPANYOMBA 1 - Sura Magali Nuntu Ngkatuwu

Panyomba anu ndaʼombasi 1:1-17

¹ Ungka ri raya ngKema-A i Pue mampeboo i Musa, nepa ndawaika siʼa waʼa ncongka,

² anu sangaya-ngaya da nalulu nto Isaraeli. Ane reʼe sambaʼa tau anu da mampanyombaka pinatuwu anu da ndaʼombasi tila i mPue, maya napanyombaka japi, bimba bara mbulanya.

³ Ane anu napanyombaka setu sambaʼa japi, pinatuwu setu sangaya-ngaya da anu laki pai bereʼe posarinya mau sakodi. Japi setu da nanoʼo ri suara dampo ngKema i mPue, da naka ndapokapuru i mPue tau setu.

⁴ Tumpu japi setu madika palenya ri wawo mboʼo mpinatuwu setu; maka ane ewanceʼe, panyombanya setu da ndatarima i mPue mewali petondoni kabareʼenya ndakitanaka salaanya.

⁵ Ungkalairia japi setu da ndasambale ri suara dampo ngKema. Daanya sangaya-ngaya da napanyombaka waʼa ntadu mpanyomba muli i Haruni ri Pue, nepa nawebusika ri aopo nculapa sudipi lampaʼani ri suara dampo wombo ngKema.

⁶ Nepa da nasisi ntau setu pela mpinatuwu setu nepa nasampa.

⁷ Waʼa ntadu mpanyomba sangaya-ngaya da mampatuwu apu ri wawo lampaʼani, pai da malango kaju apu ri wawonya.

⁸ Pinatuwu anu roo ndasampa setu, tesua woʼonya pai lorinya da ndadika ri apu.

⁹ Paʼa pai wayaa ngkomponya da nawusoʼi ntumpunya, pai tadu mapnyomba anu motetala njairia, inceʼe anu da mangaʼombasi pura-pura. Wau mpanyomba anu ndaʼombasi setu mampakawongko raya i mPue.

¹⁰ Ane anu ndapanyombaka setu sambaʼa bimba bara mbula, pinatuwu setu sangaya-ngaya da anu laki pai bereʼe posarinya.

¹¹ Tau setu sangaya-ngaya da mancambale pinatuwu setu ri tondo utara lampaʼani, nepa waʼa ntadu mpanyomba dan mampowebuka daanya ri aopo nculapa sudipi lampaʼani.

¹² Karoonya ndasampa pinatuwu setu, pura-puranya tesua woʼu pai lorinya da naʼombasi i ntadu mpanyomba ri apu ri wawo lampaʼani setu.

¹³ Tau setu sangaya-ngaya da mawusoʼi wayaa ngkompo mpinatuwu setu sangkani pai paʼanya. Roo setu pura-pura da napanyombaka i ntadu mpanyomba da naʼombasi ri wawo lampaʼani. Wau mpanyomba anu ndaʼombasi setu mampakawongko raya i mPue.

¹⁴ Ane anu ndapanyombaka setu sambaʼa tonci, tonci setu sangaya-ngaya da tokuku bara putiʼa anu mangurapa.

¹⁵ I tadumpanyomba anu sangaya-ngaya da mangkeni tonci setu ri lampaʼani, nepa nakaule leʼenya, nepa natunju woʼonya ri wawo lampaʼani.Daa ntonci setu sangaya-ngaya da ndapurisiki ri apa lampaʼani.

¹⁶ Sowonya pai wayaa ngkomponya sangaya-ngaya da ndayali nepa ndatajika ri tondo pebetea lampaʼani ri kareʼe mpantaji awu.

¹⁷ Roo inceʼe, tonci setu da ndasempa ri puʼu mpaninya, paikanya neʼe mabutu. Nepa ndaʼombasi tonci setu riwawo lampaʼani. Wau mpanyomba anu ndaʼombasi setu mampakawongko raya i mPue.