SETERI 1 - Sura Magali Nuntu Ngkatuwu

I Datu weʼa Wasati maewa songka i Datu Ahasiwero 1:1-22

^1-2 Kota Susani njairia potunda i Ahasiwero datu nto Parisia moparenta. Ri ara mparentanya reʼe 127 poropinci, ungka ri India rata ri Sudani.

³ Ri taʼu anu katatogo poparenta i Datu Ahasiwero napareʼe sambaʼa posusa bangke tila waʼa ntau anu bangke lantinya pai waʼa mpegawainya. Waʼa ntadulako bangke ncurodado nto Parisia pai Media maʼi woʼu ri posusa setu, ewanceʼe seʼe waʼa petoro pai waʼa ntau anu bangke lantinya ri poropinci.

⁴ Aono mbuya kasaenya i datu mampetujuka kakoreʼenya ri raya langkanaenya pai mampatongawa peawa pai kabangke ngkamokolenya.

⁵ Roo setu napowia woʼu i datu posusa tila waʼa ntau sondo ri kota Susani, tau koreʼe tau kaasi-asi pura-pura mesua ri posusa setu. Saminggu muntu posusa setu, ndapowia ri soma langkanae i datu.

⁶ Soma langkanae ndaramba-rambanika ayapa lena anu maʼalusu anu mayawuyu pai mabuya, ndatakaka wayaa lena anu maʼalusu nepa poncaraʼunya inceʼe toga salaka anu ndapataka ri waʼa nono watu mangkido. Ri aranya ndapadika waʼa bangku wuyawa pai salaka ri joia anu ndaramba-rambanika watu makilaya anu mabuya, paramata anu mawaa, pela mutiara anu makilaya pai watu paramata anu mayawuyu.

⁷ Napatoka i datu anggoro anu maʼai ngkadagonya anu ndapapanginuka waʼa ntau ri tabo mpanginu wuyawa anu mpengaya-ngaya taʼanya.

⁸ Waʼa linggona bareʼe ndapeʼungkawika panginunya pai bareʼe woʼu ndariso manginu. Songka i Datu ri waʼa ntoporioko langkanae da naka pura-pura linggona ndaporiokoi malulu pepokononya sambaʼa-sambaʼa seʼe.

⁹ Sindara setu i Wasati datu weʼa, mampareʼe woʼu posusa tila waʼa mbeʼa ri langkanae.

¹⁰ Ri eo anu kapapitu, i datu manginu-nginu rantani mawongko kojo rayanya. Inceʼe painaka napeboo tau papitu waʼa ntau anu ndapatani podo da mamporiokoi sira; waʼa ntau setu inceʼemo: i Mehuma, i Bisita, i Harabona, i Bigita, i Abagita, i Setari pai i Karikasi.

¹¹ Ndapokau tau seʼe da mangkeni i Datu Weʼa Wasati ri suaranya, da morengko mpodago pai da mampataka makota ngkamokole. I Datu Weʼa setu lawi madolidi kojo inceʼe painaka da napetujuka ri waʼa ngkabosenya pai waʼa linggonanya.

¹² Paikanya butu naparata waʼa ntoporioko songka ri Datu setu ri Datu Weʼa Wasati, bareʼe napokono datu weʼa setu njoʼu. Inceʼe painaka maʼai kojo kasengke ndaya i Datu.

¹³ Lawi napobiasamo i datu da mamperapi parata ndaya ri waʼa ntau loʼe kono songka pai ada. Inceʼe painaka napekitima waʼa ntopontotorakanya anu da maincani nunjaa anu da ndapowia ane reʼe kara-kara anu ewanceʼe taʼanya.

¹⁴ Waʼa ntopontotorakanya anu biasa napeboo setu inceʼemo: i Karasena, i Setari, i Adimata, i Tarasisi, i Meresi, i Marasena pai i Mamukana. Tau seʼe setu waʼa ntau bangke lantinya ri poparenta.

¹⁵ Natoʼo i datu ri tau papitu setu, “Roo kupokau waʼa ntoporiokoku ri Datu Weʼa Wasati, mantoʼoka siʼa da maʼi ri yaku, paikanya bareʼe napokono. Malulu unda-unda, nunjaa anu sangaya-ngaya da ndapakonoka siʼa setu?”

¹⁶ Ungka lairia mompau i Memukana ri Datu pai waʼa ntau bangke setu, natoʼo, “Powia i Datu Weʼa Wasati setu, banya podo komi Datu anu napetikodi, paikanya pura-pura pegawaimi Datu, sangkani pai pura-pura tuama ri ara mpoparentami seʼi napetikodi!

¹⁷ Maka powia i datu weʼa setu da tedonge ri waʼa mbeʼa pura-pura, painaka tau seʼe woʼu bareʼemo da medonge ri langkainya sambaʼa-sambaʼa seʼe. Maka da natoʼo ntau seʼe, sako i Datu mancongka ri datu weʼa Wasati da maʼi ri suara i datu, paikanya bareʼe napokono maʼi.

¹⁸ Mewali, ane nadonge waʼa rongo ntau bangke ri Parisia pai Media anu mewali setu, manoto da napantoʼoka langkainya sambaʼa-sambaʼa seʼe. Inceʼe painaka waʼa rongo da maewamo songka langkainya pai langkainya da mampokaraumo rongonya.

¹⁹ Inceʼe painaka kaperapi ri komi Datu, da ndipareʼemo botusi kono i Datu Weʼa Wasati setu bareʼemo maya mancuara i Datu. Botusi setu da mewali sambaʼa unda-unda Parisia pai Media, mewali bareʼemo maya da ndawalisaka. Roo setu palancanga i Datu Weʼa Wasati da ndiwaika weʼa ntaninya anu meruu kagadonya pai siʼa.

²⁰ Ane tebaanakamo botusimi setu Datu ri sambawo ntana mpoparentami anu bangke seʼi, pura-pura rongo da mantubunaka langkainya, madago tau koreʼe bara tau kaasi-asi.”

²¹ Parata ndaya i Memukana setu nasintuwunaka i datu pai waʼa ntau bangke setu, liu-liu nawianaka i datu.

²² Napakatu sura ri pura-pura poropinci anu ri ara mparentanya, ri basa pai hurupu anu ndapake ri poropinci setu. Songka setu ewaseʼi katetoʼonya: ri pura-pura sombori, i langkai anu mewali tadulako ncombori pai inceʼe anu mampakanoto pura-pura songka.