RUTI 1 - Sura Magali Nuntu Ngkatuwu

I Elimele pai somborinya melimba ri tana Moabi 1:1-5

^1-2 I owi ri kabareʼepanya reʼe mokole nto Isaraeli, tana Kanaʼa narumpa oro bangke. Ri tempo setu reʼe sambaʼa tuama i Elimele toʼonya. Siʼa ungka ri tina nto Eparata, maroo-roo ri Beteleme ri lemba nto Yahuda. Ua kareʼenya oro bangke setu, siʼa pai rongonya i Naʼomi pai ananya radua melimba ri tana nto Moabi. Anamya tuama setu sambaʼa i Maholoni sambaʼa woʼu i Kilioni toʼonya. Jela tau seʼe ri tana Moabi maroo-roo njairia. Ntongo ngkaroo-roo ntau seʼe ri tana Moabi

³ matemo i Elimele, painaka i Naʼomi jamo maroo-roo pai ananya radua setu.

⁴ Ananya radua setu mamporongo anaweʼa nto Moabi, sambaʼa mampotoʼo i Oropa sambaʼa woʼu mampotoʼo i Ruti. Pusa sampuyu ntaʼu,

⁵ matemo woʼu ana i Naʼomi da mampatuwu siʼa, maka langkainya pai waʼa ananya puramo mate.

I Naʼomi pai Ruti mewalili ri Beteleme 1:6-22

⁶ Bareʼe masae ungka njairia nadonge i Naʼomi bambari, to Isaraeli ndadoncomo i mPue maka madagomo powua mpaenya. Inceʼe painaka i Naʼomi pai manianya radua mompatikali da mampalaika tana Moabi.

⁷ Tau seʼe malai sangkani-ngkani da mewalili ri tana Yahuda.

⁸ Ri yae njaya mompaumo i Naʼomi ri manianya radua, natoʼoka tau seʼe, “Moruana ndipewalilimo ri banua inemi. Tuarapa i Pue mampokapuru komi, ewa kadago ndayami ri yaku pai ri waʼa ntau seʼe anu matemo setu.

⁹ Tuarapa i Pue mampokapuru komi painaka dareʼe muni langkaimi pai mosombori muni komi.” Roo mompau ewanceʼe metompamo i Naʼomi, naeki manianya radua setu. Paikanya naiibaka i Oropa pai i Ruti tanginya gori ngkarimbonya,

¹⁰ pai mompau ri Naʼomi natoʼo, “Bareʼe, Ine! Kami da njoʼu sangkani-ngkani pai komi ri bancami ine!”

¹¹ Mesono i Naʼomi natoʼo, “Neʼe anaku! Moruana mewalili komi, maka nunjaa woʼu yowenya ndilulu yaku? Maka yaku bareʼemo da moana da naka reʼe ndipolangkai?

¹² Ndipewalilimo anaku, maka yaku seʼi matuʼamo kojo bareʼemo sintinaja da molangkai. Ane rapanya sambengi seʼi yaku da molangkai pai da kupoana ana tuama,

¹³ ara da ndikoto mopea rantani bangke? Ara madago podo da mampopea inceʼe komi bareʼe da molangkai pai tau ntaninya? Bareʼe anaku, neʼe ewanceʼe! Maʼai kapari ndayaku manawa-nawa kapari anu da ndipomberataka ua popahuku i mPue ri yaku.”

¹⁴ Madonge pau seʼi maʼai woʼu potumangi i Oropa pai Ruti, roo setu metompamo i Oropa, naeki manianya setu nepa malai siʼa. Paikanya i Ruti bareʼe napokono mogaʼa pai manianya setu.

¹⁵ Mompaumo i Naʼomi ri siʼa natoʼo, “Ruti! Peole! Lagomu malaimo mewalili ri waʼa ntinanya pai ri waʼa lamoanya. Palaimo woʼu siko anaku, luluwakamo siʼa!”

¹⁶ Paikanya mesono i Ruti, natoʼo, “Ine, neʼe ndipokau yaku da mewalili mampalaika komi ine! Yaku da malai sangkani-ngkani pai komi. Ri mbeʼi kanjoʼumi ine njairia seʼe da kanjoʼuku. Ri mbeʼi ntano kareʼe mpearimi, njairia seʼe da peariku. Bancami i inceʼe seʼe bancaku. mPue Ala anu ndipanyomba inceʼe seʼe da kupanyomba.

¹⁷ Ri mbeʼi ntano da kapatemi, njairia seʼe da kapateku pai ndadayo njairia. Mbolimo yaku da ndapakanee i mPue hukuku, ane da mogaʼa yaku pai komi ine, podo kapate anu da mampapogaʼa kita!”

¹⁸ Pangkita i Naʼomi janapari-pari kojo i Ruti da malulu siʼa, bareʼemo nakoto mantoʼo pau mampetangani.

¹⁹ Melinja mpaliu tau seʼe rantani rata ri Beteleme. Kajela ntau seʼe njairia, guaga tau ri kota setu. Natoʼo waʼa mbeʼa njairia, “Ara banya siʼamo i Naʼomi?”

²⁰ Natoʼo i Naʼomi ri tau seʼe, “Neʼemo ndipebooka yaku i Naʼomi, moruana ndipebooka yaku i Mara, maka i Pue Ala Anu Makuasa, mampapaliumo yaku tuwu buke-buke pai parindaya.

²¹ Palaiku owi ungka ireʼi, yaku gana-gana katuwuku, paikanya seʼi-seʼi ndakeni mpewalili i Pue yaku soe-soe pale. Inceʼe painaka neʼemo ndipeboo toʼoku i Naʼomi, maka i Pue Anu Makuasa mangahuku yaku ri mpengaya-ngaya kapari ngkatuwu!”

²² Ewanceʼemo tuntukanya pewalili i Naʼomi ungka ri tana Moabi, sangkani-ngkani pai manianya i Ruti to Moabi setu. Karata ntau seʼe ri Beteleme, tempo setu montepuʼumo turo mpomota gandu.