Pomulanya 1 - Sura Magali Nuntu Ngkatuwu

Tuntuka palaburu yangi pai lino 1:1–2:4a

¹ Ri uyu-uyunya, ri tempo pantepuʼu i mPue Ala malaburu yangi pai lino,

² lino setu bareʼepa tumotoa, pai ntongo kaenggo-enggo. Ewa tasi bangke anu kayonggu-yonggu mangkaʼuwi pura-puranya, nakulamuti mbani, paikanya kuasa i mPue Ala moyano-yano ri wawo ue setu.

³ Ndatoʼo i mPue Ala, “Kareme!” Liu-liu mareme.

⁴ Mawongko raya i mPue Ala mangkita. Ndapapogaʼamo reme pai wengi,

⁵ pai ndapapotoʼo i mPue Ala reme setu “Mareme”, pai wengi setu “Mawengi”. Liumo wengi pai ratamo ri kamowuronya. Inceʼemo eo anu kaʼisa.

^6-7 Ungka lairia ndatoʼo i mPue Ala, “Pewalimo poragia da mangagaʼaraka ue setu mewali radua ntila.” Liu-liu mewali. Ewanceʼemo ndapapewali i mPue Ala poragia anu mampapogaʼa ue anu reʼe ri ara mporagia setu pai anu reʼe ri wawonya.

⁸ Poragia setu ndapapotoʼo, “Yangi.” Liumo wengi pai ratamo ri kamowuronya. Inceʼemo eo anu karadua.

⁹ Ungka lairia ndatoʼo i mPue Ala, “Waʼa ue anu ri ara yangi da mompasambaka, da naka tongawa tana.” Mewalimo kojo ewanceʼe.

¹⁰ Ndapapotoʼo i mPue Ala tana setu “Karatana”, pai ue setu ndapapotoʼo “Tasi”. Mawongko raya i mPue Ala mangkita

¹¹ Ndatoʼo woʼu i mPue Ala, “Mbolimo tana setu da mampapesuwu mpengaya-ngaya pinamuya, inceʼemo ngaya mpinamuya anu reʼe wukunya pai ngaya mpinamuya anu da mowua.” Mewali kojo ewanceʼe.

¹² Inceʼe painaka tana mampapesuwumo mpengaya-ngaya pinamuya. Mawongko raya i mPue Ala mangkita inceʼe.

¹³ Liumo wengi pai ratamo ri kamowuronya. Inceʼemo eo anu katatogo.

^14-15 Ungka lairia ndatoʼo i Pue Ala, “Mbolimo da reʼe waʼa aga-aga ri yangi anu da mampakareme lino, anu da mampapogaʼa reme pai wengi, pai da mampakanoto tempo pontepuʼu ndeme, taʼu, pai eo bangke agama.” Mewali kojo ewanceʼe.

¹⁶ Ewanceʼemo ndapapewali i mPue Ala radua aga-aga merara anu bangke, inceʼemo ogu eo da merara ri ndeme pai ogu mbuya da merara ri wengi; banya podo inceʼe ndapowia woʼu waʼa betuʼe.

¹⁷ Ndadika i mPue Ala waʼa aga-aga anu merara setu ri yangi da mampakareme lino,

¹⁸ da mangkuasai reme pai wengi, pai da mampapogaʼa kareme pai kawengi. Pai mawongko raya mPue Ala mangkita inceʼe.

¹⁹ Liumo wengi pai ratamo ri kamowuronya. Inceʼemo eo anu kaʼaopo.

²⁰ Ungka lairia ndatoʼo i mPue Ala, “Mbolimo ri raya ue da kangkanyo-ngkanyo waʼa mpinatuwu, pai ri tongo ndaoa da maria tonci moyoko-yoko.”

²¹ Ndapapewali i mPue Ala waʼa mpinatuwu anu bose ri tasi, pai mpengaya-ngaya pinatuwu anu tuwu ri raya ue, sangkani pai mpengaya-ngaya tonci. Pai mawongko raya i mPue Ala mangkita inceʼe.

²² Ndadonco i mPue Ala pura-puranya setu, nepa ndasongka pinatuwu anu tuwu ri raya ue da naka mojene mabangani tasi, pai ri waʼa ntonci da naka kakoteranga-rangani karianya.

²³ Liumo wengi pai ratamo ri kamowuronya. Inceʼemo eo anu kaʼalima.

²⁴ Ungka lairia ndatoʼo i mPue Ala, “Mbolimo lino da mampapesuwu mpengaya-ngaya pinatuwu anu ri karatana, anu manaya pai anu maila, anu bose pai anu masiwu.” Mewali kojo ewanceʼe.

²⁵ Ewanceʼemo ndapampapewali i mPue Ala pura-puranya setu pai mawongko rayaa mangkita.

²⁶ Ungka lairia ndatoʼo i mPue Ala, “Seʼi-seʼi kita da mampowia tolino anu da mewali ewa kita pai da sintolio pai kita. Tau seʼe anu da mamparenta waʼa bau, waʼa ntonci pai mpengaya-ngaya pinatuwu anu ntaninya, madago anu manaya bara anu maila, madago anu bose bara anu masiwu.”

²⁷ Ewanceʼemo i Pue Ala mampapewali tolino, pai ndapapewali tau seʼe ewa koroa ngkalioa. Ndapapewali tau seʼe tuama pai weʼa.

²⁸ Ungka lairia ndadonco tau seʼe ndatoʼo, “Ndipomulimo naka sondo, da naka waʼa mulimi mampeari pai mamparenta juku-juku sambawo lino. Ri komi kuwai tetala da mampasilolongani waʼa bau, waʼa ntonci pai pura-pura pinatuwu ntaninya anu maila.

²⁹ Anu da ndikoni kuwaika komi mpengaya-ngaya pinamuya anu reʼe wukunya pai wua ngkaju.

³⁰ Paikanya ri waʼa ntonci pai pinatuwu anu maila ntaninya, kuwaika ewo pai pinamuya anu moira mewali pangkoninya.” Mewali kojo ewanceʼe.

³¹ Ndapapowawo i mPue Ala wuwunya anu roo ndapowia setu mawongko kojo rayaa. Liumo wengi pai ratamo ri kamowuronya. Inceʼe eo anu kaʼaono.