Pilipi 1 - Sura Magali Nuntu Ngkatuwu

Petabea i mPaulu 1:1-2

¹ Waʼa ngkasangkompo tau i mPue Ala pura-pura anu reʼe ri Pilipi, anu sambaʼa-mbaʼamo pai i Kerisitu Yesu. Sangkani pai waʼa nto pombawanaka pai toporioko ri raya dompu! Kami radua, i Paulu pai i Timotiu, waʼa mbatua i ngKerisitu Yesu,

² mampomata-mata mbolimo i Pue Ala Papata pai i Yesu Kerisitu da mawai popadonco pai karodo ndaya ri komi.

Pekakai i mPaulu tila dompu 1:3-11

³ Sangkani-sangkani kono kuendo komi kupasowa peunde pai pontarima kase ri Pue Ala.

⁴ Sangkani-sangkani kupekakaika komi pura-pura, kumekakai ri wongko ndayaku.

⁵ Kuunde i Pue Ala maka ungka ri pontepuʼunya rantani rata wawaseʼi komi mantulungimo yaku mampobambarika Nuntu ngKatuwu ungka ri Pue Ala.

⁶ I Pue Ala ngkalio-A anu mantepuʼumo tetala anu madago setu ri komi pai yonto ri rayaku Sira seʼe da mampaliu rantani roo ri Eo ngkarata muni i ngKerisitu Yesu.

⁷ Lawi sitinaja paepe ndayaku ewanceʼe kono komi, maka komi pura-pura lau ri rayaku. Maka komi woʼu sangka-ngkani pai yaku mantarima, pombai mpuru i mPue Ala ri yaku; madago seʼi-seʼi yaku ntongo ri raya ntarunggu, ewanceʼe seʼe ri tempo reʼe ri sambalikunya tila pampelae pai pangkogomaka pompetumbu Nuntu ngKatuwu setu.

⁸ I Pue Ala ndaincani ewambeʼi kamonconya kamawo ndayaku ri komi ri paepe pampotowe i Kerisitu Yesu ngkalio.

⁹ Ewaseʼi kupampekakaika komi, mbolimo komi da kakoteranga-rangani mampotowe i Pue Ala pai kasitau pai kakoteranga-rangani ri paincanimi anu monco ri kaloʼe ndayami.

¹⁰ Ane ewanceʼe komi da ndiincani mampilisi nunjaa anu ri wawo ngkadagonya, pai katuwumi da magali ungka ri posari bara petuluri anu ewambeʼi ntano rantani rata ri eo ngkajela muni i ngKerisitu.

¹¹ Katuwumi da gana-gana pai waʼa mpowia anu mayoa anu podo i Yesu Kerisitu ngkalio-A mangkoto mampowia; inceʼe mewali unde pai pebangkei ri Pue Ala.

Katuwu tila i ngKerisitu 1:12-30

¹² Pampokonoku da naka ndiincani, kakononya pura-pura anu mewalimo ri woto ngkoroku ua kaʼinceʼenya pai naka maʼaimo katolele Nuntu ngKatuwu setu.

¹³ Painaka pura-pura waʼa ntopojaga banua i datu pai waʼa ntau ntaninya anu reʼe ireʼi maincanimo kayakunya ndatarunggu ua yaku mamporiokoi i ngKerisitu.

¹⁴ Pai ri ndapantarunggu yaku, maria waʼa ngkasangkompo anu sampepeaya pai kita kakoteranga-rangani peayanya ri Pue Ala, painaka bareʼemo maeka raya ntau seʼe mampetumbu nuntu i mPue Ala ri kakoje ndayanya.

¹⁵ Lawi reʼe bara tesangkuja ri oyo ntau seʼe anu mampobambarika i Kerisitu ua kasina ndayanya pai ri pombebali-bali, paikanya anu saʼe mampobambarika i Kerisitu ri kamonconya.

¹⁶ Tau seʼe mampobambarika ua katowe ndaya ntau seʼe ri Pue Ala, maka manoto ri raya ntau seʼe i Pue Ala anu mampokau tau seʼe da mampetumbu Nuntu ngKatuwu setu.

¹⁷ Paikanya waʼa ntau ntaninya mampobambarika i Kerisitu ua tinako ndaya anu majaʼa; tau seʼe podo mantunggai porasinya ngkalionya. Nasarumaka ntau seʼe powianya ewanceʼe bara da marangani kapari ndayaku ri raya ntarunggu.

¹⁸ Paikanya bareʼe makuja! Maka mau ewambeʼi ntano pampobambarika ntau seʼe bara mopuʼu ri nawa-nawa anu madago bara ri nawa-nawa anu majaʼa, podoia i Kerisitu napobambarika ntau seʼe, inceʼe kupokawongkomo. Pai bareʼe bali-bali paepe ndayaku ewanceʼe.

¹⁹ Maka kuincani ua waʼa mpekakaimi pai pompelae ungka ri Inosa i Yesu Kerisitu, yaku da tesorepaka.

²⁰ Anu kupodaraya pai kupomata-mata da naka neʼe podo ngkabongo potetalaku. Maʼai kupampomata-mata da naka neʼe bali-bali, pagonya ri tempo seʼi da motetala ri kakoje ndaya pai ri gori-gori mpangkoto ntanoanaku, madago ri sindara ntongo tuwupa bara ri tempo ngkamateku pura-pura da mampapeawa i Kerisitu.

²¹ Maka ri yaku katuwuku inceʼe i Kerisitu! Pai kapateku inceʼe rasiku.

²² Paikanya ane katuwuku ri lino seʼi, kukoto da mawianaka anu bangke yowenya bareʼe kuincani bara anu mbeʼi anu da kupilisi.

²³ Radua ngayamo seʼe mombeyali dika ri rayaku. Da rayaku mampalaika lino seʼi da njoʼu maroo-roo sangkani-ngkani pai i Kerisitu, maka inceʼe anu lese mpodago;

²⁴ paikanya, ua tila da kadagomi, sakodi ngkadago ane reʼepa yaku ri lino seʼi.

²⁵ Inceʼe kupomonco kojo. Inceʼe painaka yaku ntongo maroo-roopa ireʼi. Yaku da todo maroo-roo pai komi pura-pura, da naka kukoto mampakaroso pai mampakawongko katuwu mpeaya ndayami.

²⁶ Inceʼe painaka ane mewalilimo yaku ri komi, komi anu sambaʼa-mbaʼamo pai Kerisitu Yesu da maʼai ngkaria woʼu anu mampakawongko rayami ua kayakunya.

²⁷ Anu moyowe wawaseʼi inceʼemo komi da tuwu silulu pai Nuntu ngKatuwu kono i Kerisitu. Ane ewanceʼe ntano, bara da momberatapa komi pai yaku bara bareʼemo, paikanya da kudonge kakominya maroso ri kasambaʼa-mbaʼa, monggale sangkani-ngkani ri tinako ndaya anu sambaʼa-mbaʼa, inceʼemo tila mpeaya ndaya silulu pai Nuntu ngKatuwu ungka ri Pue Ala.

²⁸ Neʼe bali-bali kakoje ndayami; neʼe ndipokaeka waʼa iwalimi. Inceʼe sambaʼa petondoni ri tau seʼe, katau seʼenya da panangi pai komi da menangi, maka i Pue Ala ngkalio-A anu da mampapenangi komi.

²⁹ Maka ndawaimo i mPue Ala ri komi, banya podo peaya ndaya ri Kerisitu, paikanya ndawaimo woʼu tila maepe kapari ua i Kerisitu.

³⁰ Seʼi-seʼi komi tesuamo woʼu sangkani-ngkani pai yaku ri pompari-mpari anu siwia-wia; Inceʼe pompari-mpari anu ndikitamo owi ewambeʼi pompari-mpariku, pai ntongo kupari-pari rantani wawaseʼi ewa anu ndidongemo.