Pilemon 1 - Sura Magali Nuntu Ngkatuwu

Petabea 1-3

¹ Kasangkompoku i Pilemo, yunu pai sampotetala mami! Yaku, i Paulu sambaʼa tau anu ndatarunggu ua i Kerisitu Yesu, sangkani-ngkani pai kasangkompota i Timotiu, maʼuki sura seʼi rata ri siko,

² pai waʼa dompu anu mompasambaka ri banuamu, pai kasangkompota weʼa i Apia woʼu pai Arikipu yunuta anu mompari-mpari.

³ Kapomata-mata mbolimo puru pai towe ndaya i mPue Ala Papata pai i Yesu Kerisitu mawai popadonco pai karodo ndaya ri siko.

Towe pai peaya ndaya i mPilemo 4-7

⁴ Sangkani-sangkani kumekakai, kutoʼo toʼomu, pai kupasowa tarima kase ri Pue Ala.

⁵ Maka kudonge ewambeʼi nupampotowe pura-pura tau i mPue Ala, pai ewambeʼi kamonco kojo peayamu ri Yesu.

⁶ Kupekakaika tuarapa pokasangkompota ewa waʼa ntau meaya da mampowuaka katerangani mparata ndayata puru ndaya anu taratamo ri kasambaʼa-mbaʼata pai i Kerisitu.

⁷ Towe ndayamu Pilemo ri pura-pura tau i mPue Ala, mampakawongko rayaku pai maʼiowaka yaku! Pura-pura tau i mPue Ala lindo rayanya ua siko.

Perapi kono i Onesimu 8-22

⁸ Inceʼe painaka, ewa sambaʼa kasangkompo anu sambaʼa-mbaʼa mpeaya, kukoto da mancongka siko da mawianaka nunjaa anu da nupowia.

⁹ Paikanya ua kupampotowe siko, banya kusongka paikanya podo kuperapi. Yaku seʼi sambaʼa tau tuʼa, pai seʼi-seʼi ntongo ndahuku woʼu ri raya ntarunggu ua i Kerisitu Yesu.

¹⁰ Yaku, i Paulu, da mamparata sangaya perapiku ri siko kono i Onesimu, anaku ua i Kerisitu. Maka ri raya ntarunggu seʼi yaku mewalimo papa ri peya ndayanya.

¹¹ I owi siʼa bereʼe yowenya ri siko, paikanya seʼi-seʼi siʼa bangke yowenya banya podo ri siko, paikanya ri yaku woʼu.

¹² Seʼi-seʼi tau anu kupotowe setu, kupapewalili ri siko.

¹³ Kamonconya da rayaku mantaʼamaka siʼa i reʼi da mewali sarungkoromu da naka siʼa mantulungi yaku, sangkasae yaku ndahuku ri raya ntarunggu seʼi ua Nuntu ngKatuwu ungka ri Pue Ala.

¹⁴ Paikanya bareʼe kupokono mampowia ewanceʼe ane bareʼe nusintuwunaka. Maʼai pampokonoku ane nuwianaka ri kabuya ndayamu ngkaliomu; siko bareʼe kuriso.

¹⁵ Katepogaʼamu sarai pai i Onesimu inceʼe da naka nukoto mantarima muni siʼa rantani masae-sae.

¹⁶ Seʼi-seʼi siʼa banyamo podo anamayunumu; paikanya meruu ungka njairia, siʼa siwia-wia mewali kasangkompo anu ndapotowe ua i Kerisitu. Siʼa moyowemo mpodago ri yaku, pagonya ri siko! Manoto siʼa da moyowe mpodago ewa anamayunu pagonya ewa sambaʼa kasangkompo ua i Pue!

¹⁷ Inceʼe painaka ane nureke yaku sambaʼa yunu kasi to Kerisitumu, tarima muni i Onesimu ewa da nupantarima yaku.

¹⁸ Ane masalamo siʼa bara moinda siʼa ri siko, papakoyokamo yaku pura-puranya setu.

¹⁹ Aginya pau seʼi da kuʼuki mpaleku ngkalioku: Yaku, i Paulu, da mabayari pura-puranya. (Mau bareʼemo kupatiendoka siko, kasikonya reʼe indamu ri yaku, inceʼemo katuwumu anu dawoʼu ewa sambaʼa to Kerisitu.)

²⁰ Inceʼe painaka ee kasangkompo, koisa tulungi yaku ri toʼo i mPue; pakawongko rayaku ewa sambaʼa kasangkompo ua i Kerisitu.

²¹ Manoto kuepe ndaya ri paʼukiku sura seʼi, sangaya-ngaya da nuwianaka nunjaa anu kuperapi. Lawi kuincani manoto da nuwianaka meruu ungka ri anu kuperapi seʼi.

²² Tondanya kuperapi, koisa patokaka yaku lincu da kareʼeku ri banuamu, maka kupomata-mata da ndapoʼioka i mPue Ala pekakaimi da ndapangkeni muni yaku ri komi.

Tabea kapusanya 23-25

²³ I Epapara anu seʼi ndatarunggu sangkani-ngkani pai yaku ua i Kerisitu mampakatu tabea rata ri siko.

²⁴ Sabemo woʼu tabea waʼa ntau anu sampotetalaku: I Marakusi, i Arisitariku, i Demasi pai i Lukasi.

²⁵ Mbolimo i Yesu Kerisitu da mangadonco komi. Petubunaka ungka ri kami, Paulu