Pangkita 1 - Sura Magali Nuntu Ngkatuwu

Pepatongawa ri Yohane 1:1-3

¹ Bangani ncura seʼi inceʼemo kakononya nunjaa anu ndapatongawa i Yesu Kerisitu kakononya anu nepa da mewali. I Pue Ala mantoʼoka i Kerisitu da naka ndapatongawaka ri waʼa mbatua i mPue Ala kono nunjaa anu da ronga mewali. I Kerisitu mampokau malaʼekaa rata ri watua-A i Yohane da mantoʼoka siʼa waʼa anu da mewali setu.

² Napau i Yohane pura-pura anu nakita setu; ewaseʼimo totoraka ungka ri Pue Ala anu ndaparata i Yesu Kerisitu.

³ Yontomo kalindo ndaya ntau anu mabasaka tau pai anu mampedongeka nuntu anu ndaʼuki ri sura seʼi. Maka bareʼemo masae da pewalinya pura-pura setu.

Tabea anu rata ri dompu papitu 1:4-8

⁴ Waʼa ngkasangkompo anu lau ri dompu papitu ri tana Asia! Yaku, i Yohane, mampomata-mata komi da marata pombai mpuru pai karodo ndaya ungka ri Pue Ala. Inceʼemo Sira anu reʼe, pai anu reʼemo pai anu darata – pai ungka ri papitu inosa anu reʼe ri suara gadera mPoparenta i mPue Ala,

⁵ pai ungka ri Yesu Kerisitu sabi anu todo pai manoto. Siramo anu riu-riunya ndapatuwu muni ungka ri kapate, pai Siramo anu Makuasa ri wawo waʼa datu ri lino seʼi. I Yesu mampotowe kita, pai ua kapate-A Sira malapasakamo kita ungka ri waʼa ncalaata.

⁶ Roo setu kita ndapapewali banca ntadungkadago anu ndapatani tila pamporiokoi i Pue Ala, Papa-A. I Yesu Kerisitu setumo anu meawa, bangke pai makuasa rantani masae-saenya, Ami!

⁷ Peole, Sira rata meyapi-yapi limu! Pura-pura tau da mangkita Sira, tesua woʼu waʼa ntau anu roo majolo ntawala Sira da mangkita karata-A seʼe. Pura-pura banca ri lino seʼi da tumangi ua Sira. Io inceʼe manoto! Ami!

⁸ “Yakumo anu tepuʼu pai anu kapusanya,” pantoʼo i mPue Ala, anu reʼe, anu lawi reʼemo, pai anu nepa darata, Anu Makuasa.

Pepatongawa kono i Kerisitu 1:9-20

⁹ Yaku i Yohane kasangkompomu anu siwia katedikanakanya pai komi ri paepe kapari ewa sambaʼa anaguru i ngKerisitu. Kita todo mangkoyo pari ua kita anu-A, yaku ndataji ri togongi Patimosi toʼonya, kumamponcuruka mampobambarika Nuntu ungka ri Pue Ala, anu ndaparata i Yesu.

¹⁰ Ri Eo i mPue yaku nakuasai Inosa mPue Ala, nepa kudonge oni nganga anu marimbo – ewa oni ncurupeta – mompau ri tondo kupotaliku.

¹¹ Pantoʼo oni nganga setu, “Ukimo nunjaa anu nukita, pai pakatu sura setu ri dompu papitu, toʼo waʼa dompu setu inceʼemo: Epesu, Samirina, Peregamu, Tiatira, Saridisi, Piladelapia pai Laodikea.”

¹² Meeli yaku tondo taliku kumampeole bara isema anu mampomapauka yaku. Nepa kukita saka potunda ncilo papitu, anu ndapowia ungka ri wuyawa, lau sumbunya.

¹³ Ri tongo-tongo potunda ncilo setu mekakore tau sambaʼa pangkitaku ewa sambaʼa tolino. Siʼa mamporengko juba anu marate tudu-tudu ri todunya. Tau setu mampataka ompo dada wuyawa.

¹⁴ Wuyuanya mabuya ewa wuyu bimba, ewa kabuya ngkapasi. Matanya mareka-reka ewa apu,

¹⁵ witia menesi-nesi ewa tambaga anu ndapoawa. Oni ngangaa ewa pokuu ue anu ri wera bangke.

¹⁶ Palea mokana mantangke betuʼe papitu, pai ungka ri ngangaa mesuwu samata penai anu mataja mpotimali. Lio-A mesindi ewa reka ndeme ri ntongo ndeme.

¹⁷ Ri pangkitaku Sira, madungka yaku manyomba ri witia, ewa tau anu matemo yaku. Paikanya ndalaenaka pale-a mokana ri wawoku, nepa ndatoʼo, “Neʼe maeka! Yakumo seʼi anu kaʼisa pai anu kapusanya.

¹⁸ Yakumo seʼi anu tuwu! Yaku matemo paikanya peolemo, Yaku tuwu rantani masae-saenya. Yaku makuasa ri kapate pai makuasa ri kareʼe waʼa ntau mate.

¹⁹ Inceʼe painaka, ukimo pura-pura anu nukita, inceʼemo anu reʼe wawaseʼi pai waʼa anu nepa da mewali ripurinya raneo.

²⁰ Inceʼemo rahasia ri betuʼe papitu anu nukita ri paleku mokana, pai ri papitu potunda ncilo wuyawa setu: Betuʼe papitu setu inceʼemo waʼa malaʼeka papitu dompu, pai papitu potunda ncilo setu inceʼemo dompu anu papitu setu.”