NEHEMIA 1 - Sura Magali Nuntu Ngkatuwu

¹ Ewaseʼi anu naʼuki i Nehemia ana i Hakaliya, kono waʼa ntetala anu nawianaka.

Kasusa ndaya i Nehemia mangkita katedikanaka Yerusale 1:1b-11

^1b Ri wuya Kasilewi kono ri taʼu karua mpuyu poparenta i Aritasasa mewali datu ri Parisia, yaku i Nehemia njau ri Susani ri potunda mpoparenta i datu.

² Ri tempo setu kasangkompoku i Hanani pai bara tesangkuja yununya nepa jela ungka ri Yahuda, kupeoasi ri siʼa ewambeʼi katedikanaka ngkota Yerusale pai kono waʼa nto Yahudi anu mewalilimo ungka ri pantawani ri Babeli.

³ Napau kaku ntau seʼe kono waʼa ntau anu mewalilimo ri tananya ungka ri pantawani, katuwu ntau seʼe mapari pai maka napetikodi waʼa banca ntaninya anu reʼe mantolilimi tau seʼe. Ewanceʼe seʼe bente ngkota Yerusale ntongo bareʼepa ndapakoroka sangkani pai waʼa baa-baanya, ntongo ewa taʼanya ri karoonya ndatunju owi.

⁴ Madonge pompetumbu ntau seʼe, motunda yaku tumangi. Bara sangkuja ndeme kasaenya kapari ndayaku. Kumopuasa pai kumekakai ri Pue Ala kutoʼo,

⁵ “Boo Pue Ala anu makuasa ri suruga. Komi Pue Ala Anu Bangke. Ri kakandende-ndende mami kami mancuara komi. Komi todo mangkekeni janjimi ri waʼa ntau anu mampotowe komi pai mepoʼinaya ri songkami.

⁶ Ndipetiromo kami boo Pue pai Ndipedongekamo pekakai anu kakeni ri suara-Mi ri reme pai ri wengi tila waʼa ntau-Mi to Isaraeli, waʼa mbatua-Mi setu. Kupangakuka ri Komi, to Isaraeli mampowiamo salaa! Yaku pai waʼa ngkai mami seʼe masalaamo ri suarami.

⁷ Kami meewamo ri Komi ua kalewamo waʼa ncongka-Mi. Pai bareʼe melulu ri waʼa mpadika anu roo ndiwai ri kami mampoliu watua-Mi i Musa.

⁸ Boo Pue Ndiendomo waʼa mpaumi anu Ndisongkaka i Musa anu mantoʼo, ane kami to Isaraeli bareʼe todo ri komi, kami da Ndiwuraga ri oyo waʼa banca ntaninya.

⁹ Paikanya ane mewalili muni kami ri Komi pai mepoʼinaya muni ri waʼa ncongka-Mi, da ndipasambaka muni kami anu tewuragamo. Mau ri mbeʼi-mbeʼi ntano kareʼe mami ri sambawo lino seʼi. Nepa da Ndipapewalili muni kami ri kareʼe anu roo Ndipilisi da kareʼe mpanyomba ri Komi.

¹⁰ Boo Pue, kami seʼi waʼa mbatua-Mi, waʼa ntau-Mi anu roo ndisorepaka ua roso ngkuasa-Mi anu bereʼe kasiwianya.

¹¹ Ndisabemo pekakaiku pai pekakai pura-pura watua-Mi anu ntaninya, anu mampokono mantubunaka Komi. Ndipelaemo da naka ri sandeme seʼi, watua-Mi seʼi da mangarata kapuru ndaya ungka ri datu.” Ri tempo setu yaku mewali topompasilolongani panginu i datu.