NAHU 1 - Sura Magali Nuntu Ngkatuwu

Patada ri Nahu 1:1

¹ Ewaseʼi nuntu i mPue Ala kono Niniwe. Nuntu setu ndaparata mampoliu pepatongawa anu ndawai ri Nahu, sambaʼa nabi ungka ri Elikosi.

Karau ndaya i m Pue ri Niniwe 1:2-15

² I Pue Ala bareʼe ndapokono da reʼe anu ndapasiwia pai Sira, tau anu mangaewa Sira, sangaya-ngaya da ndahuku. Ri kaʼai ngkarau ndaya-A, Sira mampasawaki tau seʼe.

³ Lawi Pue, bareʼe pasengke; paikanya Sira seʼe makuasa, painaka bara isema anu mowia sala bareʼe da lapa ungka ri popahuku-A. Ri mbeʼi ntano poliu i mPue jairia tuwu lompiu: ri mbeʼi katudu mpayaʼa-A awu da mewali limu.

⁴ Sira maekasi pai maotisi tasi, waʼa ngkoroue ndaotisi uenya. Buyu ngKarameli pai waʼa mpada ri Basani mewali mangau-ngau pai waʼa ncese ri Libano malelemo.

⁵ Waʼa buyu kandende-ndende ri suaraa; pai waʼa mpongku ntana maunju pura-pura. Ane njoʼu i Pue lino mondende, lino sangkani pai banganinya kandende-ndende.

⁶ Isema anu mangkoto mekakore ane i Pue marau? Bereʼe anu da lapa ungka ri karau ndaya-A? Sira mampapurasi karau ndayaa mesongke watu magonu mewali awu ri suaraa.

⁷ I Pue setu madago, Sira mangkariani waʼa ntaua ri tempo tau seʼe masusa, Sira majagai tau anu metatondo ri Sira.

⁸ Da ewa pancualeki ue mowo anu bangke, ndalesaki waʼa iwali-A. Tau seʼe anu makoje mangaewa Sira, ndapapapereka kapate da naka gero.

⁹ Nunjaa ntano rencanamu anu nupowia da mangaewa i Pue, manoto bareʼe da mewali. Sira bareʼe da mampeswaki kodi ndaya-A radua ngkani ri iwali-A.

¹⁰ Siko da ndatunju ewa deami anu mangau da ewa yopo ndui anu mokenta-kenta.

¹¹ Ungka ri siko, ee Niniwe, mebetemo sambaʼa tau anu buke pai rencana anu majaʼa. Siʼa marencana da maewa i Pue.

¹² Ndatoʼo i mPue ri Isaraeli tau-A, “Mau waʼa nto Asuri setu maroso pai maria imbanya, paikanya tau seʼe da ndagero nepa ndapapaya. Ee banca-Ku, Yaku mamparinimo komi, paikanya inceʼe bareʼemo da kuwianaka.

¹³ Seʼi-seʼi da kupapura kuasa Asuri ri komi, pai kurapasi rante anu mampungu komi.”

¹⁴ Inceʼe botusi mPue kono banca Asuri, “Tau seʼe bareʼe da mampotumpu muli anu da mampapojene bancanya. Waʼa nturuki lamoa anu reʼe ri raya waʼa banua lamoanya da Kulesaki. Kareʼe mpopadayo tila nto Asuri ntongo kupatoka maka tau seʼe bareʼemo sintinaja da tuwu!”

¹⁵ Peole, sambaʼa pomokau rata malempo waʼa buyu, mangkeni bambari madago, bambari mpenangi. Ee banca Yahuda, pakadoromo eo mposusamu pai banganimo janjimu ri Pue Ala. Tanamu bareʼemo da naparenta ntau ntaninya. Tau seʼe da ndageromo mpaliu.