Matius 1 - Sura Magali Nuntu Ngkatuwu

Posuncu anu mampomulika i Yesu 1:1-17

¹ Seʼimo posuncu anu mampomulika i Yesu Kerisitu, muli i Daudi, muli i Burahima. Ungka ri Burahima rata ri Daudi ewaseʼi posuncu ntoʼo anu mampomulika.

^2-6a I Burahima, i Saki, i Yako, i Yuda pai waʼa ngkasangkomponya, i Peresi pai i Sera (ine ntau seʼe i Tamari toʼonya), i Eseromi, i Rama, i Aminada, i Nahaso, i Salomo, i Boasi (inenya i Rahabu), i Obe (inenya i Ruti), Isai pai i Mokole Daudi.

^6b-11 Ungka ri Daudi rantani rata ri tempo pantawani to Isaraeli ri Babeli ewaseʼi posuncu ntoʼo anu mampomulika: I Salomo (inenya bemba i Uria), i Rehabea, i Abia, i Asa, i Yosapa, i Yora, i Usia, i Yota, i Ahasi, i Sikia, i Manase, i Amoni, i Yosia, i Yekonya pai waʼa ngkasangkomponya.

^12-16 Ungka ri tempo pantawani to Isaraeli ri Babeli rata ri tempo pampoana i Yesu ewaseʼi posuncu ntoʼo anu mampomulika: I Yekonya, i Salatie, i Serubabeli, i Abihu. i Eliyaki, i Asori, i Sadoki, i Akimi, i Eliu, i Eleasa, i Matani, i Yako, i Yusu langkai i Maria anu mampoana i Yesu anu ndatoʼo i Kerisitu.

¹⁷ Mewali ungka ri Burahima rata ri Daudi, sampuyu pai aopo lapi tau. Ungka ri Daudi rata ri tempo pantawani to Isaraeli ri Babeli sampuyu pai aopo lapi tau. Ungka ri tempo pantawani to Isaraeli ri Babeli rata ri tempo pampoana i Kerisitu, sampuyu pai aopo lapi tau.

Pampoana i Yesu Kerisitu 1:18-25

¹⁸ Ewaseʼimo tuntuka pampoana i Yesu Kerisitu. Toʼo ine-A i Maria; motengea pai i Yusu. Paikanya kabareʼepanya morongo tau seʼe tongawa maneemo koro i Maria. Bareʼe naincani i Yusu kanee ngkoro i Maria seʼe ua Inosa mPue Ala.

¹⁹ I Yusu, tengeanya setu, sambaʼa tau anu todo malulu padika agama. Mewali da napeʼontoka mponjii-njii potengeanya, da naka i Maria bareʼe marata ea ri suara ntau sondo.

²⁰ Sindara mponawa-nawanya ewanceʼe, siʼa ndapapangipi i mPue. Ri raya mpangipinya setu, nakita sambaʼa malaʼeka i mPue anu rata mantoʼoka siʼa, “Yusu muli i Daudi! Neʼe bata rayamu mamporongo i Maria; maka ananggodi anu ri raya ngkomponya setu mewali ua kuasa Inosa mPue Ala.

²¹ I Maria da mampoana sambaʼa ana tuama. Ananggodi setu da nupapotoʼoka i Yesu, maka siʼa da malapasaka waʼa ntaua ungka ri kasalaa ntau seʼe.”

²² Ewanceʼemo pewalinya pura-pura setu da naka kobangani Nuntu i mPue anu naparata nabi-A, mantoʼo,

²³ “Sambaʼa anaweʼa da manee koronya pai da napoana sambaʼa ana tuama. Ananggodi setu da ndapapotoʼoka Imanueli.” (Imanueli basa Ibarani anu posokinya, “I Pue Ala sangkani-ngkani pai kita.”)

²⁴ Roo setu membangu i Yusu, nalulu pura-pura anu natoʼoka siʼa malaʼeka ri pangipinya, naporongomo i Maria.

²⁵ Paikanya ri kabareʼepanya moana i Maria, bareʼepa yore sangkani-ngkani i Yusu pai i Maria. Ri karoonya napoana ananggodi setu, i Yusu mampapotoʼoka i Yesu.