Lukas 1 - Sura Magali Nuntu Ngkatuwu

Pontepuʼu ncura 1:1-4

¹ Teopilu anu pande mporaya, Mariamo tau anu maʼuki pai madedewaka kono nunjaa anu mewalimo ri oyota.

² Tau seʼe maʼuki malulu totoraka waʼa ntau ri kita tau seʼe anu mangkita mata pewalinya pura-pura setu ungka ri pontepuʼunya, pai tau seʼe woʼu anu mampobambarika bambari setu.

³ Roomo kuparesa ri gori ngkatimamanya pura-pura setu, ungka ri tepuʼunya, inceʼe painaka kuepe madago ane kuʼukika komi ewambeʼi podedenya.

⁴ Incetu kupowia da naka yonto paincanimi anu roo ndapaguruka komi manoto monco kojo.

Pompetumbu malaʼeka kono da pampoana i Yohane Topopariu 1:5-25

⁵ Sindara i Herode mewali Mokole ri tana Yudea, reʼe sambaʼa tadumpanyomba i Sakaria toʼonya, siʼa sambaʼa muli i Abia. Rongonya i Elisabe toʼonya, siʼa seʼe woʼu muli ntadu mpanyomba.

⁶ Tau samboko setu mepoʼinaya ri Pue Ala pai timama kojo pelulunya ri songka i mPue ri raya ngkatuwunya.

⁷ Paikanya tau seʼe bereʼe ananya i Elisabe tamana matuʼamo raduamo seʼe.

⁸ Ri anu sandeme, tempo to Abia kono gilira, i Sakaria mawianaka tetala ntadu mpanyomba ri suara mPue Ala.

⁹ Ua pampakanoto dadu anu biasa nawia naka waʼa ntadu mpanyomba, i Sakaria ndatuju da mesua ri Banua i mPue pai mantunju dupa.

¹⁰ Sindara mpawianaka upacara mpantunju dupa waʼa ntau sondo njau mopea pai mekakai ri sambalikunya.

¹¹ Sindara setu mepatongawamo ri siʼa sambaʼa malaʼeka i mPue Ala, mekakore ri tondo kana lampaʼani pantunju dupa.

¹² Lingu raya i Sakaria mangkita malaʼeka setu, maeka rayanya.

¹³ Paikanya mompau malaʼeka setu natoʼo, “Neʼe maeka siko Sakaria! Maka ndapedongekamo i mPue Ala pekakaimu. Rongomu i Elisabe da mampoana sambaʼa ana tuama pai da nupapotoʼoka i Yohane.

¹⁴ Da maʼai kawongko ndayamu pai da maria woʼu tau anu da mawongko rayanya ane ndapoanamo ananggodi setu!

¹⁵ Siʼa da mewali tau bangke ri pangkita mPue Ala, bareʼe da nainu anggoro pai panginu anu mampakayangu. Ungka pampoana siʼa da naponinika Inosa mPue Ala.

¹⁶ Maria to Isaraeli anu da nakeni muni ri Pue Ala Puenya.

¹⁷ Siʼa da mewali Suro i mPue Ala anu maroso pai makuasa ewa i Elia. Siʼa da mampasimadago papa pai ana, pai tau anu bareʼe tumoro da naponinika muni ri jaya anu monco. Ua ka ewanceʼenya siʼa da mampatoka waʼa ntau anu mepoʼinaya ri Pue.”

¹⁸ Meoasi i Sakaria ri malaʼeka setu natoʼo, “Ewambeʼi da kupaincani pewalinya pura-pura setu? Yaku matuʼamo pai rongoku woʼu matuʼamo?”

¹⁹ Mesono malaʼeka setu natoʼo, “Yaku seʼi i Jabaraeli, yaku mamporiokoi i Pue Ala, pai Sira anu mampokau yaku da mampetumbuka siko bambari anu madago seʼi.

²⁰ Nunjaa anu kutoʼo seʼi, da mewali ane jelamo temponya. Paikanya ua bareʼe nuaya, montepuʼu seʼi-seʼi siko da bobo rantani rata ri tempo da pewalinya anu kutoʼo seʼi.”

²¹ Sindara setu, waʼa ntau mampopea mpaliu i Sakaria. Napojingki ntau seʼe masae gaga siʼa ri raya Banua i mPue.

²² Ri tempo mpesuwunya bareʼemo sowa mompau ri tau seʼe. Siʼa jamo mobasa ri pale pai bobomo. Ungka lairia naincanimo waʼa ntau sondo, ka-siʼanya mangkitamo sangaya pepatongawa ri raya Banua i mPue.

²³ Pusamo eo da mpotetalanya ri Banua i mPue mewalilimo siʼa ri banuanya.

²⁴ Bareʼe masae ungka lairia maneemo koro ndongonya i Elisabe, mesambunimo siʼa ri banuanya alima mbuya kasaenya.

²⁵ Maka natoʼo, “Kapusanya ndatulungi i mPue yaku pai, ndapalisimo ea mataku.”

Pompetumbu malaʼeka kono pampoana i Yesu 1:26-38

²⁶ Aono mbuyamo kanee ngkoro i Elisabe, ndapokau woʼu i mPue Ala malaʼeka Jabaraeli njoʼu ri lipu Nasare sambaʼa kota ri daera Galilea.

²⁷ I Jabaraeli ndapokau njoʼu ri anaweʼa sambaʼa i Maria toʼonya. Anaweʼa setu motengeamo pai tuama sambaʼa i Yusu toʼonya, muli i Mokole Daudi.

²⁸ Kajela malaʼeka ri Maria natoʼo, “Tabea, siko anu ndadonco i mPue Ala anu bereʼe kasiwianya! I Pue sangkani-ngkani pai siko!”

²⁹ Tesaluntengku i Maria madonge pau malaʼeka setu, painaka napepewoloka nunjaa posokinya petabea setu.

³⁰ Mompau malaʼeka setu ri siʼa natoʼo, “Neʼe maeka Maria, maka siko marata puru ndaya mPue Ala.

³¹ Peole siko da manee koromu, ana tuama anu da nupoana pai da nupapotoʼoka i Yesu.

³² Siʼa da bangke pai da ndatoʼo Ana mPue Ala Anu Ndate ri Peawanya. I Pue Ala da mampapewali siʼa mokole ewa ngkainya i Mokole Daudi.

³³ Pai siʼa da moparenta ewa mokole ri muli i Yako rantani masae-sae. Poparentanya bareʼe da reʼe kapusanya.”

³⁴ Natoʼo i Maria ri malaʼeka setu, “Ewambeʼi da pewalinya maka yaku seʼi ntongo anaweʼapa?”

³⁵ Mesono malaʼeka setu natoʼo, “Inosa mPue Ala da tudu ri siko, pai kuasa i mPue Ala da maleruni siko. Inceʼe puʼunya ananggodi anu da nupoana setu ndatoʼo Magali, Ana mPue Ala.

³⁶ Peole, potumu i Elisabe, aono mbuyamo kanee koronya seʼi tuʼamo, i wungkaeo siʼa natoʼo ntau tanama.

³⁷ Maka ri Pue Ala bereʼe anu bareʼe da mewali.”

³⁸ Natoʼo i Maria, “Yaku seʼi watua i mPue: mbolimo da napewalimo ri yaku ewa anu nditoʼo.” Roo setu napalaikamo malaʼeka i Maria.

I Maria mampesidoeki i Elisabe 1:39-45

³⁹ Bareʼe masae ungka njairia malaimo i Maria ndeku ri kota sambaʼa ri Yudea ri daera buyu mongkodo.

⁴⁰ Njoʼu siʼa ri banua i Ncakaria, pesuanya ri banua setu metabea siʼa ri Elisabe.

⁴¹ Butu nadonge i Elisabe petabea i Maria, molengkomo ananggodi anu ri raya komponya, pai siʼa nakuasai Inosa mPue Ala.

⁴² Nepa meboo natoʼo, “Sikomo tau anu maʼai ndapadonco i mPue Ala ri oyo waʼa mbeʼa! Ndadoncomo ananggodi anu da nupoana setu!

⁴³ Ara isema pindongo yaku seʼi painaka maʼi Ine mPueku ri yaku?

⁴⁴ Peole, jabutu kudonge oni ngangamu mantabea yaku, molengkomo ananggodi anu ri raya ngkompoku nakeni ngkawongko ndayanya.

⁴⁵ Morasimo siko maka nuaya anu ndatoʼo i mPue Ala ri siko, sangaya-ngaya da mewali!”

Peunde i Maria ri Pue Ala 1:46-56

⁴⁶ Natoʼo i Maria, “Rayaku mabangkei i Pue,

⁴⁷ pai napokawongko ntanoanaku, maka i Pue Ala Toponcorepakaku.

⁴⁸ Ndapetiromo i mPue, kakapuru rayaku maka montepuʼu seʼi-seʼi pura-pura lemba da mantoʼo yaku tau marata dago.

⁴⁹ Maka i Pue Ala Makuasa mampowiamo anu meawa ri yaku, Magalimo toʼo-A.

⁵⁰ Tuwu salapi-tuwu salapi, ndapokapuru i mPue tau anu mampokaeka Sira.

⁵¹ Pai pale-A anu makuasa, Sira mawuraga tau mekiunde pai maguretosi tangara ndaya ntau seʼe.

⁵² Waʼa datu ndapapenaʼu ungka ri gadera mpoparentanya, tau anu kapururaya katuwunya ndatanderaka.

⁵³ Tau anu maoro ndawaika anu gana-gana, tau anu koreʼe ndairi napalai soe-soe pale.

⁵⁴ Sira mampelae waʼa ntau-A to Isaraeli malulu pojanji-A anu ndapareʼe pai waʼa ntau piamota.

⁵⁵ I Pue bareʼe mangkalingani janji-A Sira pande mporaya ri Burahima, pai waʼa mulinya rantani masae-sae.”

⁵⁶ Mosu tatogo mbuya kasaenya i Maria maroo-roo pai i Elisabe, nepa mewalili siʼa ri banuanya.

Pampoana i Yohane Topopariu 1:57-66

⁵⁷ Jelamo ri tempo da poana i Elisabe, napoanamo kojo sambaʼa ana tuama.

⁵⁸ Butu tedonge ri waʼa ntau samposori banuanya pai waʼa njaʼinya kapande ndaya mPue Ala ri Elisabe, tau seʼe woʼu mamposipokawongko.

⁵⁹ Kagananya uayu ndeme tinuwu ongaa setu, jelamo waʼa ntau setu da masuna siʼa. Pampokono ntau seʼe ongaa setu da ndapapotoʼoka i Sakaria malulu toʼo mpapanya.

⁶⁰ Paikanya mompau inenya natoʼo, “Banya inceʼe! Siʼa sangaya-ngaya da ndapapotoʼoka i Yohane.”

⁶¹ Natoʼo ntau seʼe ri siʼa, “Ri waʼa njaʼimu bereʼe anu ewanceʼe toʼonya.”

⁶² Napobasaka ri pale, napeoasi ntau seʼe ri Sakaria bara isema da ndapapotoʼoka ananya.

⁶³ Naperapi i Ncakaria watu mpoʼuki, naʼuki, “Yohane toʼonya.” Jingki raya ntau seʼe pura-pura.

⁶⁴ Ri tempo setu seʼe sowamo muni mompau i Sakaria, naunde i Pue Ala.

⁶⁵ Maekamo raya waʼa ntau anu ri samposori banuanya, painaka bambari setu tolelemo ri sambawo buyu mongkodo ntana Yudea.

⁶⁶ Pura-pura tau anu madonge bambari setu mompeoasi ri rayanya natoʼo, “Nunjaa da pewalinya ananggodi setu raneonya?” Maka i Pue mangkariani siʼa.

Peunde i Ncakaria ri Pue Ala 1:67-80

⁶⁷ Papa ananggodi setu i Sakaria napesuamo Inosa Magali painaka mampasowamo nuntu i mPue natoʼo,

⁶⁸ “Maʼimo kita maunde i Pue, Pue Ala nto Isaraeli! Sira ratamo mampelae waʼa ntau-A, pai malapasaka tau seʼe.

⁶⁹ Ndawaimo ri kita toponcorepaka anu maroso, muli mbatua-A i Daudi.

⁷⁰ Ungka ipiamo mampoliu nguju waʼa nabi-A anu ndapilisi, I Pue mawai janji-A

⁷¹ da malapasaka kita ungka ri pale iwalita, pai ungka ri pale waʼa ntau anu mampobanciika kita.

⁷² Mampatongawa kapurundaya-A ri tau piamota, janji-A anu magali setu sangaya-ngaya da ndabangani.

^73-74 Mojanji mampake sumpa ri ngkaita i Burahima, pai mojanji da malapasaka kita ungka ri pale iwali, da naka kita mamporiokoi Sira ri kabareʼenya maeka.

⁷⁵ Bareʼe bali-bali manyomba ri Sira, mampakawongko raya-A, sangkarate ngkatuwuta.

⁷⁶ Pai siko ee anaku da ndatoʼo nabi i mPue Ala Anu Ndate ri Peawanya. Siko ndapokau mampesindiuka i Pue, da mampatokaka Sira jaya-A,

⁷⁷ da mampobambarika ri waʼa ntau-A katauseʼenya da ndasorepaka, ane bareʼemo ndakitanaka i mPue Ala waʼa ncalaa ntau seʼe.

⁷⁸ I Pue buke puru pai towe ndaya kajela-A ua mancorepaka kita. Daʼewa reme mebete mpowuro.

⁷⁹ Da marara pura-pura anu tuwu ri raya mbani pai ri kaeka ndaya. Sira da mamponinika kita ri jaya anu da njoʼu ri karodo ndaya.”

⁸⁰ Kakobangke-bangke ana i Ncakaria setu, pai kakomaroso-roso rayanya. Siʼa maroo-roo ri pada bone, rantani jelamo ri temponya siʼa da mepapamara ri waʼa nto Isaraeli.