Kolose 1 - Sura Magali Nuntu Ngkatuwu

Petabea i mPaulu pai Timotiu 1:1-2

^1-2 Waʼa ngkasangkompo dompu i mPue Ala ri Kolose anu todo ri kasambaʼa-mbaʼa pai i Kerisitu! Ewa suro i ngKerisitu Yesu – anu ndapatongko i mPue Ala – yaku i Paulu, sangkani-ngkani pai kasangkompota i Timotiu, mampomata-mata tuarapa i Pue Ala Papata da mawai popadonco pai karodo ndaya ri komi.

Pekakai pai pontarima kase 1:3-14

^3-4 Kadongemo kakominya meaya ri Yesu Kerisitu pai komi mampotowe pura-pura tau i mPue Ala. Inceʼe puʼunya ri tempo kapampekakaika komi, kaunde-unde i Pue Ala Papa mPueta i Yesu Kerisitu.

⁵ Ua pampomata-matami nunjaa anu ndapatoka i mPue Ala ri suruga da tilami, painaka meaya pai matowe komi. Kono inceʼe ndidongemo, ri tempo pampetumbuka komi Nuntu ngKatuwu.

⁶ Nuntu ungka ri Pue Ala setu tolelemo ri sambawo lino, pai ua nuntu setu katuwu ntau ndadonco, siwia pai katuwumi woʼu ndadonco, montepuʼu ungka ri padongemi kono puru ndaya mPue Ala pai monco-monco kojo ndipotuwumo.

⁷ Inceʼe napetumbuka komi i Epaperasi, siʼa sampotetala mami anu kapotowe, siʼa sambaʼa sampotetala i ngKerisitu anu todo ri potetalanya anu moyowe ri kita.

⁸ Ungka ri siʼa kapadonge ua kuasa ungka ri Inosa mPue Ala ndikotomo komi mombepotowe.

⁹ Montepuʼu ungka ri kapadonge inceʼe bareʼe bali-bali kapampekakaika komi. Kaperapi ri Pue Ala da naka Inosa mPue Ala mawaika komi kaloʼe pai parata ndaya rantani tumumpu pangaincanimi pepokono i mPue Ala.

¹⁰ Ane ewanceʼe da ndikotomo tuwu malulu pepokono mPue Ala anu mampakawongko raya-A, painaka mpengaya-ngaya da tongawa wuanya anu madago. Pai pangaincanimi i Pue Ala da kakoteranga-rangani woʼu.

¹¹ Mbolimo ua kuasa i mPue Ala anu bangke setu, komi da maroso pai da ndikoto mantodosaka mpengaya-ngaya kapari ri karodo ndaya pai kawongko ndaya,

¹² pai montarima kase ri Papa. Maka Papa setumo anu mampasingkana komi mantarima nunjaa anu ndapatoka mPue Ala tila waʼa ntau-A ri raya mpoparenta-A anu marema.

¹³ Sira anu malapasakamo kita ungka ri kuasa mbani pai ndalimba kita ri raya ngkuasa mpoparenta Ana-A anu Ndapotowe.

¹⁴ Ana-A setu anu mancorepaka kita, posokinya salaata bareʼemo ndakitanaka.

I Kerisitu pai tetala-A 1:15-23

¹⁵ I Kerisitu inceʼemo limbayo anu tongawa ungka ri Pue Ala anu bareʼe takita mata; i Kerisitu inceʼemo Ana uyue, Sira anu ri wawo pura-pura anu ndapapewali.

¹⁶ Maka mampoliu Sira i Pue Ala mampapewali pura-pura anu ri suruga pai anu ri lino, inceʼemo mpengaya-ngaya anu takita mata pai anu bareʼe takita mata; madago langkanae pai datu, madago topoparenta pai anu makuasa. Pura-pura ndapapewali mampoliu i Kerisitu, pai i Kerisitu tumpunya.

¹⁷ Ri kabareʼepanya reʼe mpengaya-ngaya, i Kerisitu lawi reʼemo riunya. Pai ua ka-Siranya painaka reʼe pura-pura anu ndapapewali ri kareʼenya sangaya pai sangaya.

¹⁸ Sira woʼu mewali woʼo ri koro-A, inceʼemo dompu, maka Siramo puʼu ngkatuwu dompu setu. Siramo anu uyue ndapatuwu muni ungka ri kapate, painaka Sira ngkalio-A anu ri wawo pura-puranya setu.

¹⁹ I Pue Ala ngkalio-A anu mantinako ndaya da naka pura-pura anu reʼe ri woto ngkoro-A da reʼe woʼu gana-gana ri woto ngkoro Ana-A.

²⁰ Pai mampoliu Ana-A setu woʼu i Pue Ala mampapewali mpengaya-ngaya setu da reʼe muni pokentanya anu madago pai Sira, madago anu ri lino ewanceʼe woʼu anu ri suruga, inceʼe ndapowia mampoliu kapate Ana-A ri kaju ndapanggo.

²¹ I owi komi lawa ungka ri Pue Ala. Komi maewa i Pue Ala maka majaʼa poʼengkomi pai ponawa-nawami.

²² Paikanya wawaseʼi ua kapate Ana-A, i Pue Ala mampareʼe muni kadago mpokenta pai komi. Ua kaʼinceʼenya komi ndakeni ri suara mPue Ala ewa tau magali anu bereʼe posarinya.

²³ Paikanya, komi sangaya-ngaya da todo pai da maroso ri peaya ndayami. Neʼe boi ndilapasaka pampomata-mata anu roo ndawaika komi ri tempo mpancabemi Nuntu ngKatuwu ungka ri Pue Ala. Nuntu setu tolelemo ri sambawo lino. Pai inceʼemo puʼunya painaka yaku, i Paulu mewalimo to porioko.

Peporiokoi i mPaulu ri dompu 1:24–2:5

²⁴ Wawaseʼi mawongko rayaku mantodosaka kapari ua da kadagomi. Maka ua kapari anu kuepe ri woto ngkoroku seʼi, kamonconya yaku mantodosoka kapari anu mampabuke kapari anu ndatodosaka i ngKerisitu tila ngkoro-A inceʼemo dompu-A.

²⁵ I Pue Ala mampokau yaku mewali toporioko dompu-A tila ngkadagomi. Sangaya-ngaya da kupetumbu pura-pura Nuntu i mPue Ala.

²⁶ Inceʼemo nuntu anu moatu-atu ntaʼumo ndasambunika i mPue Ala ri pura-pura tau paikanya seʼi-seʼi ndapetumbu ri waʼa ntau-A.

²⁷ Ri waʼa ntau-A setu ndapapaincanika i mPue Ala ewambeʼi kadago pai peawanya rahasia setu tila ntolino pura-pura. Rahasia setu inceʼemo: i Kerisitu sangkoro-ngkoro pai komi. Posokinya komi da marata tila ri peawa i mPue Ala.

²⁸ I Kerisitumo setu anu kapetumbu ri tau pura-pura. Kapatiendo pai kapaguru tau seʼe pura-pura ri kaloʼe ndaya. Tangara ndaya mami da naka sambaʼa-sambaʼa tau da kakeni ri Pue Ala, ewa tau anu matinuwumo ri peaya ndaya ua sambaʼa-mbaʼamo pai i Kerisitu.

²⁹ Da naka kukoto jela njairia kupari-pari kojo motetala. Kumompari-mpari kojo ri gori mpakotoku anu ndawai i ngKerisitu ri yaku, anu motetala ri rayaku ewa sambaʼa kuasa.