Ibrani 1 - Sura Magali Nuntu Ngkatuwu

I Pue Ala monuntu mampoliu Ana-A 1:1-3

¹ Ntongo i owi, maria ngkani i Pue Ala mompau ri waʼa ntau piamota mampoliu waʼa nabi mampake mpengaya-ngaya jaya.

² Paikanya ri tempo ngkapusanya seʼi Sira monuntu ri kita mampoliu Ana-A. Mampoliu Ana-A seʼe i Pue Ala mampapewali yangi pai lino sangkani pai waʼa banganinya. Pai roo ndapakanoto i mPue Ala Ana-A seʼe anu mampotumpu mpengaya-ngaya.

³ Siramo anu mampatongawa peawa mPue Ala anu kangkido-ngkido makilaya; Siramo turuki ngkoro i mPue Ala ngkalio-A. Ua kakuasa ri nuntu-A Sira mangkekeni kasambaʼa-mbaʼa yangi pai lino. Ri karoonya Sira mampakagali tolino ungka ri waʼa ncalaa ntau seʼe, Sira motunda ri gadera mpoparenta ri suruga sangkani-ngkani pai Pue Ala, anu Makuasa ri wawo pura-pura kuasa.

Peawa Ana mPue Ala 1:4-14

⁴ Ana setu marata lanti anu meruu ngkandatekanya ungka ri waʼa malaʼeka, pai ri Sira Ndawaika i mPue Ala toʼo anu maʼai ngkatetubunakanya, painaka toʼo anu ndawaika malaʼeka.

⁵ Bareʼepa reʼe pompau i mPue Ala ri malaʼeka ewaseʼi, “Sikomo Ana-Ku, sandeme seʼi Yaku da mewali Papa-Mu.” Pai bareʼepa reʼe pompau i mPue Ala kono malaʼeka anu mbeʼi ntano anu ewaseʼi, “Yaku da mewali Papa-Nya, pai siʼa da mewali Ana-Ku.”

⁶ Paikanya ri tempo pampokau i mPue Ala Ana-A anu uyue ri lino seʼi, ewaseʼi pantoʼo i mPue Ala, “Pura-pura malaʼeka i mPue Ala sangaya-ngaya da manyomba ri Ana-A setu.”

⁷ Kakononya waʼa malaʼeka ewaseʼi pantoʼo i mPue Ala, “I Pue Ala mampowia waʼa malaʼeka mewali ngoyu, pai waʼa ntoporioko-A mewali reka apu.”

⁸ Paikanya ri Ana-A setu ndatoʼo i mPue Ala, “Gadera mpoparenta-Mu, oo Pue Ala da rantani masae-saenya! Poparenta-Mu inceʼe poparenta anu mayoa.

⁹ Siko mampokono kayoa, nupobanciika anu modenggo; inceʼe painaka i Pue Ala, Pue-Mu, mampilisi siko pai mawaika siko katetubunaka anu mampareʼe wongko ndaya, meruu ungka ri waʼa yunumu.”

¹⁰ Ndatoʼo woʼu i mPue Ala, “Siko, Pue, ri pontepuʼunya mampapewali lino, pai Siko ngkalio-Mu mampowia yangi.

¹¹ Pura-pura setu paka da paya, pai da maru ewa rengko; paikanya Siko bereʼe da kabalinya.

¹² Yangi pai lino da Nulupi ewa baju, pai da nusawanika anu ntaninya. Paikanya Siko da gori-gorinya, pai katuwu-Mu bareʼe da reʼe kapusanya.”

¹³ I Pue Ala bareʼepa reʼe pompau-A ewanceʼi ri oyo waʼa malaʼeka-A mau sambaʼa, “Potundamo ri tondo mokana-Ku, rantani pura-pura waʼa iwali-Mu meʼuru ri siko.”

¹⁴ Ane ewanceʼe, nunjaa ntano kamonconya waʼa malaʼeka setu? Tau seʼe inceʼemo waʼa inosa anu mamporiokoi i Pue Ala, pai anu ndapokau i mPue Ala da mampelae waʼa ntau anu da marata katesorepaka.