Hosea 1 - Sura Magali Nuntu Ngkatuwu

Patada ri Hosea 1:1

¹ Ewaseʼimo patiendo anu ndawai i mPue ri Hosea ana i Beeri ri tempo ngkamokole Yahuda mombembesawani naparenta i Mokole i Usia, i Yota, i Ahasi pai i Sikia, pai kamokole nto Isaraeli naparenta i Yerobea ana i Yoahasi.

Rongo pai waʼa ana i Hosea 1:2-9

² Ri tempo anu kaʼisa ngkaninya i Pue mompau ri Banca Isaraeli mampoliu yaku, ndatoʼo i mPue, “Hosea, porongomo pai sambaʼa weʼa anu bareʼe tumoro pai waʼa anamu woʼu da mewali ewa siʼa seʼe. Waʼa ntau-Ku siwia pai poʼengko ndongomu setu; tau seʼe bareʼe todo ri Yaku pai mampalaika Yaku.”

³ Ungka lairia kuporongo sambaʼa weʼa i Gomeri toʼonya ana i Dibalai. Ri karoonya napoana ana mami anu uyue, sambaʼa ana tuama,

⁴ ndatoʼo i mPue ri yaku, “Papotoʼoka anamu setu i Yisirieli, maka bareʼemo masae Yaku da mangahuku mokole nto Isaraeli, ua pepepate anu nawianaka ngkainya i Yehu, ri Yisirieli. Yaku da mangampaposa poparenta muli i Yehu.

⁵ Sindara setu ri Rato Yisirieli Yaku da mangagero karoso ncurodado Isaraeli.”

⁶ Ungka lairia rongoku mampoana ana mami anu karadua, sambaʼa ana anu weʼa, ndatoʼo i mPue ri yaku, “Hosea, papotoʼoka anamu setu ‘I Anu Bareʼemo Ndapotowe’, maka Yaku bareʼemo mampotowe woʼu banca Isaraeli, pai bareʼemo kojo da mampokapuru tau seʼe.

⁷ Paikanya banca Yahuda da Kupokapuru. Yaku Pue, Pue Ala pue ntau seʼe, da mangancorepaka tau seʼe, paikanya banya pai poʼiwali, pai banya woʼu pai mata mpenai bara mata mpana bara nyara pai topelambanya.”

⁸ Butu ndauwemo ana mami anu karadua, mongkeni woʼu rongoku pai napoana woʼu sambaʼa ana tuama.

⁹ Ndatoʼo i mPue ri yaku, “Papotoʼoka anamu setu, ‘I Banya Tau-Ku’, maka to Isaraeli banya tau-Ku, pai Yaku banya Pue Ala pue ntau seʼe.”

Katedikanaka nto Isaraeli da ndawali mpakoroka muni 1:10–2:1

¹⁰ Banca Isaraeli da mewali sondo ewa kasondo bone ri wiwi ntasi, painaka bareʼe da ndakoto da mangantubu bara mangaimba. Seʼi-seʼi i Pue Ala mompau ri tau seʼe, “Komi banya tauku,” paikanya da rata temponya Sira da mangantoʼoka tau seʼe, “Yakumo Pue Ala anu tuwu pai komi waʼa ana-Ku!”

¹¹ Banca Yahuda pai banca Isaraeli da ndapasambaʼa-mbaʼa muni. Tau seʼe da mangalanti sambaʼa tadulako, pai tau seʼe da kakoteranga-rangani pai da gana-gana muni katuwunya ri tananya. Monco kojo, reme Yisirieli da mewali reme anu bangke!