DANIELI 1 - Sura Magali Nuntu Ngkatuwu

TUNTUKA I DANIELI PAI WAʼA YUNUNYA 1:1–6:27 Waʼa ntau mangura nto Yahuda ri langkanae i Nebukanesa 1:1-21

¹ Ri katatogo ntaʼunya poparenta i Mokole Yoyaki ri Yahuda, i Nebukanesa datu Babeli maungku kota Yerusale pai nalimbu ncape.

² I Pue masintuwunaka siʼa manganangi i Mokole Yoyaki, pai mampamuru santila waʼa aga-aga anu masuli ri Banua i mPue. Waʼa ntau anu natawani, nakeni ri banua lamoanya ri Babeli, pai waʼa aga-aga anu napamuru setu nadika ri raya ngkareʼe waʼa mparewa banua lamoa setu.

³ Ungka lairia nasongka i datu i Asipenasi, tadulako ncombori langkanae da mangampilisi ungka ri oyo waʼa ntawani to Isaraeli setu bara tesangkuja waʼa ntau mangura muli mokole bara muli ngkabosenya.

⁴ Tau seʼe setu sangaya-ngaya da waʼa ntau mangura anu bereʼe posarinya. Tau seʼe sangaya-ngaya da madolidi, ndateka sikolanya, loʼe da gana-gana pangaincaninya pai singkana kojo da motetala ri raya langkanae. I Asipenasi sangaya-ngaya da mampaguru tau seʼe mobasa pai moʼuki basa Babeli.

⁵ Napakanoto woʼu i datu nunjaa anu da nakoni pai anu da nainu ntau seʼe sangaya-ngaya da siwia pai anu ndapatoka tila bangani ncombori i datu. Ri karoonya ndalati ri raya anu tatogo ntaʼu, tau seʼe sangaya-ngaya da mancuara i datu motetala ri langkanae.

⁶ Ri oyo waʼa ntau mangura setu njau woʼu i Danieli, i Hananya, i Misaeli pai i Asaria, pura-pura ungka ri lemba i Yahuda.

⁷ Tadulako langkanae mancawani waʼa ntoʼo ntau seʼe, mewali: Belitasari, Sadara, Mesa pai Abenego.

^8-9 Ua petulungi i mPue Ala, i Danieli napomawo pai napokapuru i Asipenasi. Napakaroso i Danieli rayanya da naka siʼa bareʼe mampakakarika koronya pai pangkoni pai panginu anggoro anu ungka ri langkanae i datu, inceʼe painaka naperapi ri Asipenasi da naka siʼa maya marata pangkoni anu ntaninya.

¹⁰ Ua mampokaeka i datu, pai napantoʼo i Asipenasi, “I datu ngkalioa anu mampakanoto pangkoni pai panginumu, mewali ane malulu parata ndayaa siko bareʼe ntani madonde painaka waʼa ntau mangura ntaninya, manoto yaku da ndapepate.”

¹¹ Ungka lairia napombetoʼoka i Danieli kakononya inceʼe pai topojaga anu napokau i Asipenasi da mamporiokoi i Danieli pai waʼa yununya. Natoʼo i Danieli:

¹² “Petondoni kami seʼi ri raya anu sampuyu eo; waika kami mau podo inau pai ue anu da kakomi pai da kainu.

¹³ Pura sampuyu eo, paresamo taʼa mami pasintolio pai taʼa waʼa mpemuda anu mangkoni pangkoni anu ndapakanoto i datu, nepa da nubotusi malulu pangkitamu.”

¹⁴ Topojaga setu sintuwu, napowia kojo ewa perapi i Danieli.

¹⁵ Pusa sampuyu eo, tongawa tau seʼe meruu kadondenya painaka pura-pura tau mangura anu marata pangkoni ungka ri meja i datu.

¹⁶ Montepuʼu ungka njairia bareʼemo nawai ntopojaga setu pangkoni pai panginu ewa anu napakanoto i datu, paikanya podo inau pai ue.

¹⁷ I Pue Ala mawai kaloʼe ndaya pai pangaincani ri tau mangura anu aopo setu ri mpengaya-ngaya kaloʼe. Ri Danieli banya podo inceʼe paikanya ndawai woʼu kaloʼe da mantotoraka pepatongawa pai pangipi.

¹⁸ Ri kapusa mpeguru ntau seʼe ri anu tatogo ntaʼu ewa anu napakanoto i datu setu, napoyunu i Asipenasi pura-pura tau mangura setu mancuara i Datu Nebukanesa.

¹⁹ Butu mompasimbaju pai tau seʼe pura-pura, narata i datu, i Danieli, i Hananya, i Misaeli pai i Asaria meruu ri waʼa anu ntaninya ri mpengaya-ngaya jaya ntetala. Montepuʼumo tau seʼe motetala ri raya langkanae i datu.

²⁰ Sangkani-sangkani i datu mawai pompeoasi anu da ndatotoraka pai da ndanawa-nawa, nakita totoraka pai parata ndaya ntau mangura aopo setu sampuyu ngkani peruu ngkadagonya ungka ri totoraka pai ponawa-nawa pura-pura topowati pai tau loʼe modoʼa-doʼa ri raya mpoparentanya.

²¹ I Danieli motetala ri langkanae rantani i Datu Koresi ungka ri Perisia mampapeʼuru Babeli.