AYUBI 1 - Sura Magali Nuntu Ngkatuwu

I Majaʼa mampebutuka i Ayubi 1:1-12

¹ Ri tana Usi, tuwumo sambaʼa tuama i Ayubi toʼonya. Siʼa manyomba ri Pue Ala pai todo mepoʼinaya ri Sira. Siʼa madago raya pai bereʼe jaʼa napowia mau sakodi.

² Reʼe papitu ananya tuama pai tatogo ananya weʼa.

³ Pai siʼa woʼu mampotumpu anamayunu anu sondo, bimbanya reʼe 7.000, 3.000 onta, 1000 japi pai 500 kalide, mayamo ndatoʼo siʼamo tau anu ri wawo ngkakoreʼenya ri oyo waʼa ntau anu meari ri tondo Pebetea.

⁴ Napobiasamo waʼa ana i Ayubi anu tuama papitu setu mombembesawani mampowia posusa ri banuanya sambaʼa-sambaʼa seʼe. Ri waʼa mposusa setu ananya anu weʼa tatogo setu woʼu njoʼu sangkani-ngkani molimbu mangkoni, manginu sangkani-ngkani pai waʼa ngkasangkomponya.

⁵ Sangkani-sangkani roo posusa waʼa ananya setu, sampowuro-sampowuro, i Ayubi da membangu mampanyombaka panyomba ri Pue, tila waʼa ananya wungka-wungka, da naka bareʼe ndakitanaka i mPue salaa ntau seʼe. Maka napepewoloka i Ayubi boi waʼa ananya setu mampowia salaa mampetikodi i Pue Ala mau bareʼe naʼoamo.

⁶ Ri anu sandeme waʼa anu ndate ri suruga mancuara i Pue, pai i Topekelo woʼu njau ri oyo ntau seʼe.

⁷ Meoasi i Pue ri siʼa ndatoʼo, “Ungka ri mbeʼi siko?” Mesono i Topekelo natoʼo, “Yaku nepa mewalili ungka ri polayo-layoku maliliwungi sambawo lino.”

⁸ Nepa meoasi i Pue ndatoʼo, “Bara reʼemo nupampatomata watuaku i Ayubi? Ri sambawo lino bereʼe tau anu ewa siʼa katodonya pai kadago ndayanya. Siʼa manyomba ri Yaku pai bereʼe powianya anu majaʼa.”

⁹ Paikanya mesono i Topekelo natoʼo, “Lawi i Ayubi da manyomba ri Komi maka siʼa marata pombai mpuru ndaya ungka ri Komi.

¹⁰ Siʼa, pai somborinya pai waʼa ngkakoreʼenya Ndikariani. Tetalanya Ndidonco, Ndiwaika siʼa pinatuwu anu sondo junjuku sambawo ntananya.

¹¹ Paikanya ane rapanya pura-pura kakoreʼenya setu nditima, manoto liu-liu da napepepara Komi!”

¹² Inceʼe pai ndapantoʼo i mPue ri Topekelo, “Madago powiamo ewambeʼi pepokonomu ri Ayubi pai waʼa ngkakoreʼenya, podoia neʼe nupakajuʼa siʼa!” Malaimo kojo i Topekelo ungka ri suara i mPue.

Waʼa ana pai waʼa ngkakoreʼe i Ayubi ndagero 1:13-22

¹³ Bara sangkuja ntempo ungka njairia waʼa ana i Ayubi ntongo mawianaka posusa ri banua ntukaka ntau seʼe.

^14-15 Tingkarasaka sambaʼa tau pomokau molonco-lonco rata ri banua i Ayubi, mampetumbu bambari ewaseʼi, “Tua, to Seba rata mampesuwuki kami ntongo mopajeko ri bonde pai waʼa ngkalide ntongo mpangande ri sorinya. Roo narampa ntau seʼe waʼa mpinatuwu setu pai napepate waʼa anamayunumi anu njau njairia. Jamo yaku ngkalioku anu lapa painaka kukoto maʼi mampetumbuka komi seʼi.”

¹⁶ Ntongo mompaupa siʼa jelamo anamayunu anu karadua mantoʼoka siʼa, “Waʼa bimbami Tua pai waʼa ntopongkambimi roo narinci berese painaka mate pura-pura. Podo yaku ngkalioku anu lapa painaka kukoto maʼi mampetumbuka komi Tua.”

¹⁷ Bareʼepa roo pompetumbunya setu, ratamo anamayununya anu katatogo mampetumbuka siʼa, “Reʼe tatogo ntibura parampo to Kasidi roo marampa waʼa ontami pai mampepate waʼa anamayunumi Tua. Jamo yaku anu lapa painaka kukoto maʼi mampetumbuka komi Tua.”

¹⁸ Sindara ntongo mompaupa siʼa, jelamo anamayununya anu ntaninya mangkeni bambari anu mantoʼo, “Waʼa anami ntongo mposusa ri banua anami anu tukaka.

¹⁹ Tingkarasaka setu lompiu ungka ri tongo pada bone, mayoro banua setu painaka madungka, waʼa anami mate pura-pura, jamo yaku anu tuwu painaka kukoto maʼi mampetumbuka komi Tua.”

²⁰ Inceʼe painaka meoko i Ayubi nasiati rengkonya tanda ngkapari ndayanya. Nakou wuyuanya nepa mambukotu siʼa natoʼo,

²¹ “Yaku ndapoana doe-doe pai yaku woʼu da mate doe-doe. I Pue anu roomo mawai, Sirawoʼu seʼe anu roomo mantima. Teundemo toʼo-A!”

²² Mewali, mau ewanceʼemo pampomberataka i Ayubi kapari setu, bareʼe napowia salaa pai bareʼe woʼu napetisala i Pue Ala.