AMOSI 1 - Sura Magali Nuntu Ngkatuwu

¹ I Amosi sambaʼa topongkambi bimba ungka ri lipu Tekoa. Sia mewali nabi ri tempo tana Yahuda naparenta i Mokole Usia, pai Isaraeli naparenta i Mokole Yerobea ana i Yoahasi, radua ntaʼu kabareʼepanya molindugi, i Pue Ala mampatongawaka i Amosi waʼa anu da mewali kono Isaraeli.

² Ewaseʼimo nuntu anu natoʼo i Amosi, “I Pue mengara ungka ri Pongku ntana Sioni, oni ngangaa mogundu ungka ri Yerusale. Waʼa mpada ewo mangau makara, ewo anu malimbokori ri Buyu ngKarameli mangau makara.”

Popahuku i mPue ri waʼa negara samposori Isaraeli 1:3–2:5 Tila Siria 1:3-5

³ Ndatoʼo i mPue, “Waʼa ntau bangani Damasi papongkani-ngkanimo mowia salaa, inceʼe painaka Yaku sangaya-ngaya da mangahuku tau seʼe. Maka tau seʼe maʼai gaga napajeani to Gilea.

⁴ Inceʼe painaka Yaku da mampakatu apu ri langkanae i Mokole Hasaeli, pai da mantunju pura-pura bente i Mokole Benihada.

⁵ Waʼa baa-baa ngkota Damasi da Kuruasi pai waʼa ntau bangani Yombo Aweni da kusaewe mayali-yali ungka ri kareʼe ntau seʼe. Anu makuasa ungka ri Beta-Ederi da kupapenaʼu ungka langkanaenya, pai waʼa ntau bangani Siria da ndatawani pai da ndakeni njoʼu ri tana Kire.”

Tila mPelisiti 1:6-8

⁶ Ndatoʼo i mPue, “Waʼa ntau bangani ngkota Gasa, papongkani-ngkanimo mowia salaa, ua kaʼinceʼenya Yaku sangaya-ngaya da mangahuku tau seʼe. Tau seʼe manganteomo pura-pura sambaʼa banca napobalu mewali watua ri to Edomi.

⁷ Inceʼe painaka Yaku da mampakatu apu ri waʼa bente ngkota Gasa, pai mantunju pura-pura bentenya.

⁸ Waʼa ntau bangani ngkota Asido sangkani pai tau makuasanya pai kota Asikelo da kupairi. Kota Ekero da Kuhuku, pai pura-pura to Pelisiti anu tetoʼo da kuʼopisaka.”

Tila Tiru 1:9-10

⁹ Ndatoʼo i mPue, “Waʼa ntau bangani ngkota Tiru, papongkani-ngkanimo mampowia salaa inceʼe painaka Yaku sangaya-ngaya da mangahuku tau seʼe. Maka tau seʼe anu mangkenimo pura-pura sambaʼa banca ri kareʼe mpantawani, pai mampepombaika ri to Edomi; tau seʼe malewamo pojanji pobale ntau seʼe.

¹⁰ Inceʼe painaka Yaku da mampakatu apu ri waʼa bente Tiru pai da mangantunju rantani pura waʼa bentenya.”

Tila Edomi 1:11-12

¹¹ Ndatoʼo i mPue, “Waʼa ntau bangani Edomi, papongkani-ngkanimo mampowia salaa. Inceʼe painaka Yaku sangaya-ngaya da mangahuku tau seʼe. Beliu-liu reʼe puru ndayanya, tau seʼe mangaungku to Isaraeli, waʼa ngkasangkompo ntau seʼe. Bareʼe bali-bali karau ndaya ntau seʼe pai napokiate mpaliu.

¹² Inceʼe painaka Yaku da mampakatu apu ri kota Temani, pai da mantunju rantani pura waʼa bente kota Bosora.”

Tila Amoni 1:13-15

¹³ Ndatoʼo i mPue, “Banca Amoni, papongkani-ngkanimo mampowia salaa, inceʼe painaka Yaku sangaya-ngaya da mangahuku tau seʼe. Ri tempo mpoʼiwali da mampakabini wilayanya, tau seʼe mangabonci kompo waʼa mbeʼa anu tiana ri Gilea,

¹⁴ inceʼe painaka Yaku da mampakatu apu ri waʼa bente ngkota Raba, pai mangantunju rantani pura waʼa bentenya. Sindara setu da ndadonge kakandidi-ndidi mpombetoto, pai poʼiwali da mewandidi ewa lompiu.

¹⁵ Mokole ntau seʼe pai waʼa ntopoparentanya da ndakeni ri kareʼe mpantawani. Yaku, Pue, anu mompaumo seʼi.”