1 Yohanes 1 - Sura Magali Nuntu Ngkatuwu

Nuntu ngKatuwu 1:1-4

¹ Bangani ncura seʼi inceʼemo kono Nuntu anu mawai katuwu, inceʼemo Nuntu anu reʼemo ungka ri pontepuʼunya. Kami kadongemo pai kakitamo ngkalio mami. Kakitamo pai kakekeni mpalemo.

² Ri pampatongawa katuwu setu kami kakitamo. Inceʼe painaka kami mewali sabi kono inceʼe. Kami mampetumbuka komi kono katuwu anu monco pai bareʼe da reʼe kapusanya, anu reʼe sangkani-ngkani pai Papa anu roo ndapatongawaka kami.

³ Nunjaa anu roomo kakita pai kadonge inceʼemo anu kapetumbuka komi, da naka komi sangkani-ngkani pai kami tuwu ri pombepotowe ri kasambaʼa-mbaʼa pai Papa pai Ana-A i Yesu Kerisitu.

⁴ Paʼuki mami sura seʼi da naka rayata maliogu kawongko ndayanya.

I Pue Ala inceʼemo reme 1:5-10

⁵ Ewanceʼemo nuntu anu kadonge ungka ri Ana-A anu roomo kapetumbuka komi: i Pue Ala inceʼemo reme, ri Sira bereʼe kawenginya.

⁶ Ane tatoʼo kita tuwu ri kasambaʼa-mbaʼa pai Sira, ntanoka kita ntongo tuwu ri raya ngkawenginya, kamonconya kita tuwu ewa tau kambamba-mbamba bareʼe singkono pompauta pai powiata.

⁷ Paikanya ane tuwu ri reme sangkani-ngkani pai Pue Ala inceʼemo ndatoʼo reme, kita da tuwu ri pombepotowe sambaʼa pai sambaʼa; pai daa i Yesu Ana-A da mampakagali kita ungka ri waʼa ncalaata.

⁸ Ane tatoʼo kita bareʼe masalaa, kita mambambasimo korota ngkaliota; pai i Pue Ala bereʼe ri rayata.

⁹ Paikanya ane tapangakuka waʼa ncalaata ri Pue Ala, Sira da mabangani janji-A da mawianaka anu mayoa. Sira bareʼemo da mangkitanaka waʼa ncalaata pai da mampakagali kita ungka ri waʼa mpowiata anu sala.

¹⁰ Paikanya ane tatoʼo kita bareʼe masalaa, kita mampapewali i Pue mombamba; inceʼe sambaʼa tanda kabareʼenya reʼe nuntu i mPue Ala ri rayata.