GALATIA 1 - PERJANJIAN BARU NALCA YUBA

Gibsuk Yuba

¹ Nara Paulus, yuba lenaʾ gaknya ulumnaʾ ara, nim adya gom, onoʾ ben hnon perobnya bedya gaknya dangoka wa nen welelom henggubnyok bok, alda Yesus Kristus adya hnon, Imik Neyung nunjaʾ neyung, Yesus nimi somoknaʾ ak ab embengaʾ suboka bukiyiwoknya bedya hnon, sekiyiwanyok.

² Dara nab, nunjaʾ hemyab anyagan yuba donaʾ nim ulumak nim eb dadya dara, Galatia sokok yuba donaʾ nim ugunsamba momnya doboka beibsab.

³ Neyung Imik Neyung bek ab hnon, nunja Wenelesilnya Yesus Kristus bek ab hnon, wanaʾ uboka eleksinaʾ ab namen unaʾ ab ugunuk bo ulusulul.

⁴ Nunja malya unaʾ enesa leboka, wen malya unaʾ sokok an ulumabaʾ ak anyeb, blebsununaʾ aboka, nunja Wenelesilnya Yesus Kristus, al nong elekdok. Ban unuwokaʾ ara, nunja neyung Imik Neyung bedya seinimokaʾ sunuwoka unuwok.

⁵ Anasa, Imik Neyung bek, sobaʾ imik nenewoka gibelmorulenok!

Imik Neyung yuba hnonok ok ulumla yuba

⁶ Kristus adyaʾ perob eleknaʾ pik uboka youbsuknya, Imik Neyung bek ara onoʾ loboka, alja dib perob lero yanggan yub era weilik geboka, yok lero yanggan yub alamaknya nenyek doboka ululumnya nera, nara lok anasa ngoluklesin.

⁷ Dib nong ara, yok Imik Neyung yub era, hnon unggulumla. Bok nim adya ok perob yuba lelemab alamak nim edyok, ugunja ganya bobnenewoka, Kristus adya perob lero yanggan dib nong yub ek sam-samel meneklemak.

⁸ Nunja lelesub yub ek loboka, nera nu gom, im lero gom anaba, alda yok so yuba lebnesibya dara, or weil malyaʾ gloknesiso.

⁹ Youmaʾ hnon nunja lesubaʾ ara, wera onoʾ nadya hnon lebsinaʾ ara, nunja leb elegesubaʾ dib nong yuba dolum yub anyek, onoʾ yok Imik Neyung yub enyek leb eleganesak dara, unuwanasak nang era, or weil malyaʾ gloknesiso, hen.

¹⁰ Anasa wera hekaʾ hulumla senenulum? Nim adya or perob senelenyaknya nek elemna gom, Imik Neyung adya or perob senelenelnya nek elemna gom? Goma, nim adya perob senewanenok senewoka pik elemna de? Wenyek nim adya hnon perob senewanenok senewoka pik elemnya dara, nara Kristus adya wa wenya unggulumnaʾ laga danganenaʾ ara an.

Paulus Hekaʾ Huboka Yuba Lenaʾ Gaknya Dangamok Yuba

¹¹ Nadya ugunuk an bo yeilisisa perob lero yanggan yub era, nim ek abaʾ ak unggulumlaʾ anyek, ugunda ella danalum aboka dib lebsin.

¹² Nadya ugunuk bo yeilimsa yub era, nim ek ab dobnenggumsa, dara onoʾ nim adya hnon neknenggunyek bok, Yesus Kristus adya albeyok, ganya lomok aawanyokaʾ ak domsa.

¹³ Nara youmaʾ Yahudi yuba domsakanya unulamsaʾ ara, ugunda nidyaʾ seleb kelelum. Nara Imik Neyung yuba donaʾ nim ek nauba malya nenewoka oboka, orok nenewoka obgiga balamsa.

¹⁴ Nadyaʾ hemyabo neikibok nemouba nang era, mek so bok, nak dara, Yahudi yub ek sam ara nauba yeiriwoka doboka onoʾ unulamsa, anya nadya neyung yabo youmaʾ nang edya unulumekaʾ ara, nara hyak yeng ganya boboka unulamsa.

¹⁵ Bok Imik Neyung alja wanaʾ uboka eleksinaʾ adya, alda men na beilinaʾ oroka wenyek weboka donyookanya, alsamba welelulaʾ aboka youbonyok.

¹⁶ Dara perob lero yanggan yuba aljaʾ me nembaʾ ara, Yahudi gom nim ek leb elegolulaʾ aboka, Imik Neyung alja me nera, nak an okoka amanyok. Wera an Imik Neyung adya perob senemookanya unuwanyok sum era, nim adya hnon makoka be hnon neknululum aboka molol binggumsa.

¹⁷ Anya na anam danyek, men yuba lenaʾ gak dangamek nang ek hnon neknululum aboka, Yerusalem heikek binggumsa. Bok nara mouruwoka Arab sokok sam bilimsaʾ ara, onoʾ saawoka Damsyik heikek sam yasa.

¹⁸ Wera onoʾ eimik gibnaʾ winilya lemok danyek, nara Yerusalem heikek Petrus benya eibdanomaʾ aboka bisa danyek, alja ek ara minggu penya malamsa.

¹⁹ Wera Yerusalem heikek ara, yok-yok yuba lenaʾ gak nang era, hnon mekaʾ eilinaʾ orok bok, alda Wenelesilnya Yesus alja weis Yakobus bek hnonok eibsa.

²⁰ Imik Neyung hogung ak aldib lebna, adya momnya dobnaʾ banera dib ubna, sondaʾ ak ubnenggubna.

²¹ Wera Yerusalem heikek ab danyek, nara Siria sokok sam hnon, Kilikia sokok ara, eimik bisa.

²² Bok na nong ak dara, yuba donaʾ nim Kristus lomok uboka Yudea sokok ulumek nim era, okoka benyekaʾ senewoka ella danganggulunyek.

²³ Bok, sikda ban yub enyek hnonok kelemekaʾ ara, youmaʾ Imik Neyung mabo doluwoka oro yabalamoknya bera, wenera alja men orok nenewonun senelemok dib senenaʾ yub enyek, lero yabalamlaʾ anaʾ ak hnonok kelemek.

²⁴ Dara sikda nasamba leboka, Imik Neyung ak perob aboka giblemek.