2 KORINTUS 1 - PERJANJIAN BARU NALCA YUBA

Gibsuk Yuba

¹ Nadyaʾ hemyab, Imik Neyung yuba donaʾ nim Korintus heikek ululum nim eb, Akhaya sokok sam munaʾ Imik Neyung mabo nidyaʾ ab, hemyab o! Nara Paulus bedya, Yesus Kristus adya yuba lenaʾ gaknya, Imik Neyung adya senemokaʾ sunuwoka sekiyiwanyoknya bedya, nunjaʾ hem be Timotius beblaboka,

² nunjaʾ neyung Imik Neyung ab Wenelesilnya Yesus Kristus adya ugunuk wanaʾ uboka eleksinaʾ ab namen unaʾ ab ulusulul senelenam.

Paulus Bera Imik Neyung Ak Gibok Yuba

³ Nunjaʾ Wenelesilnya Yesus Kristus alja neyung Imik Neyung ak sobaʾ giblenob. Imik Neyung ara alda hyak angoo yadyek senewoka unulusilnya bek ulumlakanya, onoʾ alda nim ek heknaʾ ganya lanalamlaʾ damoknya Imik Neyung ek ulumla.

⁴ Nunuk nidyaʾ yokaʾ-yokaʾ igina kwelesilaʾ ak ab, Imik Neyung adya ganya hekellilisilaʾ adya, ban ganya heknaʾ enedya, nimi yok nim igina kwelesil nim ek, sikja igina kwelesilaʾ nidyaʾ ak, nunda ganya heknaʾ gebnokaʾ aboka nuk eleklesil.

⁵ Kristus adya yokaʾ-yokaʾ alak igina kwelemoknya nera nuk hnon nauba ulusil. Dara neikso Kristus adya, nunja ganya heknaʾ eneba nauba ulusil.

⁶ Nu nong anyek igina kwelesil dara, ugunuk blebsin damba hnon, ugunja ganya heknaʾ gebsin danasa ulusil. Onoʾ nuk ganya heknaʾ geblesil dara, nera ugunuk ganya heksinya nemba ulusil. Anadya wera, nunja yokaʾ-yokaʾ igina kwelesilaʾ anyek, ugumbabya neik so yokaʾ-yokaʾ igina kwelesilya bok, ganya siklewoka heiboka ulumnulum.

⁷ Anasa, nuk igina kwelesilnya nenyek, onoʾ ugumba kwelesil sok, onoʾ nuk heknaʾ ganya eleklesilaʾ ara ugumba eleklesilaʾ ara ella ulumabaʾ anasa, ugunda pe ulumnulum senewoka ganya daboka ulumab.

⁸ Nadya hemyab o! Nunjaʾ Asia mok eb igina kwesukaʾ anyek, hnon ugumba ella dolulum senelesab. Nuk an igina kwewoka ol yangelesilaʾ damok ara, hyak lok so okna adya, embengaʾ ubnenggunumab bok, somoganamab ganya ok bomouba.

⁹ Somoganokaʾ aboka igina kweiyisik senenaʾ mamok. Bok ban nidyaʾ unuweisiknya nera, nunja geremseng ek ganya dib beiliweibyek, alda Imik Neyung nim embengaʾ bukullilisilnya bek ganya dib beiliwanokaʾ aboka igina boyiwousuk.

¹⁰ Dara, Imik Neyung migib enedya nu nong ara, somoganasibyaʾ nong ok ab blebsuukanya, onoʾ wenebabya blebnesil. Nunda Imik Neyung ak ganya welemabakanya, eimik yanamla igin yakaʾ eneba alja blebnesilaʾ anyaʾ senelemab.

¹¹ Ugunja nunsamba aboka, Imik Neyung ak mololesulum adya keboka, alda nuk blebnesilaʾ anyaʾ senelemab. Dara, nimi nauba Imik Neyung ak mololomak molonaʾ adya aralesak dara, nuk perobaʾ nauba eleklesil dara, nimi nauba Imik Neyung nunja molonaʾ keboka unulamla aboka, sikda Imik Neyung ak giblemnemak.

Paulus Eimik Anaso Unuwanamna Aboka Seiniwok Yuba

¹² Nunjaʾ mek ganya edya dara, nunda sokok an ulumoubaʾ ara, onoʾ nauba so ara ugunuk ulusubnya nek dara, nunda perob ganya adya hnon, perob geisa ganya adya anara unulumoubaʾ anasa, nunda eiya dablesil. Nunja ban unulumoubnya nera, nimi ganya geremseng adya unggulumoub bok, alda Imik Neyung adya wanaʾ uboka eleksinaʾ sunuwoka unulumouba.

^13-14 Nunja ugunuk an momnya doboka beibsabnya nera einiwoka ella danamunya nenyek ok beibsab. Ugunda nuk olowoka darasam ella dangasulum sok, wera nidyaʾ olowoka ella danasom dara, perob senelamna. Dara, Yesus yanggalya sum era, nunja ugun samba perob senewanesab sok, ugumbabya nusamba perob senewanesulum.

¹⁵ Ban unu dib senenaʾ enedya, nara men ugunuk kemel yanasin senemsaʾ ara, anadya perob eleknaʾ li penenya dobnelum senemsa bok, nara lanab lobsa.

¹⁶ Nadya seinib losenya nera, ugunja pik uboka Makedonia moka binimnekanya, samal yangganyakanya, onoʾ ugunuk seʾ kemedesinya dara, nara Yudea sam binimnyaʾ anasa, ugunda arawonululumaʾ aboka seiniblomsa.

¹⁷ Bok ban nidyaʾ unu seinisenya nera, nadya ganya kaboka seininaʾ orok adya ubsa de? Nara yokaʾ-yokaʾ unuwanamna senewoka sunulamna dara, nadya ok ganya doboka salyaʾ seinilamnakanya, wera nabeyok ”Or, or,” henekanya, onoʾ ”Orok, orok,” alamna de? Orok e.

¹⁸ Imik Neyung ara hyak dib nong ok lelelanya bek si sibuka wenyalasin. Nadya ugunuk lesisaʾ ara, ”Or”, ”Orok” ara, sene bobnenewoka lebnenggusisa.

¹⁹ Anasa Imik Neyung bedya me Yesus Kristus si anyek, Silas bedya gom, Timotius bedya gom, nadya gom, leb elegousubnya nenyek dara, or, orokaʾ ak sene bobnenewoka lebnenggusub. Al Yesus ak dara, ”Or” anaʾ ok ulumla.

²⁰ Anasa Yesus pik anyeb uboka, Imik Neyung ara, alja unuwanamna aboka lemoknya nera, nidyaʾ ”Or” anaʾ ok ulumla. Wera anadya Kristus pik uboka, nunda Imik Neyung si imik nenewanobaʾ aboka, ”Aldib e,” alamab.

²¹ Nunja ganya eb, onoʾ ugunja ganya eneba, Kristus lomok ulumabakanya, migibaʾ nenelesilikanya, nuk alsamba sekillilisilnya bera, Imik Neyung ulumla.

²² Onoʾ Imik Neyung adya, nuk ouma debsuukanya, alja Geisinya bera aljaʾ nunja ganya lomok eleganesin amokaʾ anyek dib eleganesin an beknaʾ elegosuk.

²³ Nara Korintus heik yanggubsaʾ ara, ugunja ganya soloma neneweisinyek aboka ubsaʾ ara, nadya unu seiniwasenya neneba, Imik Neyung ara ella ulunel.

²⁴ Dara, ugunja dib senelelumnya nek, nuk dara, oruksin nang ulusinob senenggulusab. Ugumbeyok dib senelelumukanya, kaboka ululumaʾ anasa, nuk dara, ugunuk eiya ganya bon danasa, arasin nang ulumab.