1 TESALONIKA 1 - PERJANJIAN BARU NALCA YUBA

Gibsuk Yuba

¹ Paulus beb, Silvanus beb, Timotius beb dadya, Tesalonika heikek yuba donaʾ nim ek momnya donaʾ en beibsab. Ugunda Imik Neyung lomok ululumukanya, Wenelesilnya Yesus Kristus lomok ululum. Dara, wanaʾ uboka eleksinaʾ hnon, namen ganya bonaʾ hnon, ugunuk elegousulul.

Paulus Bera Siksamba Giblemok Yuba

² Nunda mololomab dara, ugunja si silimabakanya, Imik Neyung bek ugun nidyaʾ amba sob-sobaʾ giblemab.

³ Ugunda dib senewoka wa wenaʾ ak hnon, ugunda wanaʾ uldalalumaʾ ak hnon, ugunja Wenelesilnya Yesus Kristus yanamla senewoka ganya mel-mel aboka salalmoublelumaʾ ak hnon, banera nunja neyung Imik Neyung saramek sam sobaʾ beklemab.

⁴ Imik Neyung adya wanaʾ ulusil hemyab o, Imik Neyung adya ugunuk weboka dosukaʾ ara ella ulumab.

⁵ Nunda ugunuk perob lero yanggan yuba lelemoubaʾ ara, sibamaʾ adya ok lenggulumouba. Alda migib adya, Geisinya adya, ban yub enera hyak dib nong senewoka leb elegesuba. Ugunuk pewosululaʾ aboka, nunda ugun gangganek ara, hekaʾ huboka ulumoubaʾ ara, ugunda pe ella ululum.

⁶ Ugunda Imik Neyung adya ununaʾ hnon, nunja ununaʾ hnon diligaʾ doboka ululum. Ugunda hyak yokaʾ-yokaʾ adya geregoka igina nauba kwelesuk bok, nunja perob lero yanggan yuba ugunuk lero youb dara, perob ganya boboka eiyasaʾ dolum. Dara ban ei-ei ganya ara Imik Neyung Geisinya adya anara elegousuk.

⁷ Ban ugunja unuwolumaʾ nong adya, ugunda Makedonia Akhaya yuba dib senemek nimi nidyaʾ amba sununaʾ dibaʾ ublum.

⁸ Anasa ugunub anyeb uboka, Wenelesilnya bedya yub era, mok balamokaʾ ara Makedonia mok eb uboka, Akhaya mok oboka lelewok. Dara onoʾ nenyek ok gom, alda ugunda hekaʾ huboka Imik Neyung ak dib senelumaʾ ara, yok-yok mok soko nimi nidyaʾ ella dekaʾ adya, wera nunja dara, ugunsamba dara anaso-anaso unulumak henggunusibya.

⁹ Nunda youmaʾ ugunuk sam yuba bo yanggumouba dara, hekaʾ huboka nuk ugunja perobaʾ leboka dosulumaʾ ara, nimi nidyaʾ sikda anaso unumek aboka neklesak. Nimi nidyaʾ ara, ugunda hekaʾ huboka, bisaʾ ak molowoka gibnaʾ loboka, Imik Neyung hnonok ululanya bek alak ok dib beiliwoka ulunobaʾ aboka nidyaʾ ara lolumnya nenyek, sikja dara unuwek aboka neklesak.

¹⁰ Dara onoʾ al ugunsamba yok nim edya dara, imik ululanya Imik Neyung bedya, nera Yesus anyek, Imik Neyung adya nimi somoknaʾ ak ab embengaʾ suboka bukiyiwoknya benyek, al yanamlaʾ amba leboka, ugunja ganya nebom aboka diri ululumnya nenesa unulumak aboka neklesak. Dara ban Yesus anedya, Imik Neyung adya yu ganya boboka obnesilaʾ ak ab nunda blebnesil.