Biblia Todo Logo
Bìoball air-loidhne

- Sanasan -

ZEFANYA 3 - KITAB NU TUMPU ALLA LELE MA'IMAI'


Yerusalem ohukumo ka' oposalamatmo

1 Kinutukanmo na Yerusalem kota' anu palaganta anu saja' motomuhuk hi Tumpu ka' anu saja' nomposansala mian anu jojoong ikiijo'!

2 Silakamo na kota' anu madi' mongka'oho' montalima pokinde' nu Tumpu ka' madi' mule' mompalahatikan apaa na anu Nu tewa' boli obau, ka' anu madi' mongasanakon nasipnyo hi Tumpu ka' madi' momoita tulung hi Ia!

3 To mia-mian daka' anu i kota' aijo' sumomo singa anu lewa' molohu'. To mia-mian kopiannyo sumomo to seri-serigala anu no'ohopmo, aha talalomo hondo nangoa sahingga sangkolong pe'e na buku madi'mo ko tuha'nyo anu okaan dodop.

4 To nabi-nabinyo mule' me tulu-tulumo na anu olakukan ka' madi'mo opalesaya nu mian, to ima-imam nohumimi'imo apaa na anu osombahkonmo hi Tumpu ka' mule' monggeo-geo'akonmo atulan nu Tumpu da boda-boda baumo posi ka' untungan nu aha.

5 Panyo Tumpu daagi kiijo' i kota' aijo'; Ia saja' mombau anu mingkona ka' madi' toho' sala'. De subu-subumo Ia mombee'imo ka'adilan hi mian-Nyo anu pinalesayamo. Panyo mian anu madi' monsumbu' ka'adilan i kota' aijo' tataap mombau anu ma'idek madi'mo monsumbu' ambang.

6 Tumpu notatae, “Aku nohopu'imo manjoo' hondo na bansa; to kota-kota' nu aha ihansunan-Kumo ka' iwi-iwi' na pagan mesen tiba iwi-iwi' na laigan tangka-tangkas pontanggalakonan nu aha mian Ku pojadimo kahansunan. Iwi-iwi' na kota' nu aha liingmo madi'mo ko anu jojoong ka' mule' iwi-iwi' na jalan madi'mo ko miannyo.

7 Aku bapikin, ‘Uuka aiya tantu mian-Ku anu pinalesayamo moholomatimo Aku ka' mompajulimo iwi-iwi' na pokinde'-Ku. Tantu aha monginau'mo pangajalan anu binee'-Kumo hi aha.’ Panyo taalu' aha ola mule' lebe ahi' mombau anu ma'idek lebemo molingkudui anu u'utu mae.

8 Panyo jaga mae! Tanda'imo na sinaanyo. Aku tuminjomo susumo anu mongkalak. Kalana pinutusan-Kumo da oposihukmo na to bansa-bansa tiba to kala-kalaja'an da Ku pokonamo na tambuha'-Ku hi aha. Songko-songko na dunia mingkotmo nu kaan nu apu nu tambuha'-Ku.

9 Panyo lapas aijo' Ku bali'imo na kinyonyoa nu bansa haha aijo' sahingga aha balado'a memo hi beleng-Ku ka' misa'mo hi to pilo-pilogot sangga'at. Bansa haha aijo' iwi-iwi' montulutimo Aku.

10 Ka' mule' lengkat mae i Sudan anu majo'on mian-Ku anu pinalesayamo anu noga'a-ga'atmo saidi' mae tokamo ka' monsombahkonmo koloban hi beleng-Ku.

11 Tempo'nyo aijo' belemiu o mian-Ku anu pinalesayamo, belemiu madi'mo palalu mongoa'i ma'ambang kalana notomuhukmo mae hi beleng-Ku. Aku molaa'mo batu-batu mian anu takabun ka' buulon ka' belemiu madi'mo daagi motomuhuk mae hi belengku aita i bungkutnyo anu Susi' anu Aku na tumpunyo.

12 Ikiijo' mae Ku pobee'mo da tataapmo na sa'angu' na bansa anu madi' takabun anu montaha'imani da Aku ahi' na montulungi. Aku timbalimo jojoong ikiijo' mae.

13 Aha mian nu Israel anu daagi tuha'nyo madi'mo daagi mombau anu ma'idek maumo pa' hi he; aha madi' modaagi balekos ka' madi'mo lewa' mongakali. Aha mohumpakmo kantumuu'an anu ma'ima' ka' madi'mo daagi mongoa'i mabuhuk maumo pa' hihe.”


Nyanyian anu mongoa'i ilame'lame'

14 O Israel hagaimo ka' panyanyimo! O Yerusalem bilahimo buke-buke' na kinyonyoa!

15 Kalana Tumpu madi'mo mohukum belemiu, ilaa'-Nyomo iwi-iwi' na sampo bali' nu belemiu. Belemiu jinaganmo nu tomundo' Israel aijo'mo Tumpu nu belemiu. Uuka aiya belemiu madi'mo palalu mongoa'i daagi mabuhuk.

16 Tokaje na tempo'nyo to mia-mian motataeje, “O Yerusalem bolimo mabuhuk ka' hente na kinyonyoa.

17 Belemiu nu jagai nu Tumpu, Tumpu nu belemiu baani ka' talasanggo. Belemiu inguntungmo na nahampate kalana kuasa-Nyo. Tumpu ilame'mo ka' mule' binilahimo kalana belemiu, kalana kalibosan-Nyo binee'an-Nyomo na belemiu kantumuu'an anu bu'ou.

18 Kalana belemiu Ia ilame'mo, susumo mian anu hau-haunyo nombau-bauonmo.” “Balaa' anu nontuda'imo belemiu madi'mo po ule' Ku potoka mae. Kasala'an nu belemiu ihapus-Kumo.

19 Tokaje mae na tempo'nyo belemiu anu saja' monsansala mian Ku hansunimo, ka' mian anu pengko' Ku posalamatmo iwi-iwi' na anu binoamo ka' pinojoongmo i sa'angu' na tampat po ule'mo Ku sule'akon mae. Ambang nu aha Ku bali'imo timbalimo kaholomatan; maumo iya mae kabai maumo pe'e i songko-songko na dunia aha opopodaka'mo ka' mule' opuji'mo.

20 Tokaje mae na tempo'nyo anu jojoong i kota' atina' nono ga'a-ga'atmo po ule'mo Ku boa mae minsusule'. Belemiu Ku potalasanggomo i songko-songko na dunia aiya, Kabilahian nu belemiu i uno nu kantumuu'an po ule'mo Ku bee'.” Tumpu notataemo. 1

Lean sinn:



Sanasan