ZEFANYA 2 - KITAB NU TUMPU ALLA LELE MA'IMAI'

Pompoto'i da bolimo mombau dosa'

¹ O bansa anu madi' monsumbu' ma'ambang, sinsumbu'mo,

² da ma'isa pe'e belemiu magayou ka' manggas susum bunga-bunga! Sinsumbu'mo da ma'isa pe'e toka na sinaa potambuha'an nu Tumpu anu ko suhu-suhutmo aijo'.

³ Pobalikmo mae hi Tumpu o mian iwi-iwi' anu madi' buulon ilipu' aiya, ka' mule' mian iwi-iwi' anu montuluti palentah-Nyo. Soba pombau apa-apaa mombatuki pongka'oho' nu Tumpu ka' bolimo ko bubuun i ahop-Nyo. Ihe na monsumbu' belemiu opoluputmo ihukuman de tokamo na sinaanyo nu Tumpu mompotoa tambuha'-Nyo.

Kinutukanmo na aha to bansa-bansa anu mompaha ohani kota' Israel

⁴ I kota' Gaza madi' ko samian pe'e na anu oposalamat. Askelon liingmo madi'mo ko anu monjojoongi. Mian anu jojoong i Asdod saidi' mae olaa'mo de mamanga otumbuhimo sonsu'un sinaa ka' mian anu jojoongi i Ekron saidi' mae suele olaa'mo madi'mo timbali jojoong i kota' nu aha.

⁵ Kinutukan na belemiu o mian nu Filistin bansang anu jojoong tutus biwi nu bone'. Tumpu nontantukanmo hukuman hi belemiu. Ia mompateimo belemiu. Madi'mo ko samiannyo anu atina' hi belemiu na anu madi' silaka.

⁶ Daerah nu beleyum koko ambai timbalimo hemput padang, iwi-iwi na kema' nu to pola-polaya' tiba pangkun nu domba obaumo ikiijo'.

⁷ Mian anu jojoong i Yehuda anu moko ala mopalai saidi' mae monjojoongimo daerah nu belemiu aijo'. Aha saidi' mae molaya'mo potuu'on itano' aijo' ka' de pihimo aha hoyotmo ilaigan nu aha mian Askelon. Kalana Tumpu, Tumpu nu aha na monjagai aha ka' mule' da aha po ule' sanang na kantumuu'an nu aha.

⁸ Tumpu Anu Daka' na kuasanyo notataemo, “I hongong-Kumo na to bansa-bansa Moab tiba Amon nongalu ka' lewa'mo nongkokojoi mian-Ku anu pinalesayamo.

⁹ Kalana Aku anu tumuu', Tumpu nu bansa Israel, Kusapuimo iwi-iwi' na Moab tiba Amon susumo Sodom ka' Gomora. Lipu' haha aijo' mobuke'mo nu bubung anu kaho timusonnyo, kota' anu singkapmo ma'idek anu nu tumuu'imo nu kau' tiba hemput sampe sidu-sidutu'. Tuha' nu mian-Ku anu pinalesayamo anu daagi tutuu' montomangmo mian anu jojoong ikiijo' ka' mongalamo tano' nu aha.”

¹⁰ Sumo aijo' na mian anu jojoong ikiijo' i Moab tiba kiijo' i Amon saidi' mae ohukumo kalana katakabuulan nu aha ka' mule' kalana aha nongalumo mian anu pinalesayamo hi Tumpu Anu Daka' na kuasanyo.

¹¹ Tumpu mombaumo aha da mabuhuk. Ia mohansunimo to pilo-pilogot anu aiya i dunia. Lantas iwi-iwi' na bansa saidi' mae monsombahmo Tumpu i posi-posi lipu' nu aha.

¹² Ka' suele mian anu jojoong i Sudan obee'imo hukuman silaka nu Tumpu.

¹³ Lapas aijo' Tumpu monggunakonmo kuasa-Nyo da mohansunimo Asyur. Kota' nu Ninewe opotimbalimo da liingmo hondo ka' timbalimo tano' anu mateges.

¹⁴ Ikiijo' sampahas na binatang ka' lupa-lupa na binatang saidi mae lewa'mo lumukut ka' milawe. To tomo-tomonsi' mongkoek mimpetamo i kota' aijo' anu na'idekmo ka' lewa'mo umonyi' aijo' mae i tolongan. Tomonsi' papa' saidi' mae lewa'mo umonyi' i tumban nu sabatan. Kau'cemara anu i bangunan iwi-iwi' na kota' aijo' saidi' mae mingkotmo na lewa' o ala nu mian.

¹⁵ Sumo aijo' na anu jadi saidi' mae i kota' aijo' anu talalomo hondo lame' ka' mongoa'i butongnyo madi' ko anu mompoposia. Mian anu jojoong ikiijo' monsangka au' aitu kota' nu aha aijo' kota'mo anu talalo hondo daka' i dunia aiya! Liingmo hondo na daerah aijo' madi'mo ko miannyo anu monjojoongi me to bina-binatang nu alas na mimpeta ikiijo'! Batu-batu mian anu motulu ikota' aijo' tolokengkeng ka' mongoaimo mabuhuk.