ZEFANYA 1 - KITAB NU TUMPU ALLA LELE MA'IMAI'

¹ I Zefanya anak i Kusyi. Lundu-lunduannyo nu tulunannyo lengkat hi Kusyi de otundun sule-sule' aijo'mo i Kusyi, i Gedalya, i Amazia tiba i Tomundo' Hizkia. Sumo uuka na potuunon nu Tumpu hi Zefanya tempo'nyo i Tomundo' Yosia anak i Amon nompalentahmo aha i Yehuda.

Sinaa pinomputusianmo nu Tumpu

² Tumpu notatae, “Aku mohopu'imo iwi-iwi' na anu i dunia aiya:

³ iwi-iwi' na mian tiba binatang sagalamo tomonsi' tiba ikan. Mian anu ma'idek na kinyonyoanyo Ku hopu'imo. Iwi-iwi' na mian Ku silakaimo madi'mo ko samian na anu Ku potumuu'. Aku, Tumpu na notataemo.

⁴ Kuhukumo na mian anu jojoong i Yerusalem ka' anu i songko-songko na Yehuda. Tuha' nu anu lewa' bau ponsomban Baal Ku hansunimo na anu i tampat-tampat haha aijo'. To mia-mian anu lewa' mombau ada-adat nu Baal okolilimimo madi'mo daagi o'inau'.

⁵ Ku sapuimo iwi-iwi' ihe na saja' moliba' aita' mae i atop ka' monsombah batu nu sinaa, bitu'on, ka' to manda-mandala'. Saidi' mae Ku hopu'imo na aha anu monsombah Aku ka' mule' binasumpa'mo da tulu-tulutanmo hi beleng-Ku, panyo mule' ahi' binasumpa'mo hi sanggo nu Tominuat Milkom.

⁶ Ku pateimo na aha anu madi' toka hi beleng-Ku kabai madi' momoita pangajalan-Ku, ka' mule' anu mompala'imo Aku ka' madi'mo daagi mongka'oho' mombatuki Aku.”

⁷ Sinaa nu Tumpu ohanimo mae toka, isinaa aijo' Tumpu nongalamo sa'angu' na katantuan; kalana aijo' bolimo daagi momoya mompala'i Ia. Tumpu hau-haunyomo mosadia monsilakaimo mian-Nyo anu pinalesayamo susumo koloban anu osombahkon ka' Ia nolagamo to sampo-sampo bali' nu aha Yehuda.

⁸ “I sinaa ponsilakaianmo aijo'” Tumpu nompoto'imo, “Aku mohukumo anu toto tangka-tangkas na pangkatnyo, to ana-anak mo'ane nu tomundo' ka' mule' iwi-iwi' na mian anu mombatukimo bau-baunyo nu mian anu isalipu'an.

⁹ Ku hukumo na mian iwi-iwi' anu monsombah susumo mian anu madi' monsumbu' Aku, ka' anu mombuling ka' anu lewa' mompatei da bau pongalapan bau pomposukup isi nu laigan nu tuan nu aha tiba to bala-balang anu ingagoan.”

¹⁰ Isinaa aijo', “Sumo aijo' na koonyo nu Tumpu saidi' mae ohongoje na haang i Sabatan daka' Ikan. Lewo' nu tando' saidi' mae ohongomo lengkat mae ikampung anu sala'je binau ka' onyi' nu anu mohobo' daka' hondo kahongoanmo mae lengkat i iwi-iwi na puge'nyo.

¹¹ Tumando'mo ka' haangimo salatan belemiu mohongomo aijo' o mian anu jojoong i kota' sasu akaong i bangka'nyo kalana iwi-iwi' na anu badagang tiba to mia-mian anu nomposabolakon doi pinateanmo!

¹² Tempo'nyo aitu Aku mongalamo potong ka' mompalesa ka' molio apa-apaa kiijo' i kota' Yerusalem. Ku hukumo na mian anu jojoong ikiijo' ka' anu madi' montapali ka' anu ola mosi pa'osa nu butongnyo ka' anu bapikin tukoonyo Aku, Tumpu anu madi' toho' mombau sumo aiya kabai sumo aijo'.

¹³ Halata' nu aha saidi' mae o agoimo ka' iwi-iwi' nalaigan nu aha ohansunimo. Aha saidi' mae mombaumo laigan panyo madi'mo nu jojoongi nu aha. Aha saidi' mae mongusahakonmo ale' nu anggur panyo madi' monginum anggur nyo.”

¹⁴ Sinaa pomputusianmo nu Tumpu malia'mo mae toka ya malia'mo mae, ka' memang malia'mo mae toka. Sinaa aijo' manjoo' hondo na kasansala'an sahingga to sulu-suludadu anu talalo hondo baani maha loboo'anmo kalana madi'mo ko anu otaha'imani!

¹⁵ Sinaa aijo' sinamo nu tambuha' ka' sinaamo nu kakulangan ka' sinaa nu kasusa'an, sinaamo nu kapohobo'an ka' sinaamo nu kahansunan ka' sinaamo nu kapintungan, ka' sinaamo nu madi' talalo majingka, ka' sinaamo anu pikat hondo, ka' sehu'onmo.

¹⁶ Sansinaa aijo' na mohongo onyi' nu tolompet tiba ais nu mian anu mahampate aijo'mo aha to sulu-suludadu anu nontumbuhimo iwi-iwi' na kota' anu bentengnyo ka' laigan toto tangka-tangkas bau pontanggalakonan mian.

¹⁷ Tumpu notatae, “Ku potokamo mae manjoo' hondo na balaa' hi aha mian sahingga aha mahakanyanganmo saidi' mae susumo mian anu napisokmo. Aha binaladosa'mo hi beleng-Ku ka' uuka aiya baso' nu aha saidi' mae mobubusmo susumo uee ka' iwi-iwi' na bangke' nu aha mabusikmo ibawo nu tano'.”

¹⁸ Isinaa anu okabuhuk hondo aijo' saidi' mae Tumpu mompotoamo pusanyo sahingga iwi-iwi' na mosoni' tiba salaka nu aha madi'mo moko ala momposalamat aha. Songko-songko na dunia saidi' mae mingkotmo hansun nu papui nu apu nu tambuha'-Nyo. Monti-montik madi' pin Nu gautmo na nyawa iwi-iwi' anu i dunia aiya.