ZAKHARIA 6 - KITAB NU TUMPU ALLA LELE MA'IMAI'

Anu tinoa na kareta opat anu bau pahampate

¹ Aku nontoa mule' sangga'at. Uuka aiya tinoangku opat na kareta anu bau pahampate nosabatmo mae i olot nu ohua' na bungkutnyo nu tambaga.

² Kareta haha aijo' toto ohua' na ajahan anu mohela', momona ajahan momea', anu ko ohua'nyo ajahan mo'itom,

³ anu ko totolu'nyo ajahan mopute' ka' anu ko opatnyo ajahan belongka'.

⁴ Pinokilawangku hi malaekat aijo', “O, Tuan apaa na alati'nyo na kareta haha aiya anu bau pahampate aijo'?”

⁵ Ia nontaami, “Aku nambamo i opat na tampat anu nu tujui nu aha de aha moko pangadapmo hi Tumpu nu songko-songko na dunia.

⁶ Kareta anu bau pahampate nunu hela' nu ajahan mo'itom tujuannyo mamba i Babel sasu utara. Ajahan mopute' tujuannyo mamba i sasu kinsoban, ka' ajahan belongka' tujuannyo mamba i negara salatan.”

⁷ Nontoa ajahan belo-belongka' aijo' nosabatmo aha madi'mo sinaban na mamba mompalesa dunia. Malaekat aijo' notatae, “Lako'mo ka' palesamo mae na dunia!” Lantas nambamo na aha.

⁸ Lapas aijo' malaekat aijo' notataemo mae daka-daka' hi belengku, “Ajahan anu namba i Babel aijo' nombali'imo tambuha' nu Tumpu da madi'mo notambuha'.”

Palentah da momposongko'i makota' hi Yosua

⁹ Tumpu nompotuunmo sumo uuka hi belengku.

¹⁰ Ia notatae, “Alamo na palasombahan anu binee' mae i Heldai, i Tobias, tiba i Yedaya aha aijo' mian anu sala'je mae ninsusule' lengkat i tampat pinomboan pipinompojoongan i Babel. Sampa boa na palasombahan nu aha aijo' hi laigan i Yosia anak i Zefanya.

¹¹ Mosoni' tiba salaka bibinee'mo nu aha aijo' bau sa'angu' na makota' ka' posongko' hi Imam Daka' Yosua anak i Yozadak.

¹² Poto'iakon hi ia, saba' Akumo na Tumpu Anu Daka' na Kuasanyo nonotataemo, ‘Mian anu osanggohi Sang Tunas na saidi' mae balahasin i tampat kajojoonganyo ka' ia po ule'mo mombau Laigan nu Tumpu.

¹³ Iamo na mombau Laigan-Ku ka' montalimamo kaholomatan susumo samian na tomundo' ka' ia mompalentahmo miannyo. Samian na imam na mohapiti'i ia, ka' mompaha toa-toa na aha mokalaja ka' mompaha kona hondo.’

¹⁴ Makota' aijo' o, una' i Laigan-Ku da boli okolilimi na i Heldai, i Tobias, i Yedaya tiba i Yosias.

¹⁵ Tomia-mian tokamo mae lengkat i tampat anu majo'on ka' montulungimo mombau Laigan-Ku. De laigan aijo' timbalimo nu sumbu'je nu aha na Aku talu' Tumpu Anu Daka' na Kuasanyo nonompalentahmo mae beleyum da tinoka mae hi aha. Iwi-iwi' aijo' timbali jadi de aha totu-totu'u montuluti iwi-iwi na palentah-ngKu, Tumpu nu aha.”