ZAKHARIA 5 - KITAB NU TUMPU ALLA LELE MA'IMAI'

Anu tinoa na lulunan nu kalatas i lumahapmo

¹ Pinalahatikanku mule', ka' uuka aiya tinoangku sa'angu' na lulunan nu kitab i lumahapmo nokiita' i langa.

² Malaekat aijo' nompokilawamo mae pa' apaa na anu tinoangkumo aijo'. Tinaamanku, “Sa'angu' na lulunan nu kitab i lumahapmo nokiita' i langa. Komantannyo osio' na meten ka' kobolanyo opat ka' mintonga' na meten.”

³ Lantas ia notataemo mae hi belengku, “I kitab anu ilulunmo aijo' tinulis pingkutuki iwi-iwi' na lipu' aiya. I sa'angu' na takeannyo tinulisan tukoonyo toto samian na anu mombuling osabatakonmo da bolimo jojoong i lipu' aiya. Ka' i takeannyo mule' sangga'at tinulis tukoonyo samian na anu basumpa' ihan anu madi' totu'u suele osabatakon.

⁴ Tumpu Anu Daka' na Kuasanyo notataemo tukoo-Nyo pongkutuki aijo' opokona i laigan nu mian anu lewa' mombuling ka' mule' i laigan nu mian anu basumpa' ihan anu madi' totu'u. Laigan haha aijo' saja'mo nu kona nu kutuk sampe timbalimo tambulan nu anu ihansunmo.”

Anu tinoa na boune i uno nu kalajang

⁵ Malaekat aijo' tinoka mule' ka' notatae, “Soba toa! Daagi mule' ko anu tinoka!”

⁶ Pinokilawangkumo, “Apaa na a aijo'?” Tinaamannyo, “Sa'angu' na kalajang aijo' mongibalatakon dosa' iwi-iwi' nu lipu' aiya.”

⁷ Kalajang aijo' ko kolopnyo timah na tinutuk. Hau-haunyo aku mompalahatikan, kolopnyo aijo' tinalahangkatmo ka' tinoa i uno nu kalajang aijo' suha-suhang na boune samian.

⁸ Malaekat aijo' notatae, “Boune aiya mongibalatakon palabuatan anu ma'idek.” Lantas boune aijo' inyonyohakonnyomo da po ule'mo minsoop mokaiyong i uno nu kalajang ka' po ule'mo kinolobannyo na kalajang aijo'.

⁹ Aku nonsinda nokiita' ka' tinoangku ua'aha na boune i lumahapmo mae mo uuka hi belengku. Aha kopolipiknyo anu mahoson hondo susumo polipik nu tomonsi' laalang. Kalajang anu u'uka ingalamo nu aha ka' ilahapakonmo nu aha.

¹⁰ Pinokilawangku hi malaekat aijo', “Binoamo nu aha noya na kalajang aijo'?”

¹¹ Tinaamannyo, “Nambamo i Babel, kiijo' mae aha mombaumo kuil tampat ponsomban ia. De kuil aijo' jadimo, saba' kalajang aijo' opo una'mo kiijo' mae da osombah.”