ZAKHARIA 4 - KITAB NU TUMPU ALLA LELE MA'IMAI'

Anu tinoa na sulaan nu sulu'

¹ Malaekat anu nonotataemo mae hi belengku tinoka mule' mae ka' nombulakonmo aku susumo nombulakon mian anu hoyo-hoyot.

² Pinokilawanyo mae, “Apaa na anu tinoamo nu beleyum?” “Sa'angu' na sulaan nu sulu' mosoni' na tinutuk,” na koongku. “Aita mae i pupusnyo daagi' ko tampat bau pongisian lanya', ka' anu montikubi popitu' na sulu' ka' toto sa'angu' ko tampat bau pompokonan sumbunyo.

³ I sasu kowi ka' koanan nu sulaan nu sulu' aijo' daagi' ko kau zaitun uang kau.”

⁴ Lapas aijo' pinokilawangkumo hi malaekat aijo', “Apaa na nu ibalatakon nu pakakas haha aijo' o, Tuan?”

⁵ “Pa' madi' nu sumbu' nu beleyum?” na pinokilawanyo mae hi belengku. “Madi' Tuan,” na pinontaamingku.

^10b Malaekat aijo notataemo hi belengku, “Anu popitu' na sulu' aijo', aijo'mo popitu'na mata nu Tumpu anu momata-matai songko-songko na dunia.”

¹¹ Lapas aijo' po ule' mule' pinokilawangku hi ia, “Apaa na alati'nyo uang kau na zaitun i koanan ka' i kowi nu sulaan nu sulu' aijo'?

¹² Apaa na alati'nyo mule' ohua na panga' nu zaitun, isohipi' nu pipa ohu-ohua' anu mosoni' na tinutuk bau-bau ponsoluduki mae lanya' nu zaitun aijo'?”

¹³ Tinaamannyo mae na aku, “Pa' madi' nu sumbu' nu beleyum?” “Tinaamanku, madi' Tuan.”

¹⁴ Ia suele notataemo, “aijo' alati'nyo ua'aha na mian anu pinile'anmo nu Tumpu i dunia aiya songko-songko ka' binee'anmo pakalaja'an da mombau anu Nu palentahkon.”

Tumpu binalajanji'mo hi Zerubabel

⁶ Malaekat aijo' nonsaimo aku da mamba mompotokakon hi Zerubabel potuunon nu Tumpu sumo uuka, “Misa' kalana kahosonan nu suludadu ka' mule' misa' posi kahosonan nu beleyum sahingga binala hasinmo, panyo ola ahi' kalana roh-Ku.

⁷ Maumo ko anu molewot anu ko daka'nyo sumo bungkutnyo timbali molinggin da madi'mo ko anu atina i ahop nu beleyum. Beleyum po ule'mo mombau Laigan-Ku, ka' de beleyum mompotimpasmo batu pundasi i tampatnyo to mia-mian motataemo, ‘Ebeh na kino ima'nyo!’ ”

⁸ Lantas tinoka mule' na potuunon sangga'at, lengkat mae hi Tumpu.

⁹ Pinoto'i-Nyo, “I Zerubabel nompotimpasmo pundasi nu Laigan-Ku, ka' ia na mompojadi iwi-iwi' na laigan aijo'. De aijo' jadimo mian-Ku anu palesayamo monsumbu'je talu' Akumo na anu nompalentah mae beleyum Zakharia namba mae hi aha.

^10a Daagi ko anu monte kajadian aiya. Panyo aha montoaje i Zerubabel mombau Laigan-Ku ka' aha saidi' mae bilahimo.”