ZAKHARIA 3 - KITAB NU TUMPU ALLA LELE MA'IMAI'

Anu tinoa na Imam Daka'

¹ Anu tinoa mule' sangga'at, Tumpu nompotoamo mule' hi belengku i Imam Daka' Yosua tinjo-tinjo i ahop nu malaekat nu Tumpu. Sasu hi Yosua tinuminjomo na Setan anu kahanda'mo mongkalak ia.

² Malaekat nu Tumpu notataemo, hi Setan, “Bisa-bisa' nu hukum nu Tumpu na beleyum Setan! Bisa-bisa' Tumpu anu mongkanonongi Yerusalem mohukumo beleyum. Mian aiya sumomo lo'uton anu ihambet mae aijo' i apu anu hau-haunyo moak.”

³ I Yosua tinjo-tinjo ikiijo' nompusok baju' anu kinotonmo hondo.

⁴ Sahingga notataemo na malaekat aijo' hi to pomba-pombantunyo kiita i suluga', “Ukatakon na baju'nyo aijo' anu kinotonmo ka' alinmo na anu aijo' puso-pusok hi mian aiya.” Ka' hi Yosua ia notatae, “Dosa' nu beleyum ingalinankumo, beleyum ku bee'imo baju' anu bu'ou.”

⁵ Ia mule' nompalentahmo to pomba-pombantunyo da oposongko'i singgan anu belesi' hi ubak i Yosua. Aha nontulutimo ka' lapas aijo' pinopusokanmo nu aha mule' baju' anu bu'ou hi ia hau-haunyo aijo' nu jagai nu malaekat nu Tumpu.

⁶ Lapas aijo' malaekat aijo' nompoto'imo potatae nu Tumpu hi Yosua,

⁷ “De beleyum montuluti ahi' atulan-Ku ka' mombau pakalaja'an anu Ku bee' hi beleyum saba' saja'mo ahi' beleyum na timbali bau polaya' i uno nu Laigan-Ku ka' mongkalesang natannyo. Ku hongoje na do'a nu beleyum susumo Aku mohongo do'a nu to mala-malaekat anu ohani hi beleng-Ku.

⁸ Hongo mae Imam Daka' Yosua, ka' suele belemiu to ima-imam anu salaku to sanga-sangalunyo, belemiu iwi-iwi' aijo'mo na bau ibalat nu kantumuu'an ma'ima'mo aiya mae i ahop. De tokamo i tempo'nyo aijo' Ku palentahje na posaihon-Ku anu osa-osanggohi, ‘Sang Tunas’.

⁹ Ku potimpasmo na batu sa'angu' hi ahop i Yosua, popitu' na pasu'nyo anu Ku botikje nu tulisan-tulisan. Ola sansinaa na kopinnyo Ku alinmo na dosa' nu lipu' aiya.

¹⁰ De sinaa aijo' tokamo mae batu-batu mian molagamo mian anu mompaha ohani tiba laigannyo da toka mae mongoa'i kadamean ka' mule' kasanangan itotonga' nu ale' nu anggur ka' mule' itotenga nu to kau-kau' ara nu belemiu.”