ZAKHARIA 14 - KITAB NU TUMPU ALLA LELE MA'IMAI'

Yerusalem tiba aha to bansa-bansa

¹ I sinaa anu pomputusianmo nu Tumpu malia'mo toka. Sahingga Yerusalem otololangimo ka' to bala-balangnyo otoamo nu belemiu na obagi-bagi i ahop nu belemiu.

² Nu posihukmo nu Tumpu iwi-iwi' na bansa da montumbuhimo Yerusalem. Kota' aijo' opatundu'mo ka' iwi-iwi' na laigannyo otololangimo ka' mule' to bou-bounenyo suele opasala'imo nu aha. Mintonga' na bagian na aha mian anu jojoong kiijo' oboamo i tampat pompojoongan, panyo labinyo na jinojoong ahi' i kota' aijo'.

³ Lantas Tumpu mompahampateakonmo mongewa bansa haha aijo' susumo anu binau-Nyomo tempo'nyo naipuan mae.

⁴ I sinaa aijo' Ia tuminjomo i Puge'nyo nu Zaitun sasu kabete'an Yerusalem. Sahingga Puge'nyo nu Zaitun mombagimo ohua' ka' timbalimo bangka'nyo anu ewa lengkat pe'e mae isasu kabete'an toka-toka isasu kinsoban. Sambagian na puge'nyo aijo' nodensu' sasu utara, ka' sambagian mule' nodensu sasu salatan.

⁵ Belemiu mopalaije mamba motulu i bangka'nyo anu nobagimo ohua' na puge'nyo titinimbalimo ohua'. Belemiu mopalaije susumo mompolee' nu belemiu kikinolulu'mo tempo'nyo kapalentahan i Uzia, tomundo' nu Yehuda. Lantas tokamo na Tumpungku nutuntuni mae nu malaekat iwi-iwi'.

⁶ De sinaa aijo' tokamo mae madi'mo daagi' ko tempo' nu bakin kabai eis.

⁷ I sinaa aijo' madi'mo daagi' ko pikatnyo. Sinaa tataapmo majingka mau tempo'nyomo nu pihi. Panyo ola ahi' Tumpu na monsumbu' pa' hi pian na sinaa aijo' to kamo mae.

⁸ I sinaa aijo' uee anu molino hondo mo ilimo mae lengkat i Yerusalem; sambagian na ueenyo mo ili mamba i Ambai Mate ka' sambagian mule' mamba i Ambai anu i Totonga'nyo. Uee aijo' mo ili motau-taun na kopinnyo mau i tempo'nu ehua mau i tempo' nu posinaa.

⁹ Sahingga Tumpu mompalentahmo salaku tomundo' i songko-songko na dunia; toto samian monsombahmo Ia salaku Tumpu ka' monsumbu'mo Ia i uno nu sanggo anu pokakana.

¹⁰ Songko-songko na lipu' lengkat mae i Geba sasu utara toka-toka i Rimon sasu salatan timbalimo katano'an. Panyo Yerusalem mompaka patangkasmo lebemo matangkas nu liu-liumo na tano' anu i duhu-duhuknyo; kota aijo' mompaka ewamo lengkat mae i Sabatan Daka' Benyamin toka-toka i Sabatan Daka' anu i Pasu'nyo, tampat nu Sabatan Daka' anu Momona ka' lengkat mae i Laigan tangka-tangkas Hananel toka-toka i pompao'an anggur anu i tomundo'.

¹¹ To mia-mian jojoongmo i kota' aijo' ka' madi'mo ko anu mompoposia, madi'mo ko anu toka mae kahanda' mompatei.

¹² Tumpu mompotokamo mae panyakit anu okabuhuk hi aha iwi-iwi' na bansa anu nompahampateakonmo nongewa Yerusalem. Mata tiba jila' nu aha ka' mule' songko-songko na butong nu aha mabusikmo maumo ahi' daagi' tutuu'.

¹³ I sinaa aijo' Tumpu mompobingongmo bansa-bansa sahingga mabuhukmo ka' mule' batu-batu mian mohakopmo sangalunyo anu isohipi'nyo ka' nu pateimo.

¹⁴ To momoane nu aha Yehuda mahampatemo monsangaja'i Yerusalem. To bala-balang anu pinahuhuakon nu aha; aha nongalamo iwi-iwi' na halata' nu to bansa-bansa anu mompaha ohani sumo mosoni', salaka ka' mule' pakean manjoo' hondo.

¹⁵ Sangahan mule' na panyakit anu mahan hondo nongkonamo ajahan, bagal, unta tiba keledai ka' mule' iwi-iwi' na binatang itampat pinombauan kemah nu aha sampobali'.

¹⁶ Lapas aijo' iwi-iwi' na mian anu daagi' tutuu' aijo' hi aha bansa-bansa anu toho'mo nontumbuhi Yerusalem mambamo i kota' aijo' da monsombahmo Tomundo', aijo'mo Tumpu Anu Daka' na Kuasanyo ka' molame'akonmo Lamean Tahop o, o, atopinu nu Hon nu kau'.

¹⁷ De daagi' ko bansa anu madi' mongka'oho' mamba i Yerusalem da monsombah Tomundo' aijo'mo Tumpu Anu Daka' na Kuasanyo saba' ilipu'nyo madi'mo ko ujan anu tudun mae.

¹⁸ Ka' de mian nu aha Mesir madi' mongka'oho' molame'akon Lamean Tahop o, o, atopi nu Hon nu kau' saba' aha suelemo ahi' nu kona nu panyakit anu nu potoka mae nu Tumpu hi aha to bansa-bansa anu madi' mongka'oho' mamba monsombah Tumpu.

¹⁹ Aijo'mo na hukuman anu opokona hi aha Mesir ka' mule' hi iwi-iwi' na bansa anu madi' mongka'oho' molame'akon Lamean Tahop o, o, atopi nu Hon nu kau'.

²⁰ I sinaa aijo' iwi-iwi' na dio-dio anu opoko na i baju' nu ajahan otulisimo nu tulisan; “Samata-mata obee'mo hi Tumpu”. To kuho-kuhon anu daagi' i Laigan nu Tumpu oholomatimo sumo to mangko-mangko' anu opake de mombaumo palasombahan i ahop nu mezbah.

²¹ Iwi-iwi' na kuhon anu daagi'i Yerusalem ka' mule' i songko-songko na Yehuda obee'mo samata-mata hi Tumpu, Tumpumo Anu Daka' na Kuasanyo na tumpunyo. Mian anu jojoong i Yerusalem de monsombahkonmo koloban na mompake da bau pongunjangan antok nu binatang anu opalasombahkon. De tokamo na tempo'nyo saidi' mae madi'mo daagi' ko padagang anu mobalu-baluk i Laigan nu Tumpu Anu Daka' na Kuasanyo.