YUNUS 4 - KITAB NU TUMPU ALLA LELE MA'IMAI'

Tambuha' i Yunus ka' ka'ampunan nu Tumpu

¹ I Yunus madi' hondo sanang ihan aijo'; ia ola mule' ahi' notambuha'.

² Lantas ia binalado'amo, “O Tumpu temisa tinaloakonkumo ahi' ma'isa pe'e aku namba lengkat mae ilaiganku u'utu mae, tukoongku Belento tantu mombaumo sumo aiya? Mokonyo aijo' aku nopalaimo namba i Spanyol! Kusumbu' saba' Belentomo na Tumpu anu mongkalibosi ka' manonong ka' talalo sabaan ka' motatae ma'ima' ka'saja' ko tanga'an madi' mohukum.

³ Uuka aiya, o Tumpu pojohokmo da aku silakamo, kalana lebe ma'ima' aku silakamo ka' bolimo tumuu'.”

⁴ Tinaaman nu Tumpu, “Beleyum madi' ko alasan sahingga motambuha'mo sumo atina'.”

⁵ Lapas aijo' i Yunus nambamo nokiijo' sasu kabete'an nu kota' aijo' lantas sinumuhangmo ikiijo'. Ia nombaumo sa'angu' na tahop ka' ningkongmo i unonyo, pe-pea' montanda'i pa' apaa na anu jadi ikota' Ninewe.

⁶ Lantas Tumpu nompotumuu'mo sa'angu' na sosu'anon anu umapa da timbali pingkohungan i Nabi Yunus sahingga ia nongoa'imo sinanang. Memang, i Yunus sinanangmo hi sosu'anon aijo'.

⁷ Panyo dodododopnyo daagi subu Tumpu nompalentahmo ulo nu tano' da mongkekedi bakat nu sosu'anon aijo' sahingga ia nagayoumo.

⁸ Salatan batu nu sinaa binete'mo, Tumpu nompalentahmo mae baleba' anu mapanas anu lengkat mae i kabete'an. I Yunus kiniboli' kinotusmo na kinyonyoanyo nu batu nu sinaa anu sumomo mompapui mae ubaknyo. Madi'mo kino halapan apa-apaa na ia ka' mongka'ima'imo da sahanyo silakamo. Ia notatae, “Lebe ma'ima' aku silakamo ka' de mule' aku daagi tumuu'!”

⁹ Panyo Tumpu notatae hi ia, “Beleyum madi' palalu susa' sumo aijo' kalana nu saduakon nu sosu'anon aijo'!” Tinaaman i Yunus, “Kadaka' madi'mo? Pantasnyomo na aku motambuha' taha-tahahumo sampe mate.”

¹⁰ Lantas Tumpu notataemo hi ia, “Sosu'anon aiya tumuu' ola sampahu ka' ia magayoumo i sinaa dodododopnyomo; beleyum totu-totu'u madi' nompotumuu' kabai lewa' nompalakai. Mau sumo aijo' beleyum totu-totu'u ahi' mongoa'i molibos kalana ia magayoumo.

¹¹ Iya mule' na Aku madi' susa' na mompopikilakon Ninewe kota' anu daka' aijo'. Kalana sambiha'nyo ahi' na to bina-binatang anu madi' minsoop i lekengan aijo', panyo ikiijo' daagi ko 120.000 na anak anu ma'isa monsumbu' mombedakon, apaa na anu ma'ima' ka' mule' apaa na anu ma'idek.” 1