YUNUS 2 - KITAB NU TUMPU ALLA LELE MA'IMAI'

Do'a i Yunus

¹ I uno nu kompong nu ikan aijo' i Yunus binalado'amo hi Tumpu Tumpunyo. Ia notatae,

² “O Tumpu, i uno nu kasusa'anku aku motataemo hi Belento. Ka' Belento nontaamimo mae aku. I dunia nu mian anu sinilakamo aku nomoitamo tulung. Apaa na anu pinoitangkumo ihongomo nu Belento ka' pinalahatikanmo nu Belento.

³ Itampat anu maleeng Belento nolumbu'akonmo aku tinoka-toka ilananyo nu ambai. Ikaiyong mae solok nu ambai nontikubimo mae aku na bokon tiba solok nolumbu'akonmo aku.

⁴ I unonu kinyonyoangku aku nosi potataemo: Tumpu nola'mo aku aiya da bolimo ko anu daagi i ahop-Nyo. Madi'mo daagi aku montoa laigan kajojoongan-Nyo anu susi'.

⁵ Ambai toka-tokamo ibiwingku, ndalangon nontikubimo mae butongku, lumut nu ambai nongkalekodimo mae ubaku.

^6-7 Aku binoanyomo i aluknyo nu dunia anu i aluknyo, Idunia anu tumbannyo ginunsingmo sampe toka sidu-sidutu'. Napasku madi'mo sawe' i unonu butongku, lantas aku tinolo inau'mo ka' notataemo hi Belento. Sahingga tinokamo na do'angku hi Belento, i uno nu Laigan nu Belento anu Susi'. Lantas ihangkatmo nu Belento na aku lengkat akaong mae i uno nu ambai, O Tumpungku!

⁸ To mia-mian anu monsombah pilogot anu madi' ko gunanyo nompala'imo Belento ka' madi'mo daagi nontuluti Belento.

⁹ Panyo aku monyanyiakonmo bau pompuji Belento ka' kusombahkonmo na koloban hi Belento. Batu-batu anu jinanji'kumo ku sidahimo Belentomo na Tumpu anu momposalamat.”

¹⁰ Lapas aijo' pinalentahmo nu Tumpu na ikan aijo' nohondekakonmo i Yunus i katano'an.