YOSUA 9 - KITAB NU TUMPU ALLA LELE MA'IMAI'

To mia-mian nu Gibeon nongakalimo i Yosua

¹ Lele nu aha Israel anu saja' untung i pahampatean tinogilelemo hi iwi-iwi' na tomundo i sasu kinsoban Kaunyo nu Yordan – aita' mae i bungkutnyo, i tengke nu bungkutnyo ka' i hatanyo tutuus sonibi nu Ambai anu Totonga'nyo kojo'onnyo toka-toka i Bungkutnyo nu Libanon sasu utara aijo'mo to tomu-tomundo nu aha Het, Amori, Kana'an, Feris, Hewi ka' Yebus.

² Iwi-iwi' na tomundo haha aijo' binasale'mo ka' nosa'angu'mo da mompahampateakonmo i Yosua ka' aha mian nu Israel.

³ Panyo aha mian nu Gibeon anu nolengkat mae i bansa Hewi nohongomo apaa na anu binaumo i Yosua kiijo' mae i Yerikho tiba Ai.

⁴ Lantas aha binatanga'mo da o akali na i Yosua obau sumo uuka: opaha posake' i keledai nu aha kalung anu to ma'i-ma'idekmo, ka' pongisian anggur anu kilit na binau anu suele to ma'i-ma'idekmo. Ka' salaku bau mantu, nutoukai nu aha ola roti anu binengkengmo ka' ingombulonmo.

⁵ Aha nompusok baju' anu nogea-geatmo tiba sapatu anu manau'mo ka' pinaha tambanmo.

⁶ Sumo aijo' na balu-balu'nyo nu aha namba nompaha pia i Yosua i kemahnyo kiijo' mae i Gilgal, lantas motatae hi ia ka' hi aha mian nu Israel, “Kami lengkat mae i lipu' anu majo'on hondo ko kahanda' da mombau palajanjian tiba to Tutuuma.”

⁷ Panyo aha mian nu Israel notatae, “Bau apaa na kami mombau palajanjian tiba belemiu? Ugaat kajojoongan nu belemiu ola oha-ohani lengkat i aiya!”

⁸ Aha notatae, “Kami sanang na kinyonyoa mombau maumo pa' apaa na anu opalentahkon nu to Tutuuma.” “Belemiu aiya ihe? Ka' lengkat mae i lipu' apaa?” pinokilawa hi aha.

⁹ Aha nontaami, “Kami lengkat mae i lipu' anu majo'on hondo, kita Tuuma, kalana kami nohongomo lelenyo nu Tumpu Allah anu osombah nu belento Tuuma. Ihongomo mami na anu binau-Nyomo iwi-iwi' kiijo' mae i Mesir,

¹⁰ ka' apaa na anu binau-Nyomo hi aha ohua' na tomundo nu Amori, i sasu kabete'an nu Kaunyo Yordan, aijo'mo: i Sihon tomundo nu Hesybon ka' i Og tomundo nu Basan anu jojoong i Astarot.

¹¹ To pola-polaya' ka' iwi-iwi' na anu jojoong i lipu' mami nompokaumo mae kami da montoukai mantu da mamba mo'uuka mae mahampia to Tutuuma. Ka' mompoto'i kami aiya da ta'alukmo hi to Tutuuma. Kalana aitu okakase mami kanonongan nu to Tutuuma da mombau palajanjian tiba kami.

¹² Toamo aiya to Tutuuma, na roti mantu mami aiya. Tempo'nyo kami nambamo mae, roti aiya daagi' mapanas. Panyo aiya toamo! Binengkengmo ka' ingombulonmo.

¹³ Ka' pongisian anggur aiya daagi' bu'ou tempo'nyo kami nongisi; panyo uuka aiya, toamo! Nobea-beakmo. Baju' mami ka' sapatu mami na'idekmo kalana majo'on na i lajangan mae aiya.”

¹⁴ Sahingga aha mian nu Israel nongalamo sangkiding anu okaan nu aha mian Gibeon aijo', ka' madi'mo nompokilawa hi Tumpu mongkona han aijo'.

¹⁵ I Yosua nombaumo palajanjian da mobela'mo tiba mian nu Gibeon haha aijo', ka' nojanji'mo madi'mo daagi' mompatei aha. To pola-polaya' nu aha mian Israel suele binasumpa'mo da boli okolilimi na palajanjian aijo'.

^16-17 Padahan, tinoka i sinaa ko itolunnyo noko baumo na palajanjian aijo', aha mian nu Israel nontokaimo kota Gibeon, Kefira, Beerot ka' Kiryat-Yearim i da'erah nu mian haha aijo'. Jadi sinumbu'je nu aha taalu' kajojoongan nu aha aijo' madi' majo'on lengkat i Gilgal.

¹⁸ Panyo aha mian nu Israel madi'mo timbali mompatei aha, kalana to pola-polaya' nu aha Israel binasumpa'mo hi aha tiba sanggo nu Tumpu Allah Israel. Iwi-iwi' na aha mian nu Israel nonsosolimo han aijo' hi to pola-polaya' nu aha.

¹⁹ Panyo polaya' haha aijo' nontaami, “Bemanau'! Kami nojanji'mo hi aha ka' binasumpa'mo tiba sanggo nu Tumpu Allah Israel. Uuka aiya kita madi'mo timbali mombau anu ma'idek hi aha.

²⁰ Kita madi'mo timbali mompatei aha kalana kita nojanji'mo; ka' de kita molanggaimo janji' aijo', Tumpu Allah mohukumo kita.

²¹ Jadi bakasmo na aha tumuu', panyo kita iwi-iwi' mompotimbalimo aha bau pongala kau' ka' bau pongasu uee hi kita iwi-iwi'.” Sumo aijo' na pinoto'i nu polaya' haha aijo'.

²² Lantas mian nu aha Gibeon haha aijo' i lagamo da mangadap hi Yosua. I Yosua notatae, “Kadaka' belemiu nongakalimo kami ka' nompoto'i tukoo miu, lipu' nu belemiu majo'on hondo, padahan ola i aiya?

²³ Kalana belemiu nombaumo sumo aijo' Tumpu Allah mohukumo belemiu. Bansa miu saja'mo bau posaihon, bau pongala kau' ka' bau pongasu uee i laigan nu Tumpu Allah-ngku.”

²⁴ Tinaaman nu aha, “Obaumo mami susumo itina' kalana ihongomo mami na Tumpu Allah anu osombah nu belento Tuumangku aijo' nompokaumo i Musa, posaihon-Nyo aijo', mombee'mo hi belento Tuumangku songko-songko na lipu' aiya ka' mompateimo iwi-iwi' na anu jojoong ikiijo' de belento Tuumangku mongalamo tano' aijo'. Mabuhuk na kami de saidi' mae kami opateimo, mokonyo aijo' obaumo mami na iwi-iwi' itina'.

²⁵ Uuka aiya kami kinuasanmo nu belento Tuumangku. Palentahmo mae na kami yayamo na anu otoa ma'ima' nu belento Tuumangku.”

²⁶ Sahingga sumo uuka na pinombau i Yosua: Ia nonjagaimo mian haha aijo' ka' madi' mompobee' mian nu aha Israel mompatei aha.

²⁷ Panyo aha oppotimbalimo posaihon – bau pongala kau' ka' bau pongasu uee nu aha mian Israel ka' i mezbah nu Tumpu. Sampe tempo' uuka aha daagi' mombau kalaja susumo aijo' i tampat anu pinile'anmo nu Tumpu da bau tampat ponsomban Ia.